ސަރުކާރުގެ ނުފޫޒާ އެކު ވެސް، ކުރީ ފަހަރަށް ވުރެ ގިނަ ވޯޓު ލިބުނު: އާދަމް ޝަރީފް

ށ.ކޮމަންޑޫ ދާއިރާގެ ބައި-އިލެކްޝަނުން ޕީޕީއެމް މިފަހަރު ބަލިވިޔަސް، 2019ވަނަ އަހަރުގެ ރައްޔިތުންގެ މަޖިލީހުގެ އިންތިހާބަށްވުރެ ގިނަ ވޯޓު ލިބުނުކަން ޕީއެންސީގެ ނައިބު ރައީސް އާދަމް ޝަރީފު އުމަރު ފާހަގަ ކުރައްވައިފިއެވެ.

Ads by Sosun Fihaara

އިއްޔެ ބޭއްވި ށ. ކޮމަންޑޫ ދާއިރާގެ ފޯރިގަދަ ވަގުތީ ނަތީޖާއިން ދައްކާ ގޮތުގައި، އެމްޑީޕީގެ ކެނޑިޑޭޓު މުހައްމަދު ރާޝިދަށް ލިބިފައި ވަނީ، ޖުމްލަ 1401 ވޯޓެވެ.

ރާޝިދުއާއި އެންމެ ގާތުން ވާދަކުރި ޕީޕީއެމްގެ ކެނޑިޑޭޓް މޫސާ ފަތުހީ އާދަމަށް ލިބިފައި ވަނީ ޖުމްލަ 1161 ވޯޓެވެ.

ރާޝިދާއި ފަތުހީގެ ވޯޓުގައި ކުޑަ ފަރަގެއް ހުރިއިރު، އާދަމް ޝަރީފު މިކަން ސިފަ ކުރެއްވީ ކާމިޔާބީއެއްގެ ގޮތުގައެވެ. އޭނާ ވިދާޅުވީ މި ބައި-އިލެކްޝަނަށް ސަރުކާރުން އިންތިހާއަށް ނުފޫޒު ފޯރުވި ކަމަށެވެ.

"ކޮމަންޑޫ ދާއިރާގައި ބޭއްވި ބައި-އިލެކްޝަނަކީ ސަރުކާރުގެ ނުފޫޒާއި، ވަޒީފާގެ ބިރު ދެއްކުން އިންތިހާއަށް ބޮޑު އިންތިހާބެއް." އޭނާ ވިދާޅުވިއެވެ.

އާދަމް ޝަރީފު ވަނީ ޕީޕީއެމްގެ ސަޕޯޓަރުންނަށް ހިތްވަރު ދެއްވައި، ސަރުކާރަށް ޖެހުނީ "އަނދަގޮނޑި" ކަމަށް ވިދާޅުވެފައެވެ.