2021 ވަނަ އަހަރުގެ ކޮރަޕްޝަން އިންޑެކްސްގައި ރާއްޖެ 3 ޕޮއިންޓު ދަށަށް ޖެހިއްޖެ
2021ގެ ކޮރަޕްޝަން ޕާސެޕްޝަން އިންޑެކްސް (ސީ.ޕީ.އައި)ގައި ރާއްޖެ 03 ޕޮއިންޓް ދަށަށް ޖެހިއްޖެއެވެ.
ގައުމުތަކުގެ ރޭންކިންއަށް ބަލާއިރު ރާއްޖެ ވަނީ 10 ގިންތި ދަށަށް ވެއްޓިފައެވެ. މި އިންޑެކްސްއިން ދައްކާ ގޮތުގައި ރާއްޖެ އަދިވެސް ހިމެނެނީ 50 ޕޮއިންޓްއިން ދަށުން ސްކޯ ކުރާ ތިންބައި ކުޅަ ދެބައި ގައުމުތަކުގެ ތެރޭގައެވެ.
ސީ.ޕީ.އައިއަކީ ދުނިޔޭގެ 180 ގައުމެއްގައި ދައުލަތްތައް ހިންގުމުގައި ކޮރަޕްޝަން އަށަގަނެފައިވާކަމަށް ގަބޫލުކުރެވޭ މިންވަރު ބެލުމަށް ކޮށްފައިވާ ސާރވޭތަކާއި ފަންނީ މާހިރުންގެ ހޯދުންތަކުގެ އަލީގައި އެ ގައުމުތައް ގިންތިކޮށް ޕޮއިންޓްދޭ އިންޑެކްސްއެކެވެ. މި އިންޑެކްސްގައި ބޭނުންކުރަނީ ސުމަކުން ފެށިގެން ސަތޭކައާއި ދެމެދުގެ މިންގަނޑެއް ކަމަށް ވާއިރު ސުމެއް ލިބެނީ ވަރަށް ކޮރަޕްޓް ގައުމުތަކަށެވެ. އަދި 100 ލިބެނީ ކޮރަޕްޝަންގެ އަމަލުތައް މަދު، ހިންގުމުގެ ނިޒާމު ސާފު އަދި ހާމަކަން ބޮޑު ގައުމުތަކަށެވެ.
2020 ވަނަ އަހަރުގެ ސީ.ޕީ.އައިއިން ރާއްޖެއަށް ލިބުނީ 180 ގައުމުގެ ތެރެއިން 75 ގިންތި އަދި 43 ޕޮއިންޓް ކަމުގައިވީ ނަމަވެސް 2021 ގައި ދިވެހިރާއްޖެއަށް ލިބިފައި ވަނީ 85ވަނަ ގިންތި އަދި 40 ޕޮއިންޓެވެ. މި ނަތީޖާ ނެރުމަށް ޓަކައި ރިއާޔަތްކޮށްފައި ވަނީ ބައިނަލްއަގްވާމީ 3 މަސްދަރަކަށެވެ. އެއީ ގްލޯބަލް އިންސައިޓް ކަންޓްރީ ރިސްކް ރޭޓިންގްސް، ވެރައިޓީސް އޮފް ޑިމޮކްރަސީ ޕްރޮޖެކްޓް އަދި ވޯލްޑް ބޭންކް ކަންޓްރީ ޕޮލިސީ އެންޑް އިންސްޓިޓިއުޝަނަލް އެސެސްމަންޓް (ސީޕީ.އައިއޭ) އެވެ.
ގްލޯބަލް އިންސައިޓް ކަންޓްރީ ރިސްކް ރޭޓިންގްސް އަދި ވެރައިޓީސް އޮފް ޑިމޮކްރަސީ ޕްރޮޖެކްޓްގެ ޑާޓާ އެއްކޮށްފައި ވަނީ ޖެނުއަރީ 2020އިން ޖެނުއަރީ 2021 އަށެވެ. އަދި ވޯލްޑް ބޭންކް ސީ.ޕީ.އައި.އޭގެ ޑާޓާ އެއްކޮށްފައި ވަނީ ޖެނުއަރީ 2019އިން ޖެނުއަރި 2020އަށެވެ.
ރާއްޖޭގެ ހިންގުމުގެ ނިޒާމަށް ކުރިއެރުން އައިސްފައިވީ ނަމަވެސް ކޮރަޕްޝަނާ ދެކޮޅަށް މަސައްކަތްކުރުމަށް ހެދިފައިވާ ގާނޫނުތަކަށް އަމަލުކުރުމުގައްޔާއި ތަންފީޒުކުރުމުގައި ރާއްޖެ އަދިވެސް ފަހަތަށް ޖެހޭކަމަށް 2021ގެ ތަފާސް ހިސާބުތަކުން ދައްކައެވެ. އަދި، ދިވެހިރާއްޖޭގައި މައްސަލަތައް ތަހުގީގުކޮށް، ދައުވާކޮށް، އަދި ތަންފީޒުކުރުން ބަލިކަށިވުމުގެ ސަބަބުން ސިޔާސީ ފަރާތްތަކާއި ދައުލަތުގެ މުވައްޒަފުން ޒިންމާދާރު ނުކުރެވޭ ކަމަށް ވެސް ބުނެފައި ވެއެވެ.
ސީ.ޕީ.އައި އިންޑެކްސްގެ މެދު ދަރަޖައިގެ ރޭންކެއް ރާއްޖެއަށް ލިބުން ރަމްޒުކޮށްދެނީ،ކޮރަޕްޝަންގެ ބޮޑެތި އަމަލުތައް އޮތްކަމެވެ. އަދި ސަރުކާރުގެ މަތީ މަގާމުތަކުގައި ތިބޭ މުއްސަނދި މަދު ބަޔަކު ގިނަ ބައެއްގެ ހައްގުތައް ނަގައިލައި އަމިއްލަ މަންފާ ހޯދަމުންދާކަމެވެ.
2021ގެ ސީ.ޕީ.އައި ޝިއާރުން އެނގޭގޮތުގައި އިންސާނީ ހައްޤުތަކަށް އަރައިގަތުމަށް ކޮރަޕްޝަން މަގުފަހިކޮށްދެއެވެ. އަދި ކޮރަޕްޝަނުގެ ސަބަބުން ދައުލަތުން އިންސާނީ ހައްގުތަކަށް އިހްތިރާމްކޮށް ރައްކާތެރިކުރަން ޖެހޭ މިންވަރަށް އެކަން ނުކުރެވެއެވެ. މީގެ ސަބަބުން އިންސާނީ ހައްގުތަކަށް އަރައިގަންނަ ފަރާތްތައް ޒިންމާދާރުވުމުން ބަރީއަވުމަށް ވެސް މަގުފަހިކޮށްދެއެވެ.
އިންސާނީ ހައްގުތަކަށް އަރައިގަންނަ ފަރާތްތަކަކީ ކޮރަޕްޝަނާ ދެކޮޅަށް ކުރާ މަސައްކަތަށް ހުރި ބޮޑު ހުރަހަކަށް ވާއިރު، ސަރުކާރު ޒިންމާދާރު ކުރުމަށް ރައްޔިތުންނަށް ހުރި ހުރަހަކަށް ވެސް ވެއެވެ. ޒިންމާދާރުކުރުވުމާއި ހާމަކަން ބޮޑު ނިޒާމެއް ގާއިމްކުރުމަށާއި ކޮރަޕްޝަން ނައްތައިލާ ކޮރަޕްޓް ފަރާތްތައް ހިމާޔަތްކޮށް ބާރުވެރިކުރާ ވިހަ ނިޒާމް ނައްތައިލާން ސިޔާސީ އެއްބާރުލުން ވަރަށް ވެސް މުހިންމެވެ.
ކޮރަޕްޝަންގެ މިންވަރު ކުޑަކޮށް ސިޔާސީ ކަންކަމަށް ރައްޔިތުންގެ އިތުބާރު އަލުން ހޯދުމަށް، ޓްރާންސްޕޭރަންސީ މޯލްޑިވްސްއިން ވަނީ ގިނަ ކަންތައްތަކެއް ދިވެހި ސަރުކާރަށް ހުށަހަޅައިފައެވެ.
ޓްރާންސްޕޭރެންސީ މޯލްޑިވްސްއިން ހުށަހަޅައިފައިވާ ކަންތައްތައް:
- ޔުނައިޓެޑް ނޭޝަންސް ކޮންވެޝަން އެގެއިންސްޓް ކޮރަޕްޝަން (UNCAC)ގެ ދަށުން ސަރުކާރުން އަދާކުރަންޖެހޭ ޒިންމާތައް އަދާކޮށް އެކަންކަން ހާސިލްކުރުން. އަދި ކޮރަޕްޝަން ހުއްޓުމުގެ ފިޔަވަޅުތައް އަޅާ، އެ ފަދަ އަމަލުތައް މޮނިޓަރކޮށް، ވެރިފައި ކުރުމުގެ ނިޒާމު ހަރުދަނާކުރުން. އަދި މިކަމުގައި ކުރާ މަސައްކަތް އަމިއްލަ އިސްނެގުމުގެ މަތިން ހާމަކުރުން.
- ސަރުކާރުގެ ނިންމުންތަކުގައި ރައްޔިތުންގެ ބައިވެރިވުން އިތުރުކޮށް، ކަމާބެހޭ މުހިންމު މައުލޫމާތު ވަގުތުން ވަގުތަށް ހިއްސާކޮށް، ކޮރަޕްޝަނާއި ރައްޔިތުންގެ ފައިސާއާއި ވަސީލަތްތައް ހަރަދުކުރާ ގޮތާ ގުޅޭ މުހިންމު މައުލޫމާތުތައް ޝާއިއުކޮށް އެ މައުލޫމާތުތައް ފަސޭހަކަމާއެކު ބެލޭނެގޮތެއް އެކުލަވައިލެވިފައިވާކަން ކަށަވަރުކުރުން.
- ހާމަކަން ބޮޑުކޮށް، ވަގުތުން ވަގުތަށް މައްސަލަތައް ތަހުގީގުކޮށް ދައުވާ ކުރަން ފޮނުވުމަށް ބޭނުންވާ ގާބިލުކަމާއި ވަސީލަތްތައް ސަރުކާރުގެ މުއައްސަސާތަކުގައި އިތުރުކުރުން. އަދި، އެންޓި ކޮރަޕްޝަނަށް މަސައްކަތްކުރާ މުއައްސަސާތަކަކީ އެކަށީގެންވާ ފަންޑާއި، ވަސީލަތްތައް ލިބި، އެފަރާތްތަކުގެ މަސްއޫލިއްޔަތު އަދާކުރުމުގެ މިނިވަންކަން ލިބިފައިވާ މުއައްސަސާތަކެއްކަން ކަށަވަރުކުރުން. އަދި، އެމުއައްސަސާތަކުގެ މައްޗަށް ސިޔާސީ ނުފޫޒު ފޯރުވުމާއި ބިރުދެއްކުން ހުއްޓުވުން.
- ޑިމޮކުރަސީ ހިމާޔަތްކޮށް މަދަނީ މާހައުލު ރައްކާތެރިކުރުމަށް، މީހުން ޓްރެފިކްކުރުން ހުއްޓުވުމުގެ ގާނޫނު އަދި ވިސްލްބްލޯ ކުރާފަރާތްތައް ރައްކާތެރިކުރުމުގެ ގާނޫނު ފަދަ ގާނޫނުތަކަށް ފުރިހަމައަށް އަމަލުކުރުން ފެށުމާއި ތަންފީޒުކުރުމުގެ އިތުރުން އިންސާނީ ހައްގުތަކަށް އަރައިގަންނަ ފަރާތްތައް، ސަރުކާރު ހިމެނޭހެން، ޒިންމާދާރު ކުރެވޭނޭ ގޮތްތައް މަގުފަހިކުރުން.
- އެސެޓް ޑިކްލަރޭޝަން ނިޒާމު ވަރުގަދަކޮށް ސިޔާސީ ފަރާތްތަކާއި ސަރުކާރުގެ މުވައްޒަފުން ޒިންމާދާރުކުރުވާ، ދައުލަތުގެ ވަސީލަތްތައް ނަހަމަ ގޮތުގައި ބޭނުންކުރުމާއި ވޯޓު ގަތުން ނައްތައިލުން.
މީގެ އިތުރުން އެންޓި ކޮރަޕްޝަން ކޮމިޝަނުގެ ހުރިހާ މެންބަރުން އިސްތިއުފާ ދިނުމުގެ ސަބަބުން، ކޮރަޕްޝަނާ ދެކޮޅަށް ކުރާ މަސައްކަތުގައި ހުސްކަމެއް މިވަގުތު އުފެދިފައިވާތީ، އެކަމަށް ޓްރާންސްޕޭރަންސީ މޯލްޑިވްސްގެ ވަނީ ކަންބޮޑުވުން ފާޅުކޮށްފައެވެ.
ޓްރާންސްޕޭރަންސީ މޯލްޑިވްސްއިން ވަނީ ރައްޔިތުންގެ މަޖިލީހުން ވީ އެންމެ އަވަސް ގޮތެއްގައި އައު މެންބަރުން ކޮމިޝަނަށް އައްޔަންކޮށް އޭސީސީގެ ޕަފޯމަންސް އޮޑިޓްގައި ފާހަގަ ކޮށްފައިވާ ކަންކަމަށް ފުރިހަމަށް ރިއާޔަތްކޮށް އެކަންކަމަށް ހައްލެއް ހޯދުމަށް ގޮވައިލައިފައެވެ.
