ކަންކަން އޮންނަ އުޞޫލަށް ބަސްބުނާ މީހާ ބާކީކުރާ ސަގާފަތެއް އެމްޑީޕީގައި އެބައޮތް:އިސްމާޢީލް
ވެރިކަން ކުރާ މައި ޕާޓީ ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ އަސާސީ ގަވާއިދާއި ކަންކަން އޮންނަ އުޞޫލަށް ބަސްބުނާ މީހާ ބާކީކުރާ ސަގާފަތެއް އެ ޕާޓީގައި އެބައޮތް ކަމަށް ދުވާފަރު ދާއިރާގެ ރައްޔިތުންގެ މަޖިލީހުގެ މެމްބަރު އިސްމާއީލް އަޙުމަދު ވިދާޅުވެއްޖެއެވެ.
އެމްޑީޕީގެ ޗެއަރޕަރސަންކަމުގެ މަގާމަށް ވާދަކުރައްވާ އިކޮނޮމިކް މިނިސްޓަރ ފައްޔާޒު އިސްމާޢީލާއި އަންހެނުންގެ ރޫޙްގެ ރައީސްކަމުގެ މަގާމަށް ވާދަކުރައްވާ ސ.މީދޫ ދާއިރާގެ މެމްބަރު ރޮޒެއިނާ އާދަމްގެ ކެމްޕެއިން، "ހިންގާލަން" ލޯންޗު ކުރުމަށް ރޭ ށ.މިލަންދޫގައި ބޭއްވި ޖަލްސާގައި ވާހަކަ ދައްކަވަމުން އިސްމާޢީލް ވިދާޅުވީ އެމްޑީޕީއަށް ބަދަލުތަކެއް އަންނަން ޖެހޭ ކަމަށާއި ، ހައްގު ބަސް ބުނުމުގެ ފުރުސަތު އޮންނަން ޖެހޭ ކަމަށެވެ.
އޭނާ ވިދާޅުވީ ރައީސް މައުމޫންގެ 30 އަހަރުގެ ވެރިކަން ބަދަލުކުރުމުގައި އެމްޑީޕީން ވަކާލާތު ކުރަމުން އައީ ބަސްބުނުމުގެ ހައްގު ލިބިދޭން ޖެހޭ ކަމަށެވެ. ނަމަވެސް އެ ފުރުސަތު މިހާރު އެމްޑީޕީގައި ނެތްކަމަށް ވިދާޅުވެ ކަންކަން އޮންނަ އުޞޫލުން ބަސް ބުނާ މީހާ ބާކީ ކުރާ ސަގާފަތެއް އެމްޑީޕީގައި މިހާރު އެބައޮތް ކަމަށް ވިދާޅުވިއެވެ.
"އަޅުގަނޑަކީ ވެސް އެ ދަންތުރައިގައި ޖެހުނު އެކަކު ، އެހެން ނަމަވެސް އަޅުގަނޑު އެމްޑީޕީގެ އާންމު މެމްބަރުންނަށް ދޭން އޮތް ޔަގީން ކަމަކީ އެހެން ކުރާ ފުރައްސާރައަކުން ، އެހެން ކުރާ މަލާމާތަކުން ، ފަހަތަށް ޖެހި ، ތިޔަ އާންމު މެމްބަރުންގެ ހައްގު ހޯދަން އަޅުގަނޑުމެން ކުރާ މަސައްކަތެއް ނުހުއްޓާނަން"
ރަށްރަށުގައި ތިބި އެމްޑީޕީގެ އާންމު މެމްބަރުންނާއި ޕާޓީގެ ހިންގުމާ ދޭތެރޭ ގުޅުން ކުޑަކަމާއި އަޅައިލުން ކުޑަކަން ފާހަގަ ކުރައްވަމުން އިސްމާޢީލް ވިދާޅުވީ އެމްޑީޕީއަށް ބަދަލުތަކެއް އަންނަން އެބަޖެހޭ ކަމަށާއި އެކަމަށް ޓަކައި ޗެއަރޕަރސަންގެ މަގާމަށް ފައްޔާޒު އިސްމާޢީލް އަދި އަންހެނުންގެ ރޫހުގެ ރައީސްކަމަށް ރޮޒެއިނާ އިންތިޚާބު ކުރަން ޖެހޭ ކަމަށެވެ.
އިސްމާޢީލް ވަނީ ، އެެމްޑީޕީގެ ސިފަތައް ނެތް އެމްޑީޕީގެ ވަޒީރަކު ކެބިނެޓްގައި މަސައްކަތް ކުރައްވާކަމަށް ވެލިދޫ ދާއިރާގެ އެމްޑީޕީގެ މެންބަރު މުހައްމަދު އަބްދުﷲ ޝަފީގު ، ރައްޔިތުންގެ މަޖިލީހުގައި ދެއްކެވި ވާހަކަތަކަށް ވެސް ރައްދު ދެއްވައިފައެވެ.
އެ ވާހަކަތަކަށް އިޝާރާތް ކުރައްވައި އޭނާ ވިދާޅުވީ އެމްޑީޕީވަންތަ މިނިސްޓަރެއްގެ ސިފަ ފެންނާނީ އެމްޑީޕީވަންތަ ގޮތަކަށް މަޖިލީހުގެ މެމްބަރުން ހަރަކާތްތެރިވެގެން ކަމަށެވެ.
"އަޅުގަނޑުމެންގެ ދާއިރާއަށް ބެލީމާ ފެންނާނެ ، އަޅުގަނޑަށް ލިބުނު މޮޅެއް ނޯންނާނެ ، ދާއިރާ އެއޮތް ފިޔަ ޖަހަނީ ، އަޅުގަނޑު ، އަޅުގަނޑުގެ ކަމެއްގައި މިނިސްޓަރުގެ ގާތަކަށް ނުދަން ، އަޅުގަނޑު ދަނީ އެމްޑީޕީވަންތަކަމާ އެކު ، އާންމު މެމްބަރުންނާއި ރައްޔިތުންގެ އާދޭހާ އެކު އެ ބަދަލު ގެންނަން ، އިރާދަ ކުރެއްވިއްޔާ އެ ބަދަލު އަޅުގަނޑުމެންގެ ޕާޓީއަށް ވެސް ގެންނާނަން" އިސްމާޢީލް ވިދާޅުވިއެވެ.
