ޗެއާޕާސަންގެ މަގާމަށް ވާދަ ކުރެއްވުމަށް އިންތި ފޯމު ހުށަހަޅުއްވައިފި
ވެރިކަންކުރާ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ގެ ޗެއާޕާސަންގެ މަގާމަށް ވާދަ ކުރެއްވުމަށް ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ފޯމު ހުށަހަޅުއްވައިފިއެވެ.
އިންތި ކުރެއްވި ޓްވީޓެއްގައި ވިދާޅުވީ ޗެއާޕާސަންގެ މަގާމަށް ވާދަކުރެއްވުމަށް ތާއީދު ފޯމާއި ކެނޑިޑެންސީ ފޯމް ފުރިހަމަކޮށް އެމްޑީޕީގެ އިންތިޚާބާ ބެހޭ ކޮމިޓީއަށް ރޭ ހުށައަޅުއްވައިފައިވާ ކަމަށެވެ.
އިންތިގެ ހެކިވެރިންގެ ގޮތުގައި ފޯމްގައި ސޮއިކުރައްވައިފައި ވަނީ ރައްޔިތުންގެ މަޖިލީހުގެ ނާއިބު ރައީސް އީވާ ޢަބްދުﷲއާއި، އުނގޫފާރު ދާއިރާގެ މެންބަރު މުޙައްމަދު ވަޙީދު (ވައްޑެ)އެވެ.
އެމްޑީޕީގެ ޗެއާޕާސަންގެ ކަމުގެ މަގާމަށް މީހަކު އިންތިހާބު ކުރުމުގެ ވޯޓުލުން އޭޕްރީލް 16ގައި ބޭއްވުމަށް އެ ޕާޓީން ވަނީ ނިންމައިފައެވެ.
އިންތިގެ އިތުރުން ދެން މި އިންތިޚާބުގައި ވާދަކުރައްވަނީ އިކޮނޮމިކް މިނިސްޓަރ ފައްޔާޒް އިސްމާޢީލެވެ.
އެމްޑީޕީގެ އަސާސީ ޤަވާޢިދުގައި ބުނެފައި ވަނީ، އިންތިޚާބު ބޭއްވުމުގެ 60 ދުވަސް ކުރިން އެ އިންތިޚާބަކަށް ވާދަކުރުމުގެ ފުރުސަތު ހުޅުވައިލައި، ކެމްޕެއިން ކުރުމުގެ ފުރުސަތު ދޭންވާނެ ކަމަށެވެ.
