ހާލަތު ގޯސްވެ ތިނަދޫ މޮނިޓަރިންއަށް ލައިފި
ކޮވިޑް-19އަށް ފައްސިވާ މީހުން ގިނަވާތީ ގދ. ތިނަދޫ މޮނިޓަރިންއަށް ލައިފިއެވެ.
އެރަށް މޮނީޓަރިންގ ހާލަތަށް ގެނެސްފައި ވަނީ އެ ރަށުން ރެކޯޑް އަދަދަކަށް ކޮވިޑް-19އަށް މީހުން ފައްސިވެފައިވާ ދަނޑިވަޅެއްގައެވެ. އެގޮތުން މިއަދު އެކަނި ވެސް 50 މީހުން ވަނީ ކޮވިޑަށް ފައްސިވެފައެވެ. މިއީ މިހައި ތަނަށް އެއްދުވަސް ތެރޭ އެންމެ ގިނަ ބަޔަކު ތިނަދޫން ފައްސިވި ދުވަހެވެ.
މީގެ ކުރިން އެއްދުވަސް ތެރޭ ތިނަދޫއިން އެންމެ ގިނަ ބަޔަކު ފައްސިވީ މިދިޔަ އަހަރުގެ ޖުލައި މަހުގެ 5 ވަނަ ދުވަހުއެވެ. އެދުވަހު ތިނަދޫއިން ޖުމްލަ 44 މީހަކު ވަނީ ކޮވިޑަށް ފައްސިވެފައެވެ.
ތިނަދޫގެ އެންމެ ފަހުން އާންމުކުރި ތަފާސް ހިސާބުތަކުން ދައްކާ ގޮތުގައި ތިނަދޫން މިހާރު 1,313 މީހުން ވަނީ ކޮވިޑް-19އަށް ފައްސިވެފައިވެއެވެ. އެ ރަށުގައި ހަރަކާތްތެރި ވޭދަނައިގެ ގޮތުގައި 118 މީހުން އެބަތިއްބެވެ.
ތިނަދޫގައި ކޮވިޑް-19 ހަލުވިކަމާ އެކު ފެތުރެން ފަށައިފައިވާ އިރު ތިނަދޫ ޑރ.ޢަބްދުއްޞަމަދު މެމޯރިއަލް ހޮސްޕިޓަލުން ވަނީ ރައްކާތެރިކަމުގެ ފިޔަވަޅުތައް އެޅުމަށް އާންމުންނަށް އިލްތިމާސްކޮށްފައެވެ. އަދި އެއްތާވި މީހުންނާ ގުޅޭ އެއްވެސް މައުލޫމާތެއް ހިއްސާ ކުރައްވަން ބޭނުން ނަމަ ތިނަދޫ ކޮވިޑް ހޮޓްލައިން ނަންބަރު 7934641އާ ގުޅުއްވައި މައުލޫމާތު ހިއްސާ ކުރެއްވުމަށް ވެސް އެ ހޮސްޕިޓަލުން އެދެއެވެ.
Ads by STO
