ޣިޔާސުއްދީންގެ ނުވަޔަކުން ދަށުގެ ދަރިވަރުންނަށް ސްކޫލު ބަންދުކޮށް އޮންލައިންކޮށް ކިޔަވައިދޭން ފަށައިފި

ޣިޔާސުއްދީން އިންޓަނޭޝަނަލް ސްކޫލުގެ ގްރޭޑު 10 ފިޔަވައި އެހެން ހުރިހާ ގްރޭޑެއްގެ ދަރިވަރުން ސްކޫލަށް ގެނައުން ހުއްޓާލައި އޮންލައިންކޮށް ކިޔަވައިދޭން މިއަދު ފަށައިފިއެވެ.

Ads by MWSC

އޮންލައިންކޮށް ކިޔަވައިދޭން މިއަދު ފަށާފައި ވަނީ ކޮވިޑް-19ގެ ކޭސްތައް އިތުރުވަމުން ދިޔުމާ ގުޅިގެންނެވެ. އެ ފިޔަވަޅު އެޅީ ބައެއް ސްކޫލްތަކުގެ ޓީޗަރުންނާއި ދަރިވަރުން ވެސް ޑައިރެކްޓް ކޮންޓެކުޓުންނަށް ވެ، ކަރަންޓީނަށް ދާން ޖެހޭކަމުގެ ރިޕޯޓްތައް އިތުރުވުމާ ގުޅިގެން ކަމަށް އެ ސްކޫލުގެ ޕްރިންސިޕަލް އަލީ މުސްތަފާ ވަނީ ވިދާޅުވެފައެވެ.

"ދަރިވަރުންނާއި މުވައްޒަފުންގެ ސަލާމަތާއި ރައްކާތެރިކަމަކީ އެންމެ މުހިއްމު ކަންތައް. އެއީ ފަރުވާކުޑަ ކޮށްލެވޭނެ ކަމެއް ނޫން،" ޕްރިންސިޕަލް އަލީ މުސްތަފާ ސޮއި ކުރައްވާ ބެލެނިވެރިންނަށް ފޮނުވި ސިޓީގައިވެއެވެ.

ކޮވިޑްގެ ކޭސްތައް އަނެއްކާވެސް އިތުރުވާން ފަށާފައިވާއިރު، ސްކޫލްތަކުން ވެސް ދަނީ ދަރިވަރުންނާއި ޓީޗަރުން ކޮވިޑަށް ފައްސި ވަމުންނެވެ. ރާއްޖެއިން މިބައްޔަށް މިހާރު ޖުމްލަ 15،390 މީހުން ފައްސި ވެފައިވެއެވެ. ރާއްޖެއިން މިހާރު ކޮވިޑް ބަލިން ފަސޭހަ ވެފައި ވަނީ ޖުމްލަ 13،966 މީހުންނެވެ. އަދި މިބަލީގައި ރާއްޖެއިން ނިޔާވި މީހުންގެ ޖުމްލަ އަދަދު މިހާރު 51 ވަނީ އަރާފައެވެ. ހޮސްޕިޓަލުތަކުގައި މިހާރު ފަރުވާ ހޯދަމުން ދަނީ 101 މީހުންނެވެ.

ރާއްޖޭގައި ބަލި ފެތުރުން މިހާރު ބޮޑުތަނުން އަނެއްކާ ވެސް މިވަނީ އިތުރުވާން ފަށާފައެވެ. ކޮވިޑް-19 ރައްކާތެރިވުމުގެ ގޮތުން އަޅަންޖެހޭ ފިޔަވަޅުތަކަށް ބައެއް ފަރާތްތަކުން ފަރުވާ ކުޑަކުރަމުން އަންނަކަން އެޗްޕީއޭއިން ފާހަގަ ކުރެއެވެ.