މުމްބާއީ ގއި އޮމިކްރޮންގެ ނުރައްކާ ބޮޑުވުމުން ބާރްތީ ފާމްހައުސްއަށް ބަދަލުވެއްޖެ
އިންޑިއާގެ މުމްބާއީގައި ހަލުވިކަމާ އެކު ކޮވިޑް-19ގެ އައު ވޭރިއަންޓް ،އޮމިކްރޯން ފެތުރެމުން ދާތީ، އޭގެ ނުރައްކަލުން ސަލާމަތްވުމަށް މާޝްހޫރު ކޮމީޑިއަން ބާރްތީ ސިންގް އޭނާގެ ފާމްހައުސްއަށް ބަދަލު ވެއްޖެއެވެ.
އޮމިކްރޮން ފެތުރެމުން ދިޔުމާ ގުޅިގެން ވަރަށް ގިނަ ފަރާތްތައް ވަނީ މި ބައްޔަށް ފައްސިވެފައެވެ. އޭގެ ތެރޭގައި ގިނަ އަދަދެއްގެ ކުޑަކުދިން ވެސް ހިމެނެއެވެ.
މި އަހަރުގެ އޭޕްރިލް މަހު ވިހަން ތައްޔާރުވެފައި އިން ބާރްތީ ބުނި ގޮތުގައި ފާމްހައުސްއަށް އޭނާއާއި ފިރިމީހާ ހަރްޝް ލިމްބާޗިޔާ ބަދަލުވާން ނިންމީ، އެމީހުންގެ ފުރަތަމަ ދަރިފުޅުގެ ރައްކާތެރިކަމަށް ޓަަކައި ކަމަށެވެ.
ބާރްތީ ވަނީ އޭނާގެ ފާމްހައުސްގެ ވްލޮގްތަކެއް ވެސް ހަދައި، އާންމުންނާ ހިއްސާ ކޮށްފައެވެ. އޭނާ ބުނީ، ފާމްހައުސްއަށް ދިޔުމުން މީހުންނާ ގައިދުރުކަން ދަމަހައްޓަން ވަރަށް ބޮޑަށް އެހީތެރިވެދޭ ކަމަށެވެ. އަދި ތާޒާ ވައި ލިބޭތީ ހިތްހަމަ ޖެހޭ ކަމަށް ވެސް ބުންޏެވެ.
ބާރްތީ ބުނީ މިދުވަސްކޮޅު ބުރަކޮށް މަސައްކަތް ކުރި ކަމުގައި ވިޔަސް، ވިހާ ދުވަސް ކައިރިވުމާ އެކު މަސައްކަތްތަކުން ބްރޭކެއް ނަގާނެ ކަމަށާއި ދަރިފުޅު ލިބުމަށް ފަހު ވެސް މަސައްކަތް ކުރާ ވަރު މަދުކޮށްލާނެ ކަމަށެވެ.
