ބާރްތީއާއި ހަރްޝްއަށް ދަރިއަކު ލިބެނީ
އިންޑިއާގެ މަޝްހޫރު ކޮމީޑިއަން ބާރްތީ ސިންގްއާއި އޭނާގެ ފިރިމީހާ ހަރްޝް ލިމްބާޗިޔާއަށް ދަރިއަކު ލިބެން އުޅޭކަން އިއުލާނު ކޮށްފިއެވެ.
މި ޚަބަރު ބާރްތީއާއި ހަރްޝް ބެލުންތެރިންނާ ހިއްސާކޮށްފައި ވަނީ ވެސް ވަރަށް ތަފާތު ގޮތަކަށެވެ. ޚަބަރު ހިއްސާކުރުމަށް ބާރުތީ ވަނީ ޕްރެގްނެންސީ ޓެސްޓް ހެދިއިރުގެ ވީޑިއޯއެއް ހިއްސާކޮށްފައެވެ. އެ ވީޑިއޯއިން ފެންނަނީ ސެލްފް ޕްރެގްނެންސީ ކިޓެއް ބޭނުން ކޮށްގެން ޓެސްޓު ކުރުމަށް ފަހު، ބާރްތީ ގޮސް އެވާހަކަ ހަރްޝްއާ ހިއްސާ ކުރާ ގޮތެވެ.
ބާރްތީ ބަލިވެކަން އިންކަން އިންޑިއާގެ ބައެއް ނޫސްތަކަށް ޔަގީންކޮށްދެމުން އޭނާ ބުނީ، ދަރިއަކު ލިބޭތޯ މަސައްކަތް ކުރަމުން އަންނަތާ ހަ މަސް ވެއްޖެ ކަމަށެވެ.
ބާރްތީ ވިހާނެ ކަމަަށް ބުނެފައި ވަނީ އޭޕްރިލް މަހުގައެވެ.
ދަރިއަކު ލިބެން އުޅޭކަން އިއުލާން ކުރުމުން ބާރްތީއާއި ހަރްޝްއަށް ބޮލީވުޑްގެ ވަރަށް ގިނަ ތަރިން ވަނީ މަރްހަބާ ކިޔައިފައެވެ. އޭގެ ތެރޭގައި ސޮނާކްޝީ ސިންހާއާއި ދީޕިކާ ސިންގް އަދި ރޫބިނާ ދިލަކް ވެސް ހިމެނެއެވެ.
Ads by STO
