ހައި ކޯޓުގެ އަމުރު ސަސްޕެންޑު ކުރި މެޖިސްޓްރޭޓްގެ މައްސަލަ ބަލަނީ
މަސްތުވާތަކެތީގެ މައްސަލައެއްގައި ހައި ކޯޓުގެ އަމުރުގެ ދަށުން ބަންދު ކޮށްފައި ހުރި މީހެއްގެ އެ އަމުރު ސަސްޕެންޑު ކުރުމަށް ފަހު، އެމީހާ ދޫކޮށްލަން އަމުރު ނެރުއްވި މެޖިސްޓްރޭޓްގެ މައްސަލަ ބަލަން ޖުޑީޝަލް ސާވިސް ކޮމިޝަން(ޖޭއެސްސީ)އިން ނިންމައިފިއެވެ.
އެނގިފައިވާ ގޮތުގައި ހައި ކޯޓުގެ އަމުރެއްގެ ދަށުން ޝަރީއަތް ނިމެންދެން ބަންދުކޮށްފައި ހުރި މީހަކު ދޫކޮށްލަން ސ. ހިތަދޫ ކޯޓުން އަމުރު ނެރުއްވީ މެޖިސްޓްރޭޓް ރަފީއުއްދީން އަހުމަދެވެ. އަދި އެ ނިންމުން ދިފާއުކޮށް، އެ ކޯޓުން އެއިރު ނޫސް ބަޔާނެއް ވެސް ނެރުނެވެ.
ޖޭއެސްސީން ބުނީ ހައި ކޯޓުގެ އަމުރު ސަސްޕެންޑުކޮށް، އެމީހާ ދޫކޮށްލުމާ ގުޅިގެން ރަފީއުއްދީންގެ މައްސަލަ ބަލަން ނިންމީ ބަންދާ މެދު ގޮތެއް ނިންމުމާއި ނޫސް ބަޔާން ނެރުމުގައި ފަނޑިޔާރުންގެ ސުލޫކީ މިންގަނޑާ ޚިލާފަށް އަމަލު ކޮށްފައިވާ ކަމަށް ބެލެވޭތީ ކަމަށެވެ. އަދި އެ މައްސަލަ ބެލުމަށް ތަހުގީގު ކޮމެޓީއެއް މިހާރު ވަނީ އެކުލަވައިލައިފައެވެ.
މި މައްސަލަ ފެންމަތިވީ ފަހުން ހައިކޯޓުން މި ފަދަ އެހެން މައްސަލައެއްގައި މިދިޔަ ހަފްތާގައި ނިންމީ މަތީ ކޯޓުގެ އަމުރެއްގެ ދަށުން މީހަކު ބަންދު ކުރިޔަސް، ހާލަތަށް އަންނަ ބަދަލާ ގުޅިގެން ދަށު ކޯޓަށް އެ މީހަކު ދޫކޮށްލެވިދާނެ ކަމަށެވެ.
Ads by STO
