"އިންޑިއާ އައުޓް" ހުއްޓުވަން ތައްޔާރުކުރާ ބިލު ގާނޫނު އަސާސީއާ ހިލާފު، ނުހުއްޓާނަން: އިދިކޮޅު
"އިންޑިއާ އައުޓް" ކެމްޕެއިނު ހުއްޓުވަން ވެރިކަން ކުރާ އެމްޑީޕީއިން ތައްޔާރުކުރަމުން އަންނަ ބިލަކީ ގާނޫނު އަސާސީއާ ހިލާފު ބިލެއް ކަމަށާއި، އެ ހަރަކާތް ނުހުއްޓާނެ ކަމަށް އިދިކޮޅު ޕްރޮގްރެސިވް ކޯލިޝަނުން މިއަދު ބުނެފިއެވެ.
ރާއްޖޭގައި ތިބި އިންޑިއާ ސިފައިން ބޭލުމަށް ގޮވައިލައި، އިދިކޮޅު ލީޑަރު އަބްދުﷲ ޔާމީން އަބްދުލްޤައްޔޫމް އިސްކޮށް ހުންނަވައިގެން ކުރިއަށް ގެންދާ "އިންޑިއާ އައުޓް" ކެމްޕެއިނު ހުއްޓުވުމަށް، ރައްޔިތުންގެ މަޖިލީހުގައި ސުޕަރ މެޖޯރިޓީއެއް އޮތް އެމްޑީޕީއިން ދަނީ ބިލެއް ޑްރާފްޓު ކުރަމުންނެވެ.
އެގޮތުން މިހާރު ތައްޔާރުކޮށްފައިވާ ފުރަތަމަ ޑްރާފްޓްގެ ބިލްގައިވާ ގޮތުގައި އެފަދަ ހަރަކާތްތައް ހިންގައި، އޭގައި ބައިވެރިވުމަކީ ޖިނާއީ ކުށެކެވެ.
އެކުށުގެ އަދަބެއްގެ ގޮތުގައި ގިނަ ވެގެން 20،000 ރުފިޔާއިން ޖޫރިމަނާ ކުރުމާއި، އެއް އަހަރަށް ވުރެ ދިގު ނޫން މުއްދަތަކަށް ގޭބަންދު ކުރުމުގެ އިތުރުން ހަ މަސް ދުވަހަށް ވުރެ ދިގު ނޫން މުއްދަތަކަށް ޖަލަށްލުން ހިމެނެއެވެ.
އެމްޑީޕީގެ އެބިލާ ގުޅޭގޮތުން އިދިކޮޅު ޕީޕީއެމް/ޕީއެންސީ ކޯލިޝަނުން ބުނީ އެފަދަ ބިލަކީ ގާނޫނު އަސާސީގެ ރޫހާ ހިލާފު ބިލެއް ކަމަށާއި އޭގެން ރަމްޒުކޮށްދެނީ، އިންޑިއާގެ ނުފޫޒު ރާއްޖޭގެ މައްޗަށް އޮތް މިންވަރު ކަމަށެވެ.
"ޖަލަށް ލިޔަސް މިކަން ނުހުއްޓުވޭނެ، ޖަލުގައިވެސް އިހުތިޖާޖު ކުރާނަން" ޕީއެންސީގެ ނައިބު ރައީސް އާދަމް ޝަރީފު އުމަރު ވިދާޅުވިއެވެ.
"އިންޑިއާ އައުޓް" ކެމްޕެއިނާ ގުޅޭގޮތުން އިދިކޮޅުގެ ފަރާތްތަކުން ބުނަމުންގެންދަނީ، އެއީ އަވަށްޓެރި އިންޑިއާއާއި ޖައްސައިލުމުގެ ގޮތުން ކުރިއަށްގެންދާ ހަރަކާތެއް ނޫން ކަމަށާއި އެއީ ޤައުމީ މަސައްކަތެއް ކަމަށެވެ.
