މުއިއްޒު،ސަރުކާރަށް: ފަސޭހައިން ބޯހިޔާވަހިކަން ލިބޭނެ ގޮތަކަށް ކަންކަން ފަހިކޮށްދެއްވާ
ތޮއްޖެހިފައިވާ މާލޭގެ ރައްޔިތުންގެ ބޯހިޔާވަހިކަން ހައްލު ކޮށްދިނުމަށް، މާލެ ސިޓީ ކައުންސިލުން އެކުލަވައިލައިފައިވާ ޕްލޭންއާ އެއްގޮތަށް ރައްޔިތުންނަށް ފަސޭހައިން ބޯހިޔާވަހިކަން ލިބޭނެ ގޮތަކަށް ކަންކަން ފަހިކޮށްދެއްވުމަށް މާލެ ސިޓީގެ މޭޔަރު ޑރ. މުހައްމަދު މުއިއްޒު ސަރުކާރަށް ގޮވައިލައްވައިފިއެވެ.
މީލާދީ އައު އަހަރުގެ ތަހުނިޔާ ރައްޔިތުންނަށް ފޮނުއްވަމުން މޭޔަރު މުއިއްޒު މިއަދު ދެއްވި ކުރު ވީޑިއޯ މެސެޖެއްގައި ވިދާޅުވީ ކައުންސިލާ ހަވާލުވެގެން މިވީ ކުރު މުއްދަތުގައި ވެސް މާލޭގެ ރައްޔިތުންނަށް ދިމާވެފައިވާ މައްސަލަތަކަށް ހައްލު ހޯދުމަށް ގިނަ މަސައްކަތްތަކެއް ކޮށްފައިވާ ކަމަށެވެ.
ނަމަވެސް މާލޭގެ ރައްޔިތުންނަށް ކުރިމަތިވެފައިވާ އެންމެ ބޮޑު މައްސަލަ ކަމުގައިވާ ބޯހިޔާވަހިކަމުގެ މައްސަލަ ހައްލުކުރުމަށް މާލޭ ރައްޔިތުންގެ ޚިޔާލާ އެއްގޮތަށް ކައުންސިލުން ސަރުކާރުގައި އެދިފައިވާ ކަންކަމަށް އިޖާބަ ނުދިނުމަކީ ބޯހިޔާވަހިކަމުގެ މައްސަލަ ހައްލު ކުރުމަށް ކުރިމަތިވެފައިވާ ބޮޑު ގޮންޖެހުމެއް ކަމަށް މުޢިއްޒު ވިދާޅުވިއެވެ.
"އަޅުގަނޑުމެން ސަރުކާރަށް މިއަދު ވެސް އައު އަހަރުގެ މި މުނާސަބަތުގައި ދަންނަވައިލާން ބޭނުން ވަނީ މާލޭގެ ރައްޔިތުންނަށް ކުރިމަތިވެފައިވާ އެންމެ ބޮޑު މައްސަލަ ކަމުގައިވާ ގެދޮރުގެ މައްސަލަ ހައްލު ކުރުމުގައި ކައުންސިލުން މި އެދޭ ގޮތަށް ސަރުކާރުން ހަމަޖައްސައި ދެއްވާށޭ." ޑރ. މުއިއްޒު ވިދާޅުވިއެވެ.
ޑރ. މުއިއްޒު އިތުރަށް ވިދާޅުވީ މާލެއަކީ ހިތްފަސޭހަ ތަނަކަށް ހެދުމަށް ކައުންސިލުން މިހައިތަނަށް ވެސް ގިނަ މަސައްކަތްތަކެއް ކޮށްފައިވާ ކަމަށެވެ.
