ޖޭއެސްސީ އިސްލާހުކުރަން އިދިކޮޅުން ހުށަހެޅި ބިލް އެޖެންޑާކޮށްފި
- ޖޭއެސްސީ އިސްލާހުކުރުމުގެ ބިލު ހުށަހެޅުއްވީ މަހިބަދޫ ދާއިރާގެ މެމްބަރު
- މިއީ ޖޭއެސްސީ އިސްލާހުކުރަން އިދިކޮޅުން ހުށަހެޅި ދެވަނަ ބިލު
- ޖޭއެސްސީ އިސްލާހުކުރުމުގެ މަސައްކަތް ސަރުކާރުންވެސް ދަނީ ކުރަމުން
ޖުޑިޝަލް ސާވިސް ކޮމިޝަން، ޖޭއެސްސީ އެކުލެވިގެންވާ ގޮތް ބަދަލުކުރަން އިދިކޮޅު ޕީޕީއެމްއިން ރައްޔިތުންގެ މަޖިލީހަށް ހުށަހެޅި ބިލު ހޯމަ ދުވަހުގެ ޖަލްސާއަށް އެޖެންޑާކޮށްފިއެވެ.
ޖޭއެސްސީގެ މެމްބަރުންގެ ގޮތުގައި ސިޔާސީ ބޭފުޅުން ނުހިމެނޭގޮތަށް އޮނިގަނޑު އިސްލާހުކުރަން ބިލެއް ހުށަހެޅީ މަހިބަދޫ ދާއިރާގެ މެމްބަރު އަހުމަދު ޠޯރިގެވެ. މިއީ ޖޭއެސްސީ އިސްލާހުކުރަން ޠޯރިގު ހުށަހެޅި ދެވަނަ ބިލެވެ. ޖޭއެސްސީގެ ބިލު އޭނާ އެންމެ ފުރަތަމަ ހުށަހެޅުއްވީ 2020ވަނަ އަހަރުއެވެ. އެބިލު މަޖިލިހަށް ބަލައިނުގަނެ ބޭރުކޮށްލީއެވެ.
އޭގެ ފަހުން 2021ވަނަ އަހަރުގެ ސެޕްޓެމްބަރު މަހުގެ ތެރޭގައި އަނެއްކާ ވެސް ޖޭއެސްސީ އެކުލެވިގެންވާ ގޮތް އިސްލާހުކުރަން ޠޯރިގު ބިލެއް ހުށަހެޅުއްވިއެވެ. އޭނާ އެ ބިލު ހުށަހެޅުއްވިއިރު ސަރުކާރުން ވެސް ދަނީ ޖޭއެސްސީ އިސްލާހުކުރަން ބޭނުންވާކަމަށް ބުނަމުންނެވެ. އެގޮތުން ގެންނަން ބޭނުންވާ އިސްލާހުތައް އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަނީ އެމްޑީޕީގެ ގައުމީ މަޖިލީހަށް ވެސް ހުށަހަޅުއްވައިފައެވެ.
ރައީސް އިބްރާހިމް މުހައްމަދު ޞާލިހުގެ ވެރިކަން ނިމުމުގެ ކުރިން ޖޭއެސްސީ އިސްލާހު ކުރާނެކަމަށް ނިމިގެންދިޔަ 2021ވަނަ އަހަރުގެ ތެރޭގައި ރައީސް އޮފީހުން ވަނީ ވިދާޅުވެފައެވެ. އަދި އެކަން ކުރަން ލަސްވެފައިވާކަމަށް ގަބޫލުކުރައްވާކަމަށް ވެސް ރައީސް އޮފީހުން އޭރު މައުލޫމާތު ދެއްވިއެވެ.
ޖޭއެސްސީ މިހާރު އެކުލެވިގެންވާ ގޮތުން ގިނަ އަދަދަކަށް ސިޔާސީ ބޭފުޅުން ތިއްބަވައެވެ. މިކަމުގެ ކަންބޮޑުވުން ފާޅުކުރަމުންދާތާ ދުވަސްތަކެއް ވެފައިވާއިރު، އެންމެ ބޮޑަށް މިވާހަކަ ދައްކަނީ އެއިރެއްގައި އިދިކޮޅުގައި އޮންނަ ސިޔާސީ ޕާޓީންނެވެ.
ޖޭއެސްސީގައި މެމްބަރުން އެކުލެވިގެންވާ ގޮތް
- ރައްޔިތުންގެ މަޖިލީހުގެ ރައީސް (ސިޔާސީ ބޭފުޅެއް)
- ސުޕްރީމް ކޯޓުގައި ހިމެނޭ ފަނޑިޔާރުންގެ ތެރެއިން އިންތިހާބު ކުރާ އުއްތަމަ ފަނޑިޔާރު ފިޔަވައި އެހެން ފަނޑިޔާރަކު
- ހައިކޯޓުގައި ހިމެނޭ ފަނޑިޔާރުންގެ ތެރެއިން އިންތިހާބު ކުރާ ފަނޑިޔާރަކު
- ދަށު ކޯޓުތަކުގެ ފަނޑިޔާރުންގެ ތެރެއިން އިންތިހާބު ކުރާ ފަނޑިޔާރަކު
- ރައްޔިތުންގެ މަޖިލީހުގެ މެންބަރުންގެ ތެރެއިން ކަނޑައަޅާ މެންބަރަކު (ސިޔާސީ ބޭފުޅެއް)
- އާންމުންގެ ތެރެއިން ރައްޔިތުންގެ މަޖިލީހުން ކަނޑައަޅާ މީހަކު (ސިޔާސީ ބޭފުޅެއް)
- ރައީސުލްޖުމްހޫރިއްޔާ އައްޔަންކުރާ މީހަކު (ސިޔާސީ ބޭފުޅެއް)
- ބަންޑާރަނައިބު (ސިޔާސީ ބޭފުޅެއް)
- ދިވެހިރާއްޖޭގައި ގާނޫނީ ވަކީލުކަން ކުރުމުގެ ހުއްދަ ލިބިފައިވާ ވަކީލުންގެ ތެރެއިން އިންތިހާބު ކުރާ ގާނޫނީ ވަކީލަކު
ރައީސް ނަޝީދު އެމްޑީޕީގެ ގައުމީ މަޖިލީހަށް ހުށަހެޅުއްވި އިސްލާހުތަކުގެ ތެރޭގައި ޖޭއެސްސީގެ އިތުރުން ވެސް އެހެން ބައެއް މިނިވަން މުއައްސަސާތައް އެކުލެވިގެންވާ ގޮތް ބަދަލުކުރުން ހިމެނެއެވެ. އެމަނިކުފާނު ވިދާޅުވީ މިހާރު އޮތް ގާނޫނު އަސާސީއަށް ބޮޑެތި ބަދަލުތަކެއް ގެންނަން ޖެހިފައިވާ ކަމަށެވެ.
ޖޭއެސްސީ އިސްލާހު ކުރުމަކީ ރައީސް ޞާލިހުގެ އެންމެ މުހިންމު އެއް ރިޔާސީ ވައުދެވެ. ވެރިކަމަށް ހަތަރު އަހަރު ވާން ކައިރިވެފައިވާއިރު ވެސް މި ވައުދު އަދި ފުއްދިފައެއް ނުވެއެވެ.
