އޭސީސީ ނެތުމުން ކަންބޮޑުވޭ، އިންތިޚާބުގެ ގާނޫނަށް ބަދަލުގެންނަން ހުށަހަޅާނަން: އެމްއެންޕީ
ކޮރަޕްޝަނާ ދެކޮޅަށް މަސައްކަތްކުރާ މިނިވަން މުއައްސަސާ، އެންޓި ކޮރަޕްޝަން ކޮމިޝަން (އޭސީސީ) ގާނޫނީ ހުސްކަމެއްގެ ތެރޭގައި އޮންނަތާ ދުވަސްތަކެއް ވެފައިވާތީ އެކަމާ ގުޅިގެން މޯލްޑިވްސް ނެޝަނަލް ޕާޓީ، އެމްއެންޕީން ކަންބޮޑުވުން ފާޅުކޮށްފިއެވެ.
ބުރާސްފަތި ދުވަހު އެމްއެންޕީގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި އެޕާޓީގެ ރައީސް އަދި ރައްޔިތުންގެ މަޖިލީހުގެ ދަނގެތީ ދާއިރާގެ މެމްބަރު މުހައްމަދު ނާޒިމް ވަނީ ކޮމަންޑޫ ދާއިރާގެ ބައި އިލެކްޝަން ނިމިގެން ދިޔައިރު އޭސީސީގައި މެމްބަރަކު ނެތުމުން ކަންބޮޑުވުން ފާޅުކޮށްފައެވެ. އަދި ވިދާޅުވީ އިންތިހާބާ ގުޅިގެން ވަޒީފާގެ ބިރު ދެއްކުމާއި ވަޒީފާއިން ވަކިކުރުމުގެ ސަގާފަތް ރާއްޖޭގައި އޮތްއިރު އޭސީސީ ގާނޫނީ ހުސްކަމެއްގެ ތެރޭގައި އޮތުމުން ކަންބޮޑުވުން އިތުރުވާ ކަމަށެވެ.
އެހެންކަމުން ނާޒިމް ވަނީ ރައީސް އިބްރާހިމް މުހައްމަދު ޞާލިހުގެ ފަރާތުން އޭސީސީއަށް އައްޔަނުކުރަން ބޭނުންވެވަޑައިގަންނަވާ ނަންތައް ވީ އެންމެ އަވަހަކަށް މަޖިލީހަށް ފޮނުވުމަށް އެމްއެންޕީން އެދޭކަމަށް ވިދާޅުވެފައެވެ.
"ސަރުކާރުގެ މެޖޯރިޓީ (މަޖިލީހުގައި) އޮންނައިރުގައި މިކަން ނުކުރެވި ދިޔުމަކީ އަޅުގަނޑުމެން ހިތާމަކުރަން ޖެހޭ ކަމެއް"
- މެމްބަރު މުހައްމަދު ނާޒިމް
މީގެ އިތުރުން ނާޒިމް ވަނީ އިންތިހާބުގެ ގާނޫނަށް ބަދަލު ގެންނަން އެމްއެންޕީން ހުށަހަޅާނެކަން އިއުލާން ކުރައްވައިފައެވެ. އެހެން ނަމަވެސް އެކަމުގެ ތަފްޞީލެއް ނާޒިމް ނުދެއްވައެވެ.
ކޮމަންޑޫ ދާއިރާގެ ބައި އިލެކްޝަންގައި ވާދަކުރެއްވި އެމްއެންޕީގެ ކެނޑިޑޭޓަށް އެގާރަ އިންސައްތަ ލިބުމާ ގުޅިގެން ސުވާލު ދެންނެވުމުން ނާޒިމް ވިދާޅުވީ އިންތިހާބުގެ ނަތީޖާއާ މެދު އެއްވެސް ވަރެއްގެ މާޔޫސްކަމެއް ނެތް ކަމަށެވެ. އަދި ރާއްޖޭގެ އެހެން ހުރިހާ ކުދި ޕާޓީތައް ބޮޑެތި ސިޔާސީ ޕާޓީތަކާ ގުޅިގެން މަސައްކަތް ކުރިއިރު އެމްއެންޕީން ގިނިކަންޏާ ވާދަކޮށް ހޯދުނީ ބޮޑު ކާމިޔާބީއެއްކަމަށް ނާޒިމް ވިދާޅުވިއެވެ.
އެމްއެންޕީން މިއަދު ބޭއްވި ނޫސްވެރިންގެ ބައްދަލުވުމުގެ ތެރެއިން
އެމްއެންޕީގެ ރޫހު މިހާރު އޮތީ ކުރިއަށްވުރެ ފޯރީގައި ކަމަށާއި ރައްޔިތުންނާއި ގާތުން މަސައްކަތްކޮށް ރައްޔިތުންގެ ތާއީދު ހޯދުމަށް ޓަކައި ކުރިއަށް އޮތް ތަނުގައި ގިނަ މަސައްކަތްތަކެއް ކުރަމުންދާނެކަމަށް ނާޒިމް ވަނީ ވިދާޅުވެފައެވެ.
"އަޅުގަނޑުމެން މި ހިސާބުން އިތުރު ހިތްވަރަކާ އެކީގައި އަނެއްކާ ވެސް ﷲ އިރާދަފުޅާ އެކީގައި މަސައްކަތް މިފެށީ. އަޅުގަނޑުމެން މަސައްކަތް ކުރާނީ އަނެއްކާ ވެސް ޕާޓީއަށް މީހުން އިތުރުކުރުމަށް"
- މެމްބަރު މުހައްމަދު ނާޒިމް
ނާޒިމް ވިދާޅުވީ އެމްއެންޕީގެ އަމާޒަކީ މިހާރު އެ ޕާޓީއަށް ސޮއިކޮށްފައިވާ މެމްބަރުންގެ އަދަދު މި ހިނގާ 2022ވަނަ އަހަރު ނިމޭއިރު ބޮޑުތަނުން އިތުރުކުރުން ކަމަށެވެ.
