ކޮންމެ ރަށެއްގެ މަގުތަކުގައި ތާރު އަޅާކަށް ނުޖެހޭ: އަސްލަމް
ކޮންމެ ރަށެއްގެ މަގުތަކުގައި ތާރު އަޅަން ނުޖެހޭ ކަމަށް ޕްލޭނިން މިނިސްޓަރު މުހައްމަދު އަސްލަމް ވިދާޅުވެއްޖެއެވެ.
މިނިސްޓަރު މިހެން ވިދާޅުވެފައި ވަނީ ރައްޔިތުންގެ މަޖިލީހުގެ މިއަދުގެ ޖަލްސާގައި ވިލިނގިލީ ދާއިރާގެ މެމްބަރު ސައުދު ހުސައިން ކުރެއްވި ސުވާލަކަށް ޖަވާބު ދެއްވަމުންނެވެ.
އަސްލަމް ވިދާޅުވީ އާބާދީ ތޮއްޖެހިފައި އޮންނަ، ޓްރެފިކް ހައި ރަށްރަށުގެ މަގުތައް ހެދިޔަސް، ހުރިހައި ރަށްރަށެއްގައި ތާރު އެޅުމަކީ އެންމެ ބުއްދިވެރި ގޮތް ނޫން ކަމަށެވެ. ޖަޒީރާ ގައުމެއްގެ ގޮތުގައި އޮތް ރާއްޖޭގެ ޖަޒީރާވަންތަކަމުގެ ސިފަތައް ވެސް ރަށްރަށުގައި ހުންނަން ޖެހޭ ކަމަށް ވިދާޅުވިއެވެ.
"ބައެއް ރަށްރަށް އެބަހުރި، އެއްކޮޅުގައި ހުރެފައި، އަނެއްކޮޅުގައި ހުންނަ މީހާއަށް ބާރަށް ގޮވައިލީމަ އަޑު އިވޭވަރުގެ ރަށްރަށް. އެ ރަށްރަށުގައި ވެސް ތާރު އެޅުމަށް ޑިމާންޑް އެބަ ކުރެވޭ. އަޅުގަނޑު ގަބޫލެއް ނުކުރަން އެ ތަންތަނަކީ، ވެހިކަލްތަކުގައި މީހުން ދަތުރު ކުރަން އެންމެ ރަނގަޅު ރަށްރަށް ކަަމަކަށް." މިިނިސްޓަރު ވިދާޅުވިއެވެ.
މިނިސްޓަރު ވިދާޅުވީ މަގުތައް ބޭނުން ކުރެވޭ ގޮތާއި، މަގު ހެދުމާއި އޮންނަނީ ވަރަށް ބޮޑަށް ގުޅިފައި ކަމަށެވެ. އަދި މެދުމިނުގެ ޓްރެފިކެއް ހުންނަ ރަށްރަށުގައި ތާރު ނާޅާވެސް މަގުތައް އެއްވަރު ކުރެވިދާނެ ކަމަށް އޭނާ ވިދާޅުވިއެވެ.
އަސްލަމް އިތުރަށް ވިދާޅުވީ ޒަމާނާ އެކު ރައްޔިތުންގެ ވިސްނުމަށް ބަދަލު އައިސް، ގިނަ ރަށްރަށުގެ ރައްޔިތުން އެދެނީ މަގުތަކުގައި ތާރު އެޅުމަށް ކަމަށެވެ.
އެހެންވެ، 22 ރަށެއްގެ މަގުތަކުގައި ތާރު އެޅުމަށް ކޮންޓްރެކްޓަރުންނާ ހަވާލު ކުރެވިފައިވާއިރު، 19 ރަށެއްގެ މަގުތަކުގައި ތާރު އަޅަން ސަރުކާރުން ނިންމައިފައިވާކަން އޭނާ ފާހަގަކުރެއްވިއެވެ.
އެމްޑީޕީން ވެރިކަމަށް އައީ "ޖަޒީރާ ރާއްޖެ"މެނިފެސްޓޯއާ އެކުގައެވެ. މި މެނިފެސްޓޯގެ ދަށުން ރާއްޖޭގެ ރަށްތައް ވީހައި ވެސް ޖަޒީރާވަންތަކޮށް ތަރައްގީ ކުރުމަށް މަސައްކަތް ކުރާނެ ކަމަށް ބުނެފައިވެެެއެވެ.
ތިޔަހެން ވެއްޖެއްޔާ އަވަސް ވީ ގޮތަކުން މިނިސްޓަރު ކަމުން އިސްތިއުފާދީ ވާވަރުގެ މީހަކާ ހަވާލުކުރޭ
މިނިސްޓަރުކަމަށް އެއްވެސް ވަރަކަށް ކުފޫ ހަމަވާ މީހެއްނޫން..! ޒީރޯ ޓޮލެރަންސްގެ ދަށުން ވަރަށް ގިނަ މަޝްރޫތައް މީނަގެ އާއިލާ މީހުންނަށް ދީފަ ވަނީ..!!