"އިންޑިއާ އައުޓް" ޤައުމީ ސަލާމަތަށް ނުރައްކަލެއް ކަމަށް ވިދާޅުވެ، ރައީސް ޔާމީން ހައްޔަރު ކުރަން ގޮވާލައްވައިފި
ރާއްޖޭގައި އިންޑިއާގެ އަސްކަރިއްޔާ ތިބުމާ ދެކޮޅަށް އިދިކޮޅުން ހިންގަމުން އަންނަ "އިންޑިއާ އައުޓް" ހަރަކާތަކީ ޤައުމީ ސަލާމަތަށް ނުރައްކަލެއް ކަމަށާއި އެ ހަރަކާތް ހިންގުމުގައި އިސްކޮށް ހަރަކާތްތެރިވާ އިދިކޮޅު ލީޑަރު، ރައީސް އަބްދުﷲ ޔާމީން އަބްދުލްޤައްޔޫމް ހައްޔަރު ކުރަން ޖެހޭ ކަމަށް އެމްޑީޕީގެ ޗެއަރ ޕާސަން ހަސަން ލަތީފް ވިދާޅުވެއްޖެއެވެ.
ހަސަން މިގޮތަށް ގޮވައިލެއްވީ ކޮމަންޑޫ ދާއިރާގެ ބިއި-އިލެކްޝަންގައި އެމްޑީޕީގެ ފަރާތުން ވާދަ ކުރައްވާ ކެނޑިޑޭޓަށް ތާއީދު ހޯދުމަށް ރޭ ށ. ކޮމަންޑުގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.
ހަސަން ވިދާޅުވީ، ދިވެހިންނާ މެދު ކުޑަވެސް ކުލުނެއް ހުރި މީހެއް ނަމަ އިންޑިއާ މީހުންނާ ދިމާކުރާކަށް ނުގޮވާނެ ކަމަށާއި އެކަމުގެ ނަތީޖާ ވަރަށް ގޯސްވެދާނެ ކަމަށެވެ. އަދި މިފަދަ ކަންކަމުން ދިވެހި ރައްޔިތުން އެ ވައްޓައިލައްވަނީ ވަރަށް ބިރުވެރި، ވަރަށް ނާޒުކު ފައްތަރެއްގެ ތެރެއަށް ކަމަށާއި ބޮޑު އަނދަވަޅެއްގެ ތެރެއަށް ކަމަށް ވިދާޅުވިއެވެ. އިންޑިއާގައި ރާއްޖޭގެ ވަރަށް ގިނަ އާއިލާތައް އުޅޭކަން ފާހަގަ ކުރައްވަމުން ހަސަން ވިދާޅުވީ، އިންޑިއާގެ މަސައްކަތްތެރިންނާ ދިމާކުރުމަކީ ބިރުވެރި ކަމެއް ކަމަށެވެ.
"މި ތަނުގައި ތިބި ޑޮކްޓަރުންނާއި ނަރުހުންނާއި ޓީޗަރުންނާއި ޓުއަރިޒަމް ދާއިރާގައި މަސައްކަތް ކުރާ އެތައް ބައިވަރު މީހުންނާ މިތާންގައި އަޅުގަނޑުމެން ހަތަރު ލައްކައެއްހައި މީހުން ނިކުމެ ދިމާކުރީމަ، ދެން ވެދާނެ ގޮތަކާ މެދު ވިސްނުން މުހިންމު" ހަސަން ލަތީފް ވިދާޅުވިއެވެ.
މިތަނުގައި ތިބި އިންޑިއާގެ ރައްޔިތުންނަށް ފުރައްސާރަކޮށް، އެމީހުންނަށް ބިރުވެރި ކަމެއްވާ ގޮތަށް އެ މީހުންނާ ދިމާކޮށް މިކަންކަން ކުރަން ފަށައިފި. މި ހުރިހާ ކަމެއްގެ ޒިންމާ ނަގަން ޖެހޭނީ ހަމަ ސީދާ ރައީސް ޔާމީން އަބްދުލްޤައްޔޫމް.
ހަސަން މިހެން ވިދާޅުވެފައި ވަނީ، "އިންޑިއާ އައުޓް" ކެންޕެއިނަށް ށ. ފުނަދުއަށް ވަޑައިގަތުމަށް ފަހު ، މާ ގިނަ އިރުތަކެއް ނުވަނީސް ސްކޫލުގެ ފާރުގައި "އިންޑިއާ އައުޓް" ޖަހައިފައިވާ މައްސަލައެއް ފެންމަތި ވެފައިވާ ކަމަށެވެ. އަދި އެރަށު ސްކޫލުގައި މަސައްކަތް ކުރާ އިންޑިއާ ޓީޗަރުންނަށް ފުރައްސާރަ ކުރަމުންދާ ކަމަށާއި އެ މައްސަލަ ފުލުހުންނަށް ހުށަހަޅާފައިވާކަމަށް އެޑިއުކޭޝަނުން މިއަދު ވިދާޅުވިއެވެ. އިދިކޮޅުން މިއަދު ވިދާޅުވީ، އެފަދަ ކަންކަމަށް އެފަރާތުން ހިތްވަރު ނުދޭ ކަމަށެވެ.
ށ. ފުނަދޫ ސްކޫލު ފާރުގައި އިންޑިއާ އައުޓް ޖަހާފައި
ހަސަން ލަތީފް ވިދާޅުވީ، "އިންޑިއާ އައުޓް" ހަރަކާތް މިހާރު ޤައުމީ ސަލާމަތަށް ނުރައްކަލަކަށް ވެއްޖެ ކަމަށާއި ރައީސް ޔާމީން ހިފާ ހައްޔަރު ކުރަން ޖެހޭ ކަމަށެވެ. އަދި ރައީސް ޔާމީންގެ މައްޗަށް ތަޙްޤީޤެއް ހިންގަން ޖެހޭ ކަމަށާއި އިންޑިއާ އައުޓް ހަރަކާތުގެ ފަހަތުގައި ފޮރުވިފައިވާ އެތައް ކަމެއް ހުންނާނެ ކަމަށް ހަސަން ވިދާޅުވިއެވެ.
"އަޅުގަނޑު ދެކޭ ގޮތުގައި، ޤައުމީ ސަލާމަތަށް ނުރައްކާހުރި ވާހަކައެއް ރައީސް ޔާމީން ދައްކަވަމުން އެ ގެންދަވަނީ، ހިފާ ހައްޔަރު ކުރަން ޖެހޭ. ލަސްނުކޮށް ރައީސް ޔާމީން ހިފާ ހައްޔަރު ކުރަން ޖެހޭ"
ރައްޔިތުންގެ މަޖިލީހުގެ ހުޅުހެންވެއިރު ދާއިރާގެ މަޖިލިސް މެންބަރުކަން ވެސް ކުރައްވަމުން ގެންދަވާ ހަސަން ވިދާޅުވީ، މަޖިލީހުން ވެސް މިމައްސަލަ ބައްލަވާނެ ކަމަށެވެ.
"އަވައްޓެރި އިންޑިއާ އައުޓޭ ކިޔައިގެން ކުރާ ކެންޕެއިންގައި ފޮރުވިފައި ހުރިކަންތައްތަކެއް ހުންނާނެ. އެކަން އެބަޖެހޭ ހޯދަން، ދިވެހި ސަރުކާރުން ވެސް އެ މަސައްކަތް ކުރަން އެބަޖެހޭ އަދި އަޅުގަނޑުމެން ރައްޔިތުންގެ މަޖިލިސް ހުޅުވޭހާ އަވަހަކަށް އެ މަސައްކަތް ކުރާނަން ވެސްމެ. ދުލެއް ނުކޮށްލެވޭނެ. ދޫކޮށްލައިގެންވާނެ ކަމެއް ނޫން"
ހަސަން ވިދާޅުވީ، މި ވާހަކަ ކޮމަންޑޫ ދާއިރާގެ ކެންޕެއިންދާ ދިމާކޮށްގެން ދައްކަނީ، "އިންޑިއާ އައުޓް" ފިކުރުގެ އިތުރު އެެއް ގޮނޑިވެސް މަޖިލީހަށް އިންތިޚާބުވެއްޖެ ނަމަ "އުދަނގުލަކަށް" ވާނެތީ ކަމަށެވެ. އަދި އިންތިޚާބުގެ ކެންޕެއިންގައި ރައީސް ޔާމީން ދަތުރުފުޅު ކުރައްވަނީ އެހެން ބޭނުމެއްގައި ކަމަށާއި ކޮމަންޑޫގެ ގޮނޑިނަގާނީ އެމްޑީޕީންކަން ރައީސް ޔާމީނަށް ވެސް އެނގިވަޑައިގަންނަވާނޭ ކަމަށް ވިދާޅުވިއެވެ.
"ސީދާ އެ ވިސްނުން ރައްޔިތުންގެ މަޖިލީހުގެ އެންމެ ބޭފުޅެއްގެ ތެރެއަށް ވެސް އިތުރުވެއްޖިއްޔާ އެއީ އަޅުގަނޑުމެންނަށް ވަރަށް އުދަނގޫވާނެ ކަމެއް. މި ދައުލަތަށް، މި ސަރުކާރަށް، އެމްޑީޕީއަށް އަދި ޖުމްލަކޮށް ދަންނަވަންޏާ ދިވެހި ރައްޔިތުންނަށް ވަރަށް ބޮޑު އުދަނގުލަކަށް ވެގެންދާނެ ކަމެއް، އެކަހަލަ ބޭކާރު ނުރައްކާތެރި ވާހަކަ ދެއްކުން އެއީ" ހަސަން ލަތީފް ވިދާޅުވިއެވެ.
އިންޑިއާ އައުޓް ކެމްޕެއިނަކީ އިންޑިއާ މިލިޓަރީ ރާއްޖޭގައި ގާއިމުވެ ތިބުމާ ދެކޮޅަށް ހިންގާ ކެމްޕެއިނެކެވެ. މި ކެމްޕޭނަށް ސަރުކާރު ހިންގާ ކޯލިޝަންގެ ފާޑުކިޔުން އަބަދުވެސް އޮވެއެވެ. އެ ގޮތުން އިންޑިއާ އައުޓް ގޮވާ މީހުންގެ ކަންފަތް މަތީގައި ޖަހަން ޖެހޭ ކަމަށް ވެސް އެމްޑީޕީގެ ގައުމީ މަޖިލީހުގައި ގޮވައިލައިފައި ވެއެވެ.
