ޣިޔާސުއްދީނަށް ދަތުރުފަތުރުގެ ޚިދުމަތްދޭނެ ބަޔަކު ހޯދަނީ
ޣިޔާސުއްދީން ސްކޫލުގެ ދަރިވަރުންނާއި މުވައްޒަފުންނަށް މާލެއާއި ހުޅުމާލޭއާ ދެމެދު ދަތުރުތައް ކޮށްދޭނެ ބަޔަކު ހޯދަން އިއުލާންކޮށްފިއެވެ.
މާލެއާއި ހުޅުމާލޭއާ ދެމެދު ދަތުރު ކޮށްދިނުމަށް ޝައުޤުވެރިވާ ފަރާތްތަކުން އަންނަ އާދިއްތަ ދުވަހުގެ ކުރިން މައުލޫމާތު ސާފުކުރުމަށް ފަހު، މި މަހުގެ 31ގެ ކުރިން ޕްރޮޕޯސަލް ހުށަހެޅުމަށް އެ ސްކޫލުން ވަނީ އިއުލާނު ކޮށްފައެވެ.
މިކަމާ ގުޅޭގޮތުން ޣިޔާސުއްދީން ސްކޫލުގެ ޕްރިންސިޕަލު އަލީ މުސްތަފާ ވިދާޅުވީ ޣިޔާސުއްދީން ސްކޫލުގެ 34 މުވައްޒަފުންނާއި 80އަށް ވުރެ ގިނަ ދަރިވަރުން މިވަގުތު ހުޅުމާލޭގައި ދިރިއުޅެމުންދާ ކަމަށެވެ. އޭގެ ތެރެއިން އެއްބަޔަކު މިހާރު ދަތުރު ކުރަމުން ދަނީ އެމްޓީސީސީގެ ބަހުގައި ކަމަށާއި އެހެން މީހުން ދަތުރު ކުރަނީ ސައިކަލާއި ކާރުގައިކަން ވެސް އަލީ މުސްތަފާ ފާހަގަ ކުރެއްވިއެވެ.
"ސްކޫލާ އެންމެ ކައިރި ބަސް ސްޓޮޕަށް މަޑުކޮށްގެން ވެސް ވަގުތު ކޮޅެއް އެބަ ހޭދަވާ ހިނގައިފައި ސްކޫލަށް އަންނަން. އެ ހުރިހާ ކަމަކަށް ބަލައިފައި، މި ފަހުން ސްކޫލްގެ (މައި)މެނޭޖްމަންޓުން ރާއްޖެ ވަޑައިގެން، ކުރެއްވި މަޝްވަރާތަކުގައި ނިންމެވީ ދަރިވަރުންނާއި މުވައްޒަފުންނަށް ހާއްސަ ބަހެއް ހަމަޖެއްސުމަށް،" ޣިޔާސުއްދީން ސްކޫލުގެ ޕްރިންސިޕަލު ވިދާޅުވިއެވެ.
އަލީ މުސްތަފާ ވިދާޅުވީ، ސައިކަލުގައި ހެލްމެޓު އަޅައިގެން ވެސް ތާރު މަގުތަކުގައި ގިނަ ދަތުރުތައް ކުރުމަކީ ރައްކާތެރި ކަމެއް ނޫން ކަމަށެވެ.
