ވެލާނާ އިންޓަނޭޝަނަލް އެއަރޕޯޓަށް ރެކޯޑު އަދަދަކަށް ފްލައިޓް ޖައްސައިފި
ވެލާނާ އިންޓަނޭޝަނަލް އެއަރޕޯޓަށް އިއްޔެ ޖެއްސި ފްލައިޓްތަކުގެ އަދަދު ރެކޯޑު އަދަދަކަށް އިތުރުވެއްޖެއެވެ.
މޯލްޑިވްސް އެއަރޕޯޓް ކޮމްޕެނީ ލިމިޓެޑްއިން ވިދާޅުވީ އެއާ ޓްރެފިކް މޫމަންޓުގެ އައު ރެކޯޑެއް އިއްޔެ ގާއިމް ކޮޮށްފައިވާ ކަމަށާއި އިއްޔެ ޖުމްލަ 839 މޫމަންޓް ވީއައިއޭގައި ހިނގައިފައިވާ ކަމަށެވެ.
އޭގެ ތެރޭގައި ހިމެނެނީ 210 ރަންވޭ މޫމަންޓް އަދި 629 ސީޕްލޭން މޫމަންޓް ކަމަށް އެމްއޭސީއެލްއިން ހާމަކުރެއެވެ.
ފަތުރުވެރިންގެ މެދުގައި މަގުބޫލު މަންޒިލަކަށް ރާއްޖެ ވެގެންގޮސްފައިވާ އިރު ރާއްޖެއަށް ވަނީ ވޯލްޑް ޓްރެވަލް އެވޯޑްސްގައި ވޯލްޑް ލީޑިންގ ޑެސްޓިނޭޝަން ލިބިފައެވެ. މީގެ އިތުރުން ޔޫއެންޓަބްލިއުޓީގެ ސޭފްޓީ ޓްރެވަލް ސްޓޭމްޕް، އޭސީއައި ސޭފްޓީ އެކްރެޑިޓޭޝަން ރާއްޖެއިން ވަނީ ހާސިލްކޮށްފައެވެ.
ޓޫރިޒަމް މިނިސްޓްރީން އާންމުކޮށްފައިވާ ތަފާސް ހިސާބުތައް ދައްކާގޮތުން މި އަހަރު ފެށުނު ފަހުން ރާއްޖެ އަންނަ ފަތުރުވެރިންގެ އަދަދު ވަނީ ވަރަށް ބޮޑަށް އިތުރުވެފައެވެ. އަދި ފަތުރުވެރިން ރާއްޖޭގައި ހޭދަކުރާ ދުވަސްތަކުގެ އަދަދު ވެސް ކުރީ އަހަރުތަކާ އަޅައިބަލާ އިރު ވަނީ އިތުރުވެފައެވެ.
