ބޯހިޔާވަހިކަމުގެ މައްސަލަތަކަށް ހައްލު ގެނައުމަށް މަސައްކަތް ކުރަނީ ހަމައެކަނި އެމްޑީޕީން: އަސްލަމް
އަތޮޅުތަކުގައި އޮތް ބޯހިޔާވަހިކަމުގެ މައްސަލަތަކަށް ހައްލު ގެނައުމަށް މަސައްކަތް ކުރަނީ ހަމައެކަނި މޯލްޑިވްސް ޑިމޮކްރެޓިކް ޕާޓީ (އެމްޑީޕީ) ވެރިކަމުގައި އޮންނައިރު ކަމަށާއި އެހެން ސަރުކާރުތަކުގައި އެކަމަށް މާ ބޮޑު ސަމާލުކަމެއް ދޭތަނެއް ނުފެންނަ ކަމަށް މިނިސްޓަރ އޮފް ނެޝަނަލް ޕްލޭނިންގ ހައުސިން އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެއެވެ.
މިނިސްޓަރު އަސްލަމް މިހެން ވިދާޅުވީ ސަރުކާރުން ނައިފަރުގައި އިމާރާތް ކުރި 100 ހައުސިންގ ޔުނިޓް އެ ރަށު ކައުންސިލާ ހަވާލު ކުރުމަށް މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
މިނިސްޓަރު އަސްލަމްގެ ވާހަކަފުޅުގައި ވިދާޅުވީ މި 100 ހައުސިންގ ޔުނިޓަކީ ނައިފަރަށް އޮތް ޖުމްލަ ހައްލު ނޫން ކަމަށެވެ. ނަމަވެސް ނައިފަރަށް ދިމާވެފައިވާ ބޯހިޔާވަހިކަމުގެ ދަތިކަމަށް މިދިޔަ 90 އަހަރަށް ބަލާއިރު ވެސް، ހައްލު ހޯދައިދީފައި ވަނީ އެމްޑީޕީން ކަމަށާއި ދެން ވެސް ހޯދައިދޭނީ އެ ޕާޓީން ކަމަށް އަސްލަމް ވިދާޅުވިއެވެ.
އަސްލަމް ވިދާޅުވީ، އެމްޑީޕީގެ ސަރުކާރުން މަސައްކަތް ކުރަނީ މާލެއެކޭ އެއްގޮތަށް އަތޮޅުތަކުގައި ވެސް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދައިދިނުމަށް ކަމަށެވެ.
"އަތޮޅުތަކުގައި ހުރި ބޯހިޔާވަހިކަމުގެ މައްސަލަތަކަށް، އަޅުގަނޑުމެން ނޫން އެހެން ބަޔަކު ސަރުކާރާ ހަވާލުވެ، ތިބޭއިރު މާބޮޑު ފަރުވާލެއް ބަހައްޓާތަނެއް އަޅުގަނޑެއް ހަމަގައިމު ވެސް" އަސްލަމް ވިދާޅުވީ އެމްޑީޕީން މަސައްކަތް ކުރާނީ ރައްޔިތުންގެ އަޑު އަހައިގެން ކަމަށެވެ.
"އަޅުގަނޑުމެން އެމްޑީޕީގެ ސަރުކާރުތަކަކީ އަބަދުވެސް، އަޅުގަނޑުމެންގެ ޕާޓީގެ ވިސްނުމަކީ ރައްޔިތުން ބޭނުންވާ ކަންކަން އަޅުގަނޑުމެން އެނގިތިބެގެން، ކަންކަން ރައްޔިތުންނަށް ކޮށްދެމުން ގެންދިއުން."
މި ސަރުކާރުން ބަޖެޓްކޮށްގެން 14 ރަށެއްގައި 1.5 ބިލިޔަން ރުފިޔާގެ ބޯހިޔާވެހިކަމުގެ މަޝްރޫއު ހިންގަމުން އަންނަކަން އަސްލަމްގެ ވާހަކަފުޅުގައި ފާހަގަ ކުރެއްވިއެވެ.
