އައްޑޫގެ ތަރައްގީ ހުއްޓުވަން ބަޔަކު ރާވައިގެން މަސައްކަތް ކުރާ ކަމަށް ތުހުމަތު ކޮށްފި

އައްޑޫ ސިޓީގެ ކޮންމެ މަޝްރޫއުއެއް ހުއްޓުވުމަކީ އެ ސިޓީގެ ރައްޔިތުން ބިކަކޮށް، ބާކީ ކޮށްފައި ބޭއްވުމަށް، ގަސްތުގައި ހިންގާ ނާތަހުޒީބު އަމަލެއް ކަމަށް ރައްޔިތުންގެ މަޖިލީހުގެ ފޭދޫ ދާއިރާގެ މެމްބަރު މުހައްމަދު ނިހާދު ވިދާޅުވެއްޖެއެވެ.
ނިހާދު މިރޭ ކުރެއްވި ޓްވީޓެއްގައި ވިދާޅުވެފައި ވަނީ، އައްޑޫ ސިޓީގައި ބިން ހިއްކުމާއި، މަގު ހެދުމާއި، ޓޫރިޒަމް ޒޯން ހެދުމާ ދެކޮޅު ހެދުމަކީ ދެރަ ކަމެއް ކަމަށެވެ. އަދި އައްޑޫގެ ރައްޔިތުން ކުރިއެރުން ބޭނުންވާ ކަމަށް ވެސް ވިދާޅުވިއެވެ.
އޭނާ މިހެން ވިދާޅުވިއިރު، ބިން ހިއްކައިގެން އައްޑޫ ތަރައްޤީ ކުރުމުގެ ވިސްނުމަކީ ގޯސް ވިސްނުމެއް ކަމަށާއި ބިން ހިއްކައިގެން އިޔާދަ ނުކުރެވޭ ފަދަ ގެއްލުންތަކެއް ލިބިދާނެ ކަމަށް ބުނެ، އައްޑޫގެ ބިން ހިއްކުމާ ދެކޮޅަށް ވާހަކަ ދައްކަމުން އަންނަ ފަރާތްތަކަށް ވެސް އޭނާ މީގެ ކުރިން ރައްދު ދެއްވިއެވެ.
ނިހާދު ކުރެއްވި ޓްވީޓެއްގައި ވިދާޅުވީ، ބަޔަކު މަސައްކަތް ކުރަމުން އަންނަނީ އައްޑޫގެ ތަރައްޤީއަށް ހުރަސް އެޅުމަށް ކަމަށެވެ.
ނިހާދު މިހެން ވިދާޅުވެފައި މިވަނީ އައްޑޫގެ ތިމާވެއްޓަށް ލިބިދާނެ އިޔާދަނުކުރެވޭ ވަރުގެ ގެއްލުންތަކެއް ލިބިގެންދާނެ ކަމަށް ބުނެ ބިން ހިއްކުމުގެ މަޝްރޫއު ހުއްޓައިލާން ޓްރާންސްޕޭރެންސީ މޯލްޑިވްސް ހިމެނޭހެން 7 ޖަމިއްޔާއަކުން ސަރުކާރަށް ގޮވައިލުމާ ގުޅިގެންނެވެ.