އަލީ ވަހީދު ގެނައުމަށް އިނގިރޭސި ބަހުން ކޯޓު އަމުރެއް ނެރެފި
ކުރީގެ ޓޫރިޒަމް މިނިސްޓަރު އަލީ ވަހީދު ގެނައުމަށް އިނގިރޭސި ބަހުން ކޯޓު އަމުރެއް ހޯދަން ފުލުހުން އެދިފައިވާތީ އެ އަމުރު ކްރިމިނަލް ކޯޓުން ނެރެފިއެވެ.
މީގެ ކުރިން ފުލުހުން ބުނެފައި ވަނީ އަލީ ވަހީދު ރާއްޖެއިން ބޭރުގައި ހުންނަވާތީ އޭނާ ހައްޔަރުކޮށްގެން ރާއްޖެ ނުގެނެވިގެން އުޅެނީ އިންޓަޕޯލަށް ބޭނުންވާ މައުލޫމާތުތަކާ އެކު އިނގިރޭސި ބަހުން ކޯޓު އަމުރެއް ނުލިބިގެން ކަމަށެވެ. އަދި އެކަމަށް އެދި ކްރިމިނަލް ކޯޓަށް ހުށަހަޅައިފައިވާނެކަމަށް ފުލުހުން ކުރިން ބުންޏެވެ.
އެކަމާ ގުޅޭގޮތުން ކްރިމިނަލް ކޯޓުގެ އޮފިޝަލަކު ވިދާޅުވީ އަލީ ވަހީދު މައްސަލައިގައި ކޯޓު އަމުރެއް ހޯދުމަށް ފުލުހުން ފޮނުވި ސިޓީއާ ގުޅިގެން އަލީ ވަޙީދު ބަންދުގައި ބަހައްޓައިގެން ކޯޓަށް ހާޒިރު ކުރުމަށް ނެރެފައިވާ ކޯޓު އަމުރު އިނގިރޭސި ބަހަށް ތަރުޖަމާ ކުރުމަށް ފަހު، ފުލުހުންނަށް ޙަވާލުކޮށްފައިވާނެ ކަމަށެވެ. ކޯޓުން އެ އަމުރު ފުލުހުންނަށް ޙަވާލުކޮށްފައި ވަނީ ބުދަ ދުވަހުކަމަށް ކޯޓުގެ އޮފިޝަލް ވަނީ ވިދާޅުވެފައެވެ.
އަލީ ވަހީދު މިނިސްޓަރުކަމުން ވަކިކޮށްފައި ވަނީ ޓޫރިޒަމް މިނިސްޓްރީގެ އަންހެން މުވައްޒަފުންތަކަކަށް ޖިންސީ ގޯނާ ކުރިކަމަށް އޭނާގެ މައްޗަށް ތުހުމަތު ކުރެވުމާ ގުޅިގެންނެވެ. މިމައްސަލައިގެ ޝަރީއަތް ކުރިއަށް ދަނިކޮށް އަލީ ވަހީދު ރާއްޖެއިން ބޭރަށް ދިޔައީ ޕާސްޕޯޓު ދޫކުރަން ކޯޓުން އަމުރު ނެރުނުތާ މަދު ވަގުތުކޮޅެއްގެ ތެރޭގައެވެ. އަލީ ވަހީދު ބޭރަށް ފުރައިފައި ވަނީ އައްސަދު އަލީ ޖާމިނުވާ ގޮތަށެވެ. އެހެން ނަމަވެސް ހަތަރު މަސް ފާއިތުވެ، ޝަރީޢަތް ފެށުނު އިރު ވެސް ޢަލީ ވަޙީދު އެނބުރި ރާއްޖެއަށް ވަޑައެއްނުގަންނަވައެވެ. އަދި އެކަމުގެ ޒިންމާ އައްސަދު ވެސް ނަގައިފައެއް ނުވެއެވެ.
މި މައްސަލައިގައި އަލީ ވަހީދު ހާޒިރުވެވަޑައިގަތުމަށް އުޒުރުވެރިވާތީ އަލީ ވަޙީދުގެ ފަރާތުން ކޯޓުގައި ޖާމިނުވި އައްސަދު އަލީ ވަނީ އެކަން އަންގައި ކްރިމިނަލް ކޯޓަށް ސިޓީއެއް ފޮނުވައިފައެވެ. އެ ސިޓީގައި އޭނާ ވަނީ އޭނާ މި މައްސަލައިގައި ޖާމިނުވީ 4 މަހަށް ކަމަށް ބުނެ، އެ މުއްދަތުގެ ތެރޭގައި އަލީ ވަހީދު ކޯޓަށް ހާޒިރުވެވަޑައިގަތުމަށް ކޯޓުން އެއްވެސް އެންގުމެއް އަންގައިފައި ނުވާކަމަށް ބުނެފައެވެ.
އަލީ ވަހީދުގެ މައްޗަށް ކްރިމިނަލް ކޯޓުން ވަނީ އެކޯޓުގެ ހުރުމަތް ކެނޑި މައްސަލައިގައި ހުކުމެއް ވެސް ކޮށްފައެވެ. ފުލުހުން ބުނެފައިވަނީ އަލީ ވަހީދު ރާއްޖެ ގެނައުމަށް އިންޓަޕޯލާ އެކު މަސައްކަތް ކުރެވެމުން ދާކަމަށެވެ.
