ކޮމަންޑޫ ކިޔާ ދާއިރާއެއް އޮތްކަން ރައީސް ޞާލިހުއަށް އެނގިވަޑައިގަތީ އިންތިހާބު އޮންނާތީ: އައްސަދު

ށ.ކޮމަންޑޫ ކިޔާ، ތިން ރަށް ހިމެނޭ ދާއިރާއެއް އޮތްކަން، ރައީސް އިބްރާހީމް މުހައްމަދު ޞާލިހު މީގެ ކުރިން ދެނެވަޑައިނުގަންނަވާ ކަމަށް ރައްޔިތުންގެ މަޖިލީހުގެ ދާންދޫ ދާއިރާގެ ކުރީގެ މެމްބަރު އަހްމަދު އައްސަދު ވިދާޅުވެއްޖެއެވެ.

Ads by STELCO

އަންނަ ހޮނިހިރު ދުވަހު ބާއްވާ ރައްޔިތުންގެ މަޖިލީހުގެ ށ.ކޮމަންޑޫ ދާއިރާގެ ބައި-އިލެކްޝަނާ ދިމާކޮށް ސަރުކާރުން ކޮމަންޑޫ ދާއިރާގައި މަޝްރޫއުތަކެއް ހިންގަމުން އަންނައިރު، ސަންގު ޓީވީގެ "ޚަބަަރަށް ފަހު" ޕްރޮގްރާމްގައި މިކަމާ ގުޅޭގޮތުން ވާހަކަ ދައްކަވަމުން އައްސަދު ވިދާޅުވީ ސަރުކާރުން އަންނަނީ، އެކި ވަސީލަތްތައް ބޭނުންކޮށްގެން މި ބައި-އިލެކްޝަނަށް ކެމްޕެއިން ކުރަމުން ކަމަށެވެ.

އަދި އެކަމުން އެނގެނީ، މި ސަރުކާރުގެ ނާގާބިލުކަން ކަމުގައި ވެސް އޭނާ ވިދާޅުވިއެވެ.

"އިންތިހާބެއް ކައިރީވަ(ރައީސް ސޯލިހު)އަށް މި އެނގެނީ، ތިމަންނާ 2018ވަނަ އަހަރުގައި ވެސް އެ ރަށަށް އަރައި ދެ ކޮމަންޑޫ ވެސް ގުޅައިލާން ވައުދުވިކަން." ބަޖެޓުން ބޭރުން ހިންގާ ދެ ކޮމަންޑޫ ގުޅުވައިލުމުގެ މަޝްރޫއުއަށް ފާޑުވިދާޅުވެ، އައްސަދު ވިދާޅުވިއެވެ.

އައްސަދު ވިދާޅުވީ ސަރުކާރުން ކޮމަންޑޫ ދާއިރާއަށް ވެސް ކަންތައް ކޮށްދޭން ޖެހޭ ކަމަށް ގަބޫލު ކުރައްވާ ކަމަށެވެ. އެހެން ނަމަވެސް މިދަނޑިވަޅުގައި މަޝްރޫއުތައް ހިންގުމަކީ އިންތިހާބަށް ނުފޫޒު ފޯރުވުން ނޫން ކަމުގައި ނުވާނެ ކަމަށެވެ.

އަންނަ މަހުގެ 05ވަނަ ދުވަހު ބާއްވާ ބައި-އިލެކްޝަނާ ދިމާކޮށް، ސަރުކާރުން ކޮމަންޑޫ ދާއިރާއަށް ގިނަ ކަންތައްތަކެއް ކޮށްދެމުން އަންނަ ކަމަށް އިދިކޮޅު ފަރާތްތަކުން ތުހުމަތު ކުރާއިރު، އެމްޑީޕީގެ އިސް ބޭފުޅުން ވިދާޅުވަނީ، މި ސަރުކާރަކީ ހަމައެކަނި އިންތިހާބަށް ކަޑަ ޖަހާ ސަރުކާރެއް ނޫން ކަމަށާއި، ކޮމަންޑޫ ދާއިރާގައި ހިންގަނީ ކުރިން ވެސް ރާވައިފައިވާ މަޝްރޫއުތަކެއް ކަމަށެވެ.