ދިވެހިން ލަންކާއަށް ދަތުރު ކުރުމުގައި އަޅައިފައިވާ ފިޔަވަޅުތަކަށް ބަދަލުތަކެއް
ދިވެހިން ސްރީލަންކާއަށް ދަތުރު ކުރުމުގައި އަޅައިފައިވާ ފިޔަވަޅުތަކަށް ބަދަލުތަކެއް ގެނެސްފިއެވެ.
ފޮރިން މިނިސްޓްރީން މިއަދު ބުނީ، ސައްޙަ ވިސާއެއް ނެތި އަދި ޓޫރިސްޓް ރޫޓުން ނޫން ގޮތަކަށް ސްރީލަންކާއަށް ދަތުރު ކުރެވޭނީ އެގައުމުގެ އިމިގްރޭޝަނުން ދަތުރުކުރުމުގެ ހުއްދައެއް (ލޭންޑިން ޕާރމިޓެއް) ނަގައިގެން ކަމަށާއި ސްރީލަންކާއަށް ދަތުރުކުރުމުގައި ޓޫރިސްޓް ރޫޓު އިޚްތިޔާރުކުރާ ނަމަ ވެބްސައިޓުގައި ދީފައިވާ އިރުޝާދުތަކާ އެއްގޮތަށް ETA (އިލެކްޓްރޯނިކް ޓްރެވަލް އޮތޮރައިޒޭޝަން) ހޯދައިގެން ދަތުރު ކުރެވޭނެ ކަމަށެވެ.
އަދި ސްރީލަންކާއަށް ދަތުރުކުރަނީ ދިގު މުއްދަތަކަށް ރެސިޑެންސް ވިސާ ނަގައިގެން ތިބުމަށްކަމަށްވާ ނަމަ "އެންޓްރީ ވިސާ"އެއް ނަގައިގެން ދަތުރުކުރެވޭނެ ކަމަށާއި ސްރީލަންކާއަށް ދަތުރުކުރާ ހުރިހާ ފަރާތްތަކުން ވެސް، ދަތުރުކުރުމުގެ ކުރިން 72 ގަޑިއިރުގެ ތެރޭ ހައްދައިފައިވާ ކޮވިޑް-19 ނައްސި ޕީސީއާރު ނަތީޖާއެއް ގެންދަންޖެހޭނެ ކަމަށެވެ. ކޮވިޑް ވެކްސިން ޖައްސަވައިފައިވާ ފަރާތްތަކުން ވެކްސިނޭޝަން ކާޑުގެ އަޞްލު ގެންދަން ޖެހޭނެއެވެ.
މީގެ އިތުރުން މިނިސްޓްރީން ބުނީ ސްރީލަންކާއަށް ދަތުރުކުރެވޭނީ ޔޫ.އެސް ޑޮލަރުގެ 50،000ގެ ޓްރެވަލް އިންޝުއަރެންސްއަކާ އެކު ކަމަށާއި މި އިންޝުއަރެންސްގައި ކޮވިޑަށް ފައްސިވެ ހޮސްޕިޓަލުގައި ފަރުވާ ކުރަން ޖެހިއްޖެ ކަމުގައިވާ ނަމަ އެކަން ވެސް ކަވަރ ކުރާނެއެވެ. އަދި މިއިންޝުއަރެންސުން ސްރީލަންކާގައި މަޑުކުރާ މުއްދަތުގެ އިތުރުން 14 ދުވަސް އިތުރަށް ހިމަނަން ވާނެ ކަމަށެވެ.
ސްރީލަންކާ އަށް ދަތުރުކުރާ ހުރިހާ ފަރާތްތަކުން ވެސް ފުރުމުގެ ކުރިން މިނިސްޓްރީ އޮފް ހެލްތް ސްރީލަންކާގެ "ހެލްތް ޑިކްލަރޭޝަން ފޯމް" ފުރިހަމަކުރުމަށް ފަހު ކިޔު.އާރު ކޯޑު ހޯދަން ޖެހޭނެ ކަމަށާއި ކިޔު.އާރް ކޯޑު އެއާރޕޯޓުން ބޭނުންވެއްޖެ ހާލަތެއްގައި ދައްކަން ޖެހޭނެކަމަށް ވެސް އެ މިނިސްޓްރީން ބުނެއެވެ.
