ޑްރަގުގެ ވަބާ ނެތް ރަށެއް ރާއްޖޭގައި މަދު، މިއީ އިޖުތިމާއީ އެންމެ ބޮޑު މައްސަލަ: ރައީސް
މުޖުތަމައުގައި މަސްތުވާތަކެތި އާންމުވެގެން ދިޔުމަކީ މިވަގުތު ރާއްޖެއަށް ދިމާވެފައިވާ އެންމެ ބޮޑު މައްސަލަ ކަމަށާއި މި މައްސަލަ ނެތް ރަށެއް ރާއްޖޭގައި މަދުކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ރައީސް މިފަދައިން ވިދާޅުވީ ނ. އަތޮޅުގެ 5 ރަށަކަށް އަންގާރަ ދުވަހު ފެއްޓެވި ރަސްމީ ދަތުރުފުޅުގައި އެއަތޮޅު ލަންދޫއަށް ވަޑައިގެން ވާހަކަފުޅު ދައްކަވަމުންނެވެ. ރައީސް ޞާލިހު ވިދާޅުވީ އުމްރާނީ ތަރައްގީގެ ކިތަންމެ ގިނަ މަސައްކަތެއް ވެސް ރާއްޖޭގައި ކުރިއަށް އެބަ ގެންދެވޭކަމަށެވެ. އެހެން ނަމަވެސް ރައްޔިތުންނަށް ހިތްހަމަޖެހިގެން އަމާންކަމާ އެކީގައި ދިރިއުޅެވޭނީ އިޖުތިމާއީ ގޮތުން ހަމަޖެހޭ މާހައުލެއް ގާއިމްކޮށްގެންކަމަށް ރައީސް ވިދާޅުވިއެވެ.
ރާއްޖޭގެ އިޖުތިމާއީ މާހައުލުގައި މިވަގުތު އޮތް އެންމެ ބޮޑު އެއް މައްސަލައަކީ މަސްތުވާތަކެތީގެ ވަބައިގައި ޖެހިފައިވާ މީހުން ގިނަވުންކަން ފާހަގަކުރައްވައި ރައީސް ވިދާޅުވީ މިކަން ހައްލުކުރުމަށް ޓަކައި ނެޝަނަލް ޓާސްކު ފޯސްއެއް އެކުލަވައިލައި މަސައްކަތް ފަށައިފައިވާ ކަމަށެވެ.
"އިރާދަކުރެއްވިއްޔާ އޭގެ ނަތީޖާ މިއަހަރުގެ މެދުތެރޭގައި އަޅުގަނޑުމެންނަށް ފެންނަވަރު ވާނެ" ރައީސް ޞާލިހު ވިދާޅުވިއެވެ.
މިމައުޟޫގައި ވާހަކަފުޅު އިތުރަށް ކުރިއަށް ގެންދަވަމުން ރައީސް ވިދާޅުވީ، ޑްރަގަކީ ރާއްޖެއިން ބޭރުން ރާއްޖެއަށް އެތެރެކުރާ ތަކެތި ކަމަށެވެ. އެހެންކަމުން އެކަން ހުއްޓުވުމަށް ސަރުކާރުން ގިނަ މަސައްކަތްތަކެއް ކުރައްވަމުން ގެންދަވާކަމަށް ވިދާޅުވިއެވެ. މިކަމަށް ޓަކައި ރާއްޖެއިން ބޭރުގެ އެހީވެސް ހޯދަންޖެހޭކަމަށް އެމަނިކުފާނު ވަނީ ވިދާޅުވެފައެވެ.
ބޯޑަރުތައް ބަލަހައްޓަމުން ގެންދަނީ މިސަބަބާ ހުރެކަމަށް ރައީސް ވިދާޅުވިއެވެ. މީގެ އިތުރުން ރައީސް ޞާލިހު ވިދާޅުވީ މިދިޔަ އަހަރަކީ މިއިން ދުވަހަކު ރާއްޖެއިން މަސްތުވާތަކެތި އަތުލައި ނުގަންނަ މިންވަރަށް އެތަކެތި އަތުލައިގަތް އަހަރެއް ކަމަށެވެ.
"މިކަމާ ކަންބޮޑުވާ ބަޔަކު އެބަ އުޅޭ. އެއީ ޑްރަގުގެ ވިޔަފާރި ރާއްޖޭގައި ކުރާ ފަރާތްތަކާއި ވަގު ވިޔަފާރިއަށް ދެވިހިފައިފައި ތިބޭ ފަރާތްތައް. އެމީހުންނަކަށް ކަމަކު ނުދާނެ މިކަމެއް. އެހެން ނަމަވެސް އަޅުގަނޑުމެން އެކަމެއް ހުއްޓައެއް ނުލާނަން" ރައީސް ޞާލިހު ވިދާޅުވިއެވެ.
ރައީސް ވިދާޅުވީ އެހީ ލިބެން އޮތް ކޮންމެ ފަރާތަކުން އެހީތެރިކަން ހޯދައިގެން ރާއްޖޭގެ ބޯޑަރުތައް ބަލަހައްޓައި، އެތެރެކުރާ މަސްތުވާތަކެތި ކޮންޓްރޯލްކުރަން މަސައްކަތް ކުރައްވާނެކަމަށެވެ. ރާއްޖޭގެ ޖީލަކަށް ފަހު ޖީލެއް މަސްތުވާތަކެތީގެ ވަބާގައި ޖެހި ނެތިގެންދާ ތަން ބަލަން ނުތިބެވޭނެކަމަށް ރައީސް ޞާލިހު ވަނީ ވިދާޅުވެފައެވެ.
ރައީސްގެ ވާހަކަފުޅުގައި ނުސީދާކޮށް މިވަނީ އިންޑިއާ އައުޓު ކެމްޕެއިނަށް ރައްދު ދެއްވައިފައެވެ. އިންޑިއާ ސިފައިން ރާއްޖެއިން ބޭރުކުރުމަށް އިދިކޮޅުން ގޮވަމުންދާތީ މީގެ ކުރިން ވެސް ސަރުކާރުން ބުނެފައި ވަނީ އިންޑިއާ ސިފައިންގެ އެހީތެރިކަން ހޯދަނީ ރާއްޖެއަށް މަސްތުވާތަކެތި އެތެރެކުރާ މަގުތައް ބަންދުކުރުމަށް ކަމަށެވެ. އަދި އިދިކޮޅުން އިންޑިއާ އައުޓު ކެމްޕެއިން ކުރިއަށް ގެންދަނީ ޑްރަގުގެ ވިޔަފާރިކުރާ މީހުން އިސްވެ ތިބެގެންކަމަށް ވެސް ސަރުކާރުން ތުހުމަތު ކުރެއެވެ.
މަސ