"ގުޅިގެން"އަކީ ހަތިޔާރު އެތެރެވެގެން ހިންގި އޮޕަރޭޝަނެއް ނޫން: ފުލުހުން
ފުލުހުންނާއި ސިފައިން ހިންގާ "ގުޅިގެން" އޮޕަރޭޝަނަކީ، ރާއްޖެއަށް ހަތިޔާރު އެތެރެވެގެން ހިންގި އޮޕަރޭޝަނެއް ނޫން ކަމަށް ފުލުހުން ވިދާޅުވެއްޖެއެވެ.
މޯލްޑިވްސް ނޭޝަނަލް ޑިފެންސް ފޯހާއި ފުލުހުން ވަނީ "ގުޅިގެން"ގެ ނަމުގައި ޚާއްސަ އޮޕަރޭޝަނެއް މި މަހުގެ 9ވަނަ ދުވަހު މާލެ ސަރަހައްދުގައި ފަށައިފައެވެ. އެގޮތުން މާލޭގެ އެކި ސަރަހައްދުތަކުގައި ސިފައިން ވެސް ވަނީ ހަތިޔާރާއެކު ހަރަކާތްތެރި ވެފައެވެ. މިކަމާ ގުޅިގެން ފުލުހުން އެއިރު ވިދާޅުވީ އެއީ ރައްޔިތުންގެ ސަލާމަތާއި ރައްކާތެރިކަން ކަށަވަރުކޮށް، މާލޭގެ އަމާންކަމާއި ރައްކާތެރިކަން ޔަޤީން ކުރުމުގެ ގޮތުން، ފުލުހުން އެދިގެން އެމްއެންޑީއެފްއާ އެކު ފެށި ޚާއްސަ އޮޕަރޭޝަނެއް ކަމަށެވެ.
މި އޮޕަރޭޝަނާ ގުޅޭ ގޮތުން ބައެއް ފަރާތްތަކުން ބުނީ މިއީ "މަސްތުވާތަކެތީގެ ތެރެއިން ރާއްޖެއަށް ހަތިޔާރު އެތެރެވިކަމުގެ ޖާސޫސީ މައުލޫމާތު ލިބިގެން" ސަލާމަތީ ބާރުތަކުން ހިންގި އޮޕަރޭޝަނެއް ކަމަށެވެ. އަދި އެއީ ގޭންގުތައް މެދުވެރިވެގެން އެތެރެކުރި ހަތިޔާރުތަކެއް ކަމަށް ވެސް ބުނެފައިވެއެވެ.
އެއީ ސައްހަ މައުލޫމާތެއްތޯ "ދެން"އިން ސުވާލު ކުރުމުން، ފުލުހުން ވިދާޅުވީ އެއީ ތެދު މައުލޫމާތެއް ނޫން ކަމަށާއި ފުލުހުންނާއި ސިފައިން ގުޅިގެން މިހާރު ކުރިއަށް ގެންދާ "ގުޅިގެން" އޮޕަރޭޝަނަކީ ރައީސުލްޖުމްހޫރިއްޔާގެ ބެއްލެވުމުގެ ދަށުން އުފައްދަވައިފައިވާ " ގޭންގު ކުށްތައް ހުއްޓުވުމަށް ގައުމީ ފެންވަރުގައި މަސައްކަތްކުރާ ޓާސްކު ފޯހު"ގެ މަސައްކަތްތައް ތަންފީޒުކުރުމުގެ ގޮތުން ކުރިއަށް ގެންދާ ހާއްސަ އޮޕަރޭޝަނެއް ކަމަށެވެ.
ސިފައިންނާއި ފުލުހުން ގުޅިގެން ޚާއްސަ އޮޕަރޭޝަނުން ހިންގަމުން ދާއިރު، މިދިޔަ ބުރާސްފަތި ދުވަހުގެ ރޭ ފުލުުހުން ހިންގި އެންޓި-ޓެރެރިޒަމްގެ އޮޕަރޭޝަނެއްގައި މީހަކު ވަނީ ހައްޔަރުކޮށްފައެވެ. އެ އޮޕަރޭޝަނާ ގުޅިގެން ފުލުހުން އަދި ވަކި އެއްޗެއް ހާމަކޮށްފައެއް ނުވެއެވެ. ނަމަވެސް ޓެރަރިޒަމްގެ މައްސަލައެއްގައި މީހަކު ހައްޔަރުކޮށް، ބަންދުގެ މުއްދަތު ޖެހުމަށް ކްރިމިނަލް ކޯޓަށް ގެންދިޔަ ކަމަށް ބައެއް ނޫސްތަކުން ކްރިމިނަލް ކޯޓަށް ހަވާލާދީ ރިޕޯޓް ކުރިއެވެ.
Ads by STO
