ރައީސް ޞާލިޙްގެ ފެކްޝަނަށް ވައްޑެގެ ބަހުގެ ހަމަލާއެއް
ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ފުރާނަ ދުއްވައިލާން ދިން ހަމަލާއާ ގުޅިގެން، އެމްޑީޕީގެ ރައީސް އިބްރާހީމް މުހައްމަދު ޞާލިޙްގެ ފެކްޝަނަށް ނިސްބަތްވާ މެމްބަރުންނަށް، ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ބަހުގެ ހޫނު ހަމަލާތަކެއް ދެއްވައިފިއެވެ.
ރައީސް ނަޝީދަށް އަމާޒުކޮށް، 2021ވަނަ އަހަރުގެ މެއި މަހުގެ ހަވަނަ ދުވަހު ދިން ހަމަލާ ތަހުޤީޤް ކުރިއަށްދާ ގޮތް ބެލުމަށް އެ ޕާޓީން އުފެއްދި "މޭ ހައެއް" ކޮމެޓީގެ ހޯދުންތައް ޤައުމީ މަޖިލީހާ ހިއްސާ ކުރުމަށް އެ ޕާޓީން ވަނީ ޤައުމީ މަޖިލީހުގެ ޖަލްސާތަކެއް މީގެ ކުރިން، ސިލްސިލާ ގޮތެއްގައި ބާއްވައިފައެވެ.
އެހެން ނަމަވެސް އެމްޑީޕީގެ އިސްލީޑަރު ، ރައީސް ޞާލިޙުގެ ފެކްޝަނުގެ މެމްބަރުން ވަނީ މި ޖަލްސާތައް އޭރު ބޮއިކޮޓް ކުރައްވައިފައެވެ. މި މައްސަލައިގައި އޭރު ދެ ފެކްޝަނުގެ ކޯޅުން ވަަރަށް ބޮޑު ވެސް ވިއެވެ.
މިކަމާ ގުޅިގެން، ރައީސް ޞާލިހަށް ތާއީދު ކުރައްވާ މެމްބަރުންނަށް ނުސީދާ ގޮތެއްގައި ވައްޑެ ވަނީ ފާޑުވިދާޅުވެފައެވެ.
އޭނާ ކުރެއްވި ޓްވީޓެއްގައި ވިދާޅުވީ ގައުމީ މަޖިލީހުގެ ޖަލްސާތަކުގެ ކޯރަމް ހަމަވިޔަ ނުދީ، ޖަލްސާތައް ފެއިލް ކޮށްލުމަށް ވަރަށް "ހިންގާލާފައި" ބަޔަކު އުޅުނު ކަމަށެވެ. ނަމަވެސް އެއީ ކޮން ބައެއް ކަމެއް ސާފުކޮށް ވިދާޅެއް ނުވެއެވެ.
“އެ ހިންގާލުންގަނޑެއް އެމްޑީޕީ މެމްބަރުން ބޭނުމެއް ނުވޭ”ވައްޑެ ވިދާޅުވިއެވެ.
ވައްޑެ މިހެން ވިދާޅުވިއިރު، އަންނަ އޭޕްރީލް މަހުގެ 16ވަަނަ ދުވަހު ބާއްވާ، އެމްޑީޕީގެ ޗެއާޕާސަންގެ އިންތިހާބާ ދިމާކޮށް، ރައީސް ނަޝީދާއި، ރައީސް ޞާލިޙުގެ ފެކްޝަނާ ދެމެދު ވާދަވެރިކަމެއް ވަނީ އުފެދިފައެވެ.
ޗެއާޕާސަންގެ އިންތިހާބުގައި ރައީސް ނަޝީދު ފެކްޝަނުން، މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވާދަކުރައްވާއިރު، ރައީސް ޞާލިޙްގެ އަރިސް ބޭފުޅަކަށް ވާދަ ކުރައްވަނީ އިކޮނޮމިކް މިނިސްޓަރު ފައްޔާޒު އިސްމާއީލެވެެ.
