މާލެ ރައްޔިތުންނަށް 5،000 ގޯތި ދޫކުރަނީ
މާލޭގެ ރަށްވެހިންނަށް ގޯތި ދިނުމަށް ނިންމައިފައިވާ ނިންމުމަށް އަމަލީ ސިފަ ގެނައުމުގެ ގޮތުން، ހުޅުމާލެއާއި، ގުޅީ ފަޅުންނާއި، ގިރާވަރު ފަޅުން ގޯތި ދޫކުރުމަށް ނިންމައިފައިވާކަން ރައީސް އިބުރާހިމް މުހައްމަދު ސާލިޙް ހާމަ ކުރައްވައިފިއެވެ.
މަޖިލީސް އައު ދައުރަށް ހުޅުވުމަށް މިއަދު ބޭއްވި ޖަލްސާގައި އިއްވެވި ރިޔާސީ ބަޔާނުގައި ރައީސް ޞާލިޙް ވިދާޅުވީ މާލޭގެ ރައްޔިތުންނަށް ކުރިމަތިވެފައިވާ ބޯހިޔާވަހިކަމުގެ މައްސަލަ ހައްލު ކުރުމުގެ ގޮތުން، ހުޅުމާލެއިން މަދުވެގެން 1،000 ގޯއްޗާއި، ގުޅިފަޅުން މަދުވެގެން 2،000 ގޯތި ދޭން ނިންމައިފައިވާ ކަމަށެވެ.
މީގެ އިތުރުން ގިރާވަރު ފަޅު ހިއްކައި އެ ބިމުން ވެސް މަދުވެގެން 2،000 ގޯތި މާލޭގެ ރަށްވެހިންނަށް ދޫކުރައްވާނެކަމަށް ވެސް ރައިސް ސާލިހު ވިދާޅުވިއެވެ.
ރައީސް ވިދާޅުވީ ދިވެހި ދައުލަތުގެ ހިޔާވަހިކަމުގެ ދަށުގައިވާ ހުރިހާ ވަސީލަތެއްގެ ހިޔާވަހިކަން ރައްޔިތުންނަށް ލިބެންޖެހޭ ކަމަށާއި ބޭނުން ވަނީ އެކުގައި އެއް އަމާޒެއްގައި ތިބެ އެ މަންޒިލަށް ވާސިލުވުން ކަމަށެވެ. އަދި ރިޔާސީ ދައުރު ނިންމަވައިލައްވާނީ އެންމެ ބޭނުން ޖެހިފައިވާ ރައްޔިތުންނަށް ކަންތައްތައް ފަހިކޮށްދީފައި ކަމަށް ވެސް ރައީސް ވިދާޅުވިއެވެ.
“ރިޔާސީ ދައުރު ނިންމަވައިލާނީ އެންމެ ބޭނުން ޖެހިފައިވާ މާލޭގެ ރައްޔިތުންނަށް އިން ވަކިކޮށް، ރޯނުދަމައި އަދި ބިން ކަނޑައި، ގޯތީގެ ފަތް ދިނުމަށް ފަހު. ދިވެހި ދައުލަތުގެ ހިޔާވަހިކަމުގެ ދަށުގައިވާ ހުރިހާ ވަސީލަތެއްގެ ހިޔާވަހިކަން ރައްޔިތުންނަށް ލިބެންޖެހޭ. ބޭނުން ވަނީ އެކުގައި އެއް އަމާޒެއްގައި ތިބެ އެ މަންޒިލަށް ވާޞިލްވުން” ރައީސް ވިދާޅުވިއެވެ.
ރައީސް ވިދާޅުވީ ސަރުކާރުން އެޅި ފިޔަވަޅުތަކާއި އޭގެ ހެޔޮ ނަތީޖާ އަހަރެއްހައި ދުވަސް ނުވަނީސް ވަނީ ފެންނަން ފަށައިފައިވާ ކަމަށެވެ. އަދި މިއަހަރު ރާއްޖޭގެ އުފެއްދުންތެރިކަން ކުރިއަރާނެކަމަށާއި، އެ އަދަދުތައް ހުންނާނީ މާލީ އިދާރާތަކުން ލަފާކުރި މިންވަރަށް ވުރެ ވެސް މަތީގައިކަމަށް ރައީސް ވިދާޅުވިއެވެ.
