އައިޖީއެމްއެޗް ކައިރީ އިތުރު ޓަވަރެއް އެޅުމަކީ އެއްވެސް ކަމެއް ނޫން: ރައީސް ޞާލިޙް

ދަރުމަވަންތަ އިމާރާތް ފަދަ އިތުރު އިމާރާތެއް، އައިޖީއެމްއެޗް ކައިރީގައި އެޅިދާނެ ކަމަށާއި އެހެން ނަމަވެސް އެމްޑީޕީގެ ވިސްނުމަކީ ލާމަރުކަޒީ ވިސްނުމެއް ކަމަށާއި ކަންތައްތައް ކުރައްވާނީ ހުރިހާ ރައްޔިތުންނަށް ވެސް ފައިދާވާނެ ގޮތެއްގެ މަތިން ކަމަށް ރައީސުލް ޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

Ads by Sosun Fihaara

ކޮމަންޑޫ ދާއިރާގެ ބައި-އިލެކްޝަންގައި އެމްޑީޕީގެ ފަރާތުން ވާދަ ކުރައްވާ ކެނޑިޑޭޓް، މުޙައްމަދު ރާޝިދުގެ ކެންޕެއިން ފައްޓަވައިދެއްވުމަށް މިރޭ ށ. ކޮމަންޑޫގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޞާލިޙް ވިދާޅުވީ، ސަރުކާރުގެ ފިކުރާއި ދިމާ އިދިކޮޅު ފިކުރުުގެ ބޭފުޅުންނާއެކު މަސައްކަތް ކުރެއްވުމަކީ އުދަނގޫ ކަމަކަށް ވާނެ ކަމަށެވެ.

"މަޝްރޫއުތައް ކުރިޔަށް ގެންދިޔައުމަށް ޓަކައި މަޖިލީހުގައި އިންނަވާ ބޭފުޅެއްގެ ފިކުރަކީ ސަރުކާރަށް ވަރަށް މުހިންމު ކަމެއް. ލާމަރުކަޒީ ނިޒާމުން ރާއްޖެ ތަރައްޤީކޮށް، ކައިރިން ޚިދުމަތްތައް ދޭން ބޭނުންވާއިރު، މަޖިލީހުގައި އެ ފިކުރު ބޭނުންވޭ. މިއާ ދިމާ އިދިކޮޅު ފިކުރުގެ ބަޔަކު މި ދާއިރާއަށް އިންތިޚާބުކޮށްފިއްޔާ އުދަނގޫވާނެ." ރައީސް ޞާލިޙް ވިދާޅުވީ، ކޮމަންޑޫ ދާއިރާއަށް ބޭނުން ވަނީ ސަރުކާރާ ގުޅިގެން ލާމަރުކަޒީ ފިކުރު ތަރައްޤީ ކުރާނެ ކެނޑިޑޭޓެއް ކަމަށާއި އެ ކެނޑިޑޭޓަކީ މުޙައްމަދު ރަޝީދު ކަމަށެވެ.

"އަޅުގަނޑުމެންނާ ވާދަ ކުރައްވާ ބޭފުޅުންގެ ފިކުރަކީ މަރުކަޒީ ނިޒާމެއް ޤާއިމް ކުރުން. އެއްތަނަކަށް މީހުން ޖަމާކުރުން، ޚިދުމަތްތައް ޖަމާކުރުން. މިއަކީ ރާއްޖެ ތަރައްޤީ ކުރެވޭނެ ގޮތެއް ނޫން."

ރައީސް ޞާލިޙް އިޝާރާތް ކުރެއްވީ ރައީސް ޔާމީންގެ ވިސްނުންފުޅަށެވެ. ދާދިފަހުން ޓީވީއަކަށް ދެއްވި އިންޓަރވިއުއެއްގައި ރައީސް ޔާމީން ވަނީ، އެއް ފަސްކުރުމުގެ ސިޔާސަތާ ގުޅޭ ގޮތުން ވިސްނުންފުޅު ހުންނެވި ގޮތް ވަރަށް ތަފްސީލުކޮށް ވިދާޅުވެދެއްވައިފައެވެ. އެގޮތުން ދެން ފުރުސަތެއް ލިބިއްޖެކަމަށްވާ ނަމަވެސް މާލެއާއި ދުރު ސަރަހައްދުތައް އެއްފަސްކުރުމަށް ޓަކައި ހާއްސަ ނުކުރައްވާނެ ކަމަށާއި މާލެ ސަރަހައްދަކީ މިހާރު ވެސް ތަރައްގީކުރެވިފައި އޮތް ޕްރޮޑަކްޓެއްކަމުން އެކަން ކުރާނީ މިސަރަހައްދުގައި ކަމަށް ރައީސް ޔާމީން ވިދާޅުވިއެވެ.

މިކަމަށް ރައްދު ދެއްވަމުން ރައީސް ޞާލިޙް ވިދާޅުވީ، ސަރުކާރުން މަސައްކަތް ކުރަނީ ލާމަރުކަޒުކޮށްގެން ޚިދުމަތްތައް ދެވޭނެ ގޮތެއް ހޯދުމަށް ކަމަށާއި ސަރުކާރުން މިހާރު އެކި ސަރަހައްދުތަކުގައި ހިންގާ ޕްރޮޖެކްޓްތައް މާލެއަށް ފުނި ޖެހުމަށް ފަހު މެގަ ޕްރޮޖެކްޓެއް ހިންގުމަކީ މާބޮޑު ކަމެއް ނޫން ކަމަށެވެ. ނަމަވެސް އެކަމުން ރައްޔިތުންނަށް ކުރާނެ މާ ބޮޑު ފައިދާއެއް ނޯންނާނެ ކަމަށް ރައީސް ޞާލިހް ވިދާޅުވިއެވެ.

"އެ [ރާއްޖޭގެ ފަސް ސަރަހައްދެއްގައި އިމާރާތް ކުރަމުންދާ] ފަސް ހޮސްޕިޓަލަށް ކުރާ ޚަރަދު އެއްކޮށްލައިފައި، އަޅުގަނޑަށް ވެސް އައިޖީއެމްއެޗް ކައިރީގައި އިތުރު ޓަވަރެއް ނެގިދާނެ. އެއްވެސް ކަމެއް ނޫން އެއަކީ. އަދި މައްޗަށް އެއާ ދިމާޔަށް ބަލަން ވެސް އިނދެވިދާނެ. އެތަނަށް ޑޮކްޓަރުން ވެސް ލެވިދާނެ. ޚިދުމަތްތައް ވެސް ލެވިދާނެ" ރައީސް ޞާލިޙް ވިދާޅުވީ، އެގޮތަށް ކަންތައް ކުރުމުން އައިޖީއެޗްގެ ކިއު ދިގުވުން ނޫން ކަމެއް ނުވާނެ ކަމަށާއި ރައްޔިތުން ކުރަން ޖެހޭ ދަތުރަކަށް، އެކަމުގައި ހޭދަވާ ވަގުތަކަށް ބަދަލެއް ނާންނަ ކަމަށެވެ.