ރާއްޖެ ނާދެވި 12 ދިވެހިން ޔޫކްރެއިންގައި އަދިވެސް އެބަތިބި: މިނިސްޓްރީ
ރާއްޖެ ނާދެވި 12 ދަރިވަރުން ޔޫކްރެއިންގައި ތާށިވެފައި އެބަތިބި ކަމަށް ފޮރިން މިނިސްޓްރީން ވިދާޅުވެއްޖެއެވެ.
މިދިޔަ ބުރާސްފަތި ދުވަހުން ފެށިގެން ޔޫކްރެއިންގެ އެކި ސަރަހައްދުތަކަށް ރަޝިޔާއިން ބޮމުގެ ހަމަލާތައް ދީ، އެ ގައުމަށް ވެރިވެ ގަތުމަށް އަންނަނީ މަސައްކަތް ކުރަމުންނެވެ.
ޔޫކްރެއިންގައި ތިބި ދިވެހިން ރާއްޖެ ގެނައުމަށް ކުރާ މަސައްކަތްތަކުގެ ތަފްސީލް ހިއްސާކުރުމަށް ފޮރިން މިނިސްޓްރީން ބޭއްވި ޕްރެސް ކޮންފަރެންސްގައި ފޮރިންގް މިނިސްޓްރީގެ ޑެޕިއުޓީ މިނިސްޓަރ ޢަބްދުﷲ ހުމައިދު ވިދާޅުވީ، އަދިވެސް އެ ޤައުމުގައި 12 ދަރިވަރަކު ތާށިވެފައިވާ ކަމަށާއި ވީހައި ވެސް އަވަހަކަށް އެ ދަރިވަރުން ރާއްޖެ ގެނައުމުގެ މަަސައްކަތް ކުރަމުން އަންނަ ކަމަށެވެ.
ހުމައިދު ވިދާޅުވީ، މި 12 ދަރިވަރުންވެ ސް ރާއްޖެ ގެނައުމުގެ މަސައްކަތް ކުރަމުން އަންނަ ކަމަށާއި ނަމަވެސް މިހާރުގެ ހާލަތަށް ބަލާއިރު ދަތުރުކުރުމަކީ މިވަގުތަށް ރައްކާތެރިކަމެއްކަމަށް ނުފެންނާތީ ނުގެނެވިފައިވާ ކަމަށެވެ. މިގޮތުން، 12 ދިވެހިން ތިބި ސަރަހައްދުން ހަންގޭރީގެ ބޯޑަރާއި ހަމައަށް ދަތުރުކުރުމަށް 15 ގަޑިއިރު ނަގާނެ ކަމަށާއި، މިހާރުގެ ހާލަތަށް ބަލާއިރު ޓްފިކްގެ ތާށިކަމުން އެއަށް ވުރެ ވެސް ގިނަ އިރު ނަގާނެކަމަށް ހުމައިދު ވިދާޅުވިއެވެ.
"ބާކީ ތިބި 12 ދިވެހިން ރައްކާތެރިކަމާ އެކު ބޯޑަރާ ހަމައަށް ގެންދިއުމުގެ މަސައްކަތް މިދަނީ ކުރަމުން. ނަމަވެސް ދަތިތަކެއް އެބަހުރި މި ހަމަލާތައް ފުޅާވެފައި ވާތީ. ހަންގޭރީ ބޯޑަރާ ވަރަށް ދުރުގައި މި ދިވެހިން މިތިބީ." ހުމައިދު ވިދާޅުވިއެވެ.
