އިންޑިއާ ސިފައިން ފައިބައިގެން ދަންދެން، އިންޑިއާ އައުޓް ކުރިއަށް ގެންދާނެ: އާދަމް ޝަރީފް

ދިވެހިރާއްޖޭގައި ގާއިމުވެ ތިބި އިންޑިއާ ސިފައިން ފައިބައިގެން ދަންދެން، "އިންޑިއާ އައުޓް" ހަރަކާތް ކުރިއަށް ގެންދާނެ ކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު، އަދި ޕީއެންސީގެ ނައިބު ރައީސް އާދަމް ޝަރީފު އުމަރު ވިދާޅުވެއްޖެއެވެ.

Ads by Sosun Fihaara

ސަންގު ޓީވީގައި ވާހަކަ ދައްކަވަމުން އާދަމް ޝަރީފު ވިދާޅުވީ "އިންޑިއާ އައުޓް" ކެމްޕެއިނަކީ ގައުމީ ކެމްޕެއިނެއް ކަމަށާއި، މި ސުލްހަވެރި ހަރަކާތުގެ ބައިވެރިން އެއްވުންތަކުން ހައްޔަރު ކުރި ނަމަވެސް، އަދަބެއް ނުލިބި ސަލާމަތް ވަނީ، އެފަރާތްތަކުން ކުށެއް ނުކުރާތީ ކަމަށެވެ.

އޭނާ ވިދާޅުވީ ގައުމީ މަސްލަހަތު ގެއްލި، އެއްވެސް ރައްޔިތަކަށް ގެެއްލުންވެދާނެ ފަދަ ކަމެއް މި ކެމްޕެއިންގެ ތެރެއިން ފެނިގެން ނުދާނެ ކަމަށެވެ.

"މިއީ ވަރަށް މާތް މަގްސަދެއްގައި އަޅުގަނޑުމެން ކުރާ ކަމެއް، މީގެ ތެރޭގައި ރައްޔިތަކަށް ވާނެ ކަމެއް، ގައުމުގެ މުދަލަކަށް، ގައުމަށް އަންނަން ހުރި އިންވެސްޓްމަންޓްއަކަށް އުނދަގޫވާނެ އެއްވެސް ކަމެއް އަޅުގަނޑުމެން ނުކުރާނަން." އޭނާ ވިދާޅުވިއެވެ.

އާދަމް ޝަރީފު ވިދާޅުވީ ދުނިޔޭގެ ކޮންމެ ގައުމަކުން ވިޔަސް، ރާއްޖޭގެ ތަރައްގީއަށް އެއްބާރުލުންދީ، އެކަމަށް އެހީތެރިވެދޭ ނަމަ، އިދިކޮޅު ފަރާތްތަކުން އެ ބަޔަކަށް މަރުހަބާ ވެސް ކިޔާނެ ކަމަށެވެ. އެހެން ނަމަވެސް، މިހާރު ގައުމުގެ ދިފާއުގައި ކުރިއަށް ގެންދާ "އިންޑިއާ އައުޓް" ކެމްޕެއިން ހުއްޓައިލެވެން ނެތް ކަަމަށް އޭނާ ވިދާޅުވިއެވެ.

އިންޑިއާއިން ރާއްޖެއަށް ހަދިޔާ ކުރި ދެ ހެލިކޮޕްޓަރާއި، އަސްކަރީ ޑޯނިއާ މަތިންދާ ބޯޓު ދުއްވުމަށް، އެގައުމުގެ 75 ސިފައިން ރާއްޖޭގައި ދަނީ ހަރަކާތްތެރިވަމުންނެވެ.

މިކަމަށް ދިވެހިން ތަމްރީނު ކުރެވުނަސް، އިންޑިއާ ސިފައިން ރާއްޖޭގައި ބޭތިއްބުމަށް، ދެގައުމުގެ ދެމެދުގައި ވެފައިވާ އެއްބަސްވުމުގައިވެއެވެ.