އަލީ ވަޙީދު 72 ގަޑިއިރު ތެރޭ ކޯޓަށް ހާޒިރުނުވެއްޖެ ނަމަ އަސްހަދަށް ފިޔަވަޅުއަޅަނީ
ކުރީގެ ޓުވަރިޒަމް މިނިސްޓަރ އަލީ ވަހީދު ކުރިއަށް އޮތް 72 ގަޑިރުތެރޭގައި ޝަރީއަތަށް ހާޒިރުވެވަޑައިނުގެންފި ނަމަ، ޖާމިނުވި ޔޫތު މިނިސްޓްރީގެ ސްޓޭޓް މިނިސްޓަރ އަސްހަދު އަލީ (އަޑުބަރޭ)އަށް ފިޔަވަޅު އަޅަން ކުރިމިނަލް ކޯޓުން ނިންމައިފިއެވެ.
މިއަދު ކްރިމިނަލް ކޯޓުގައި އޮތް އަޑު އެހުމަށް ވެސް އަލީ ވަހީދު ހާޒިރުވެ ވަޑައިނުގަތުމުން މައްސަލަ ބައްލަވާ ޤާޒީ ނިންމެވީ އަލީ ވަހީދު ހާޒިރުވެ ވަޑައިނުގަތުމުން ޖާމިނުކޮށްފައިވާ އަސްހަދަށް ފިޔަވަޅު އެޅުމަށެވެ.
މިއަދު އަޑުއެހުން ބާއްވައިފައި ވަނީ އަސްހަދު ހާޒިރުކޮށްގެން ކަމަށް ވެސް ޤާޒީ ވިދާޅުވިއެވެ. އަދި އަލީ ވަހީދު ދެން ކޯޓަށް ހާޒިރުކުރައްވާނީ ފުލުހުންގެ ބެލުމުގެ ދަށުން ބަންދުކޮށްގެން ކަމަށް ވެސް ޤާޒީ ވިދާޅުވިއެވެ.
މީގެ އިތުރުން ޤާޒީ ވިދާޅުވީ މިމައްސަލައިގައި އަލީ ވަހީދު ރާއްޖޭގެ އެންމެ މަތީ ކޯޓުތަކުގެ ހުރުމަތް ވެސް ކަނޑުއްވައިލައްވައިފައިވާ ކަމަށެވެ.
ޖިންސީ ގޯނާ އަދި ރޭޕް ކުރަން އުޅުމުގެ ދައުވާ އުފުލައިފައިވާ އަލީ ވަހީދުގެ މައްސަލަ ކްރިމިނަލް ކޯޓުގައި ކުރިއަށް ދަނިކޮށް ބޭސްފަރުވާއަށްކަމަށް ވިދާޅުވެ ރާއްޖެއިން ބޭރަށް ވަޑައިގެންނެވިގޮތަށް އަލީ ވަހީދު ރާއްޖެ ވަޑައިގެންފައެއް ނުވެއެވެ.
