ޣިޔާސުއްދީން ސްކޫލްގައި އޮންލައިންކޮށް ކިޔަވައިދޭން ބަދަލުކޮށްފި
މާލޭގައި ވެސް މިދުވަސްކޮޅު ހަލުވިކަމާ އެކު ކޮވިޑް-19 ފެތުރެމުންދާތީ ޣިޔާސުއްދީން އިންޓަނޭޝަނަލް ސްކޫލްގެ ކިޔެވުން، އޮންލައިންކޮށް ކިޔަވައި ދިނުމަށް ބަދަލުކޮށްފިއެވެ.
ކޮވިޑްގެ ހާލަތު ރާއްޖޭގައި ގޯސްވެފައިވީ ނަމަވެސް ސަރުކާރު ސްކޫލްތަކާއި އަމިއްލަ ގިނަ ސްކޫލުތަކުން ވެސް ކިޔަވައި ދެމުންދަނީ ބައެއް ދުވަސް ދުވަހު ދަރިވަރުން ސްކޫލަށް ހާޒިރު ކޮށްގެންނެވެ.
ނަމަވެސް މި ހާލަތުގައި ސްކޫލަށް ހާޒިރުކޮށްގެން ކިޔަވައި ދިނުމަކީ އެންމެ ރައްކާތެރި ގޮތް ކަމުގައި ނުވާނެތީ، ޣިޔާސުއްދީން ސްކޫލުން ވަނީ އެ ސްކޫލްގެ ކިޔެވުން އޮންލައިންކޮށް ކިޔަވައިދޭ ގޮތަށް ބަދަލު ކޮށްފައެވެ.
ނަމަވެސް ޣިޔާސުއްދީން ސްކޫލުން ވެސް އޮންލައިންކޮށް ކިޔަވައި ދޭނީ ގްރޭޑް 9-1ގެ ދަރިވަރުންނަށް ކަމަށް އެ ސްކޫލުގެ އޮފިޝަލަކު މިއަދު ވިދާޅުވެފައިވެއެވެ. ގްރޭޑް 10ގެ ދަރިވަރުން ސްކޫލަށް ހާޒިރު ކޮށްގެން ކިޔަވައިދޭ ނަމަވެސް، އެ ކުދިންނަށް ކިޔަވައިދޭ ވަގުތު މަދުވާނެކަން ވެސް އޮފިޝަލު ފާހަގަ ކުރެއްވިއެވެ.
އޮފިޝަލު އިތުރަށް ވިދާޅުވީ، އޮންލައިންކޮށް ކިޔެވުން ބަދަލު ކުރީ، މި ހާލަތުގައި ދަރިވަރުން ސްކޫލަށް ނުގެންނަން މިނިސްޓްރީ އޮފް އެޑިއުކޭޝަނުން އެދިގެން ކަމަށެވެ.
ޣިޔާސުއްދީންގައި އޮންލައިންކޮށް ކިޔަވައިދޭން ފަށަނީ މި ހަފްތާއިން ފެށިގެންނެވެ.
