މިނިވަންކަމުގެ މާނައެއް މާރިޔާއަކަށް ފަހުމެއް ނުވޭ: ޖަމީލް
ޑިފެންސް މިނިސްޓަރު މާރިޔާ ދީދީއަށް ގައުމުގެ މިނިވަންކަމާއި އިސްތިގާލުގެ މާނަ ވެސް ފަހުމްނުވާ ކަމަށް ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
ޖަމީލް ކުރެއްވި ޓްވީޓެއްގައި ވިދާޅުވީ ދިވެހިންނަކީ ނިކަމެތި، ފަޤީރު، ލާއިޤް ނޫން ބައެއް ކަމަށް އެމްޑީޕީގެ އިސްވެރިން ސިފަކުރަނީ ވިކިފައި ތިބި ވަރު ބޮޑުވުމުން ކަމަށެވެ. އަދި ފަތުރުވެރިކަމާއި މަސްވެރިކަމުގެ އިތުރުން އުމްރާނީ ތަރައްޤީ ހޯދީ އަވަށްޓެރިންނަށް ނުބަލާ ކަމަށް ވެސް ޖަމީލް ވިދާޅުވިއެވެ.
މީގެ އިތުރުން ޖަމީލް ވިދާޅުވީ “"ތިގޮތަށް އުޅުނަސް ނިމޭނެ. ލިޔެވިގެން ދާނީ ފިނޑިއެއްގެ ގޮތަށް. ކުޑަކަކޫ ޖަހައިގެން ފައިގައި ދޫލަން އޮތުން ހުރިހައި ގޮތަކުން ވެސް ހުތުރު” ކަމަށެވެ.
ޑިފެންސް މިނިސްޓަރަށް މި ފަހުން ފާޑުކިޔުން އަމާޒުވެފައި ވަނީ "އިންޑިއާ އައުޓް"ގެ ނަމުގައި ދެއްކެވި ވާހަކަފުޅުތަކާ ގުޅިގެންނެވެ. އެގޮތުން ރާއްޖެއަށް ގެންނަ ތިން ބިހުން ދެ ބިސް ގެންނަނީ އިންޑިއާއިން ކަމަށް ވިދާޅުވެ މާރިޔާ ވަނީ އިންޑިއާގެ ދިފާޢުގައި ވާހަކަ ދައްކަވައިފައެވެ. މިކަމާ ގުޅިގެން އިދިކޮޅު ކޯލިޝަން، ޕީޕީއެމް/ޕީއެންސީން ދަނީ ސަރުކާރަށް ބޮޑަށް ފާޑު ވިދާޅުވަމުންނެވެ.
