"އިންޑިއާ އައުޓް" ބިލް މަޖިލީހަށް ވައްދަން އެމްޑީޕީގެ ޕީޖީން ފާސްކޮށްފި

ރާއްޖެއިން އިންޑިއާ ސިފައިން ބޭލުމަށް ގޮވައިލައި އިދިކޮޅު ފަރާތްތަކުން އިސްނަގައިގެން ކުރިއަށް ގެންދާ "އިންޑިއާ އައުޓް" ކެމްޕެއިން ހަރަކާތް ހުއްޓުވުމަށް ޑްރާފްޓްކުރި ބިލު މަޖިލީހަށް ވައްދަން އެމްޑީޕީގެ ޕާލިމަންޓްރީ ގްރޫޕުން މިއަދު ފާސްކޮށްފިއެވެ.

Ads by STELCO

މިދިޔަ މަހުގެ ފަހުކޮޅު އެމްޑީޕީގެ ޕީޖީ ގްރޫޕުން ވަނީ "ދިވެހިރާއްޖެއިން ބޭރު ގައުމުތަކާ އެކު ގާއިމުކޮށްފައިވާ ހާރިޖީ ގުޅުންތަކަށް ނޭދެވޭ އަސަކުރާނެ ފަދަ އަމަލުތައް ހުއްޓުވުމުގެ ބިލު"ގެ ނަމުގައި ޑްރާފްޓެއް ތައްޔާރުކޮށްފައެވެ. އަދި އެ ބިލާ މެދު ގޮތެއް ނިންމުމަށް މިއަދު ހެނދުނު އެމްޑީޕީގެ ޕީޖީ ގުރޫޕްގެ ބައްދަލުވުމެއް ވަނީ ބާއްވައިފައެވެ.

އެގޮތުން މިއަދު ބޭއްވި އެ ބައްދަލުވުމުގައި އެމްޑީޕީގެ ޕީޖީ ގްރޫޕުން ފާސްކުރީ ކުރިން ވެސް ޑްރާފްޓްކޮށްފައިވާ ގޮތަށް މަޖިލީހަށް އެ ބިލު ވެއްދުމަށެވެ. އެކަން އެގޮތަށް ފާސް ކުރިކަން، އެމްޑީޕީގެ ދެ މަޖިލިސް މެންބަރަކު ވަނީ އޮންލައިން ނޫސް "ދައުރު"އަށް ކަށަވަރު ވެސް ކޮށްދީފައެވެ.

"އިންޑިއާ އައުޓް" ކެމްޕެއިން ހުއްޓުމަށް އެމްޑިޕީގެ ޕީޖީއިން ހުށަހެޅި ޑްރާފްޓްގައި ހިމެނޭ މުހިންމު ބައިތައް:

•  ރާއްޖެ ރަމްޒުވާ ގޮތަށް ނުވަތަ ދިވެހި ރައްޔިތުންގެ ނަމުގައި، ވަކި ބަޔަކު ނުވަތަ ސިޔާސީ ޕާޓީއަކުން ގައުމަކާ ނުވަތަ އެ ގައުމެއްގެ ސަރުކާރާ ދެކޮޅަށް މުޒާހަރާ ކުރުމާއި ކެމްޕެއިން ކުރުމާއި ސިޔާސީ އެއްވެސް ހަރަކާތެއް ހިންގުމަކީ ކުށެއް
• ގައުމެއްގެ އަޅުވެތިކަމުގެ ދަށުގައި ނުވަތަ މިލިޓަރީ ނުވަތަ ސިޔާސީ ނުވަތަ އިގްތިސާދީ ބާރުވެރިކަމުގެ ދަށުގައި ރާއްޖޭގެ ސިޔާދަތާއި އިސްތިގުލާލުވާކަން ދެއްކުމުގެ ގޮތުން ގައުމަކާ ދެކޮޅަށް މުޒާހަރާކޮށް، ކެމްޕެއިންކޮށް، އެ ނޫން ވެސް ސިޔާސީ އެއްވެސް ހަރަކާތެއް ހިންގުމަކީ ކުށެއް

ދެވޭނެ އަދަބުތައް:

• ގިނަވެގެން 20،000ރ.އިން ޖޫރިމަނާކުރުން
• އެއް އަހަރަށް ވުރެ ދިގު ނޫން މުއްދަތަކަށް ގޭބަންދުކުރުން
• ހަ މަސްދުވަހަށް ވުރެ ދިގު ނޫން މުއްދަތަކަށް ޖަލަށްލުން