އެމްޑީޕީގެ އިސްމަގާމުތަކަށް ކުރިމަތިލާން ހުޅުވައިލައިފި
ޗެއާޕާސަންގެ މަގާމާ އެކު އެމްޑީޕީގެ އިސް މަގާމުތަކަށް ކުރިމަތިލުމުގެ ފުރުސަތު އެ ޕާޓީން ހުޅުވައިލައިފިއެވެ.
އެމްޑީޕީގެ ޗެއާޕާސަންގެ މަގާމާއި އެހެން ބައެއް އިތުރު މަގާމުތަކުގެ ދައުރު ހަމަވެފައި ވަނީ މިއަދުއެވެ.
އެ ޕާޓީން ކުރި އިއުލާނުގައި ބުނީ ޗެއާޕާސަންގެ މަގާމުގެ އިތުރުން އަންހެނުންގެ ރޫހާއި ޒުވާނުންގެ ހިތްވަރުގެ ރައީސް އަދި ނައިބު ރައީސް ކަމަށް ކުރިމަތިލުމަށް ޝައުގުވެރިވާ ފަރާތްތަކަށް އަންނަ ހޮނިހިރު ދުވަހާ ހަމައަށް އެ މަގާމުތަކަށް ކުރިމަތިލެވޭނެ ކަމަށެވެ. އެމަގާމުތަކަށް މީހުން އައްޔަނުކުރަން ބާއްވާ އިންތިހާބު އަންނަ އޭޕްރީލް މަހުގެ 16ގައި ބާއްވަން އެމްޑީޕީގެ ގައުމީ މަޖިލީހުން ވަނީ ނިންމައިފައެވެ.
ސަރުކާރު ކޯލިޝަންގެ މައި ޕާޓީގެ ޗެއާޕާސަންގެ މަގާމަށް އިކޮނޮމިކް މިނިސްޓަރު ފައްޔާޒް އިސްމާއިލް އަދި އެސްޓީއޯގެ މެނޭޖިން ޑިރެކްޓަރު ހުސެއިން އަމްރު ކުރިމަތިލައްވަން ވަނީ ނިންމައިފައެވެ. ޕާޓީގެ ބައެއް ސޯޝަލް މީޑީއާ އެކްޓިވިސްޓުން ވަނީ މަޖިލިސް މެމްބަރު އިމްތިޔާޒު ފަހުމީ އެ މަގާމަށް ގެންނަން ކެމްޕެއިނެއް ފަށައިފައެވެ.
މިދިޔަ ބުރާސްފަތި ދުވަހުގެރޭ ބޭއްވި ގައުމީ މަޖިލީހުގެ ޖަލްސާގައި އެޕާޓީން ވަނީ އަންނަ އޯގަސްޓު މަހުގެ 4ގައި ކޮންގްރެސްއެއް ބާއްވަން ނިންމައިފައެވެ.
އިންތިހާބުތަކުގެ ގާނޫނުގެ އިތުރުން ޖުޑިޝަލް ސާވިސް ކޮމިޝަންގެ ގާނޫނަށް ވެސް ބޮޑެތި ބަދަލުތަކެއް ގެންނަން ކޮންގްރެސްގައި ފާސްކުރަން ޕާޓީގެ ރައީސް މުހައްމަދު ނަޝީދު ވަނީ އަމާޒު ހިފައިފައެވެ. އެގޮތުން 30 އިންސައްތަ އަޣްލަބިއްޔަތު ލިބިގެން ވެރިކަމަށް އިންތިހާބުވާގޮތަށް ގާނޫނު ބަދަލުކުރަން ވެސް ރައީސް ނަޝީދު ވަނީ ހުށަހަޅުއްވައިފައެވެ.
