ރައީސް ޞާލިޙް މޫސައާ ބައްދަލު ކުރައްވައިފި، މޫސަގެ ތާއީދު ފައްޔާޒަށް!
ރައީސް އިބްރާހީމް މުޙައްމަދު ޞާލިޙް، އެމްޑީޕީގެ ކުރީގެ ޗެއަަރޕާސަން މޫސާ މަނިކާ ބައްދަލު ކުރައްވައިފިއެވެ.
މިއަދު މޫސަ ކުރެއްވި ޓްވީޓެއްގައި ވިދާޅުވީ، ރައީސް ޞާލިޙާ ބައްދަލުވި ކަމަށާއި ވަރަށް އަވަހަށް ރާއްޖެ ވަޑައިގަންނަވާނެ ކަމަށް ވިދާޅުވި ކަމަށެވެ.
ސާޖަރީއަށް ފަހު ހެޔޮ ޙާލުކޮޅުގައި ބައްދަލުވެ ޙާލު އޮޅުންފިލުވައިލެވުނު. އިރާދަކުރެއްވީތީ ރަނގަޅުކަމާ ވަރަށް އަވަހަށް ރާއްޖެވަޑައިގަންނަވާނެކަމަށް ވިދާޅުވި" މޫސަގެ ޓްވީޓްގައި ވިދާޅުވިއެވެ.
ރައީސް ޞާލިޙް މި ވަގުތު ހުންނެވީ ތައިރޮޑްގެ އޮޕަރޭޝަނެއް ކުރެއްވުމަށް މެލޭޝިއާގައެވެ. އޮޕަރޭޝަނަށް ފަހު އެ މަނިކުފާނުގެ ހާލުކޮޅު އަންނަނީ ރަނގަޅުވަމުންނެވެ.
މޫސަ އިތުރަށް ވިދާޅުވީ، މި ބައްދަލުވުމުގައި އެމްޑީޕީގެ ވާހަކަ ވެސް ދައްކަވައިލެވުނު ކަމަށެވެ. އަދި އެމްޑީޕީގެ ފައުންޑަރެއްގެ ހައިސިއްޔަތުން މި އަންނަ ޗެއަރޕާސަންގެ އިންތިޚާބުގައި މޫސަ ތާއީދު ކުރައްވަނީ ފައްޔާޒަށް ކަމަށް ދެންނެވި ކަމަށް ވިދާޅުވިއެވެ.
"އެމްޑީޕީގެ ވާހަކަ ދައްކައިލެވުނު. ދެންނެވިން ފައުންޑަރެއްގެ ޙައިސިއްޔަތުން އަޅުގަނޑު ފަޔާއަށޭ ތާއީދު ކުރަނީ " މޫސަގެ ޓްވީޓްގައި ވިދާޅުވިއެވެ.
ޗެއަރޕާސަން އިންތިޚާބުގެ ވާދަ އެމްޑީޕީގެ ތެރޭގައި ވަނީ ވަރަށް ބޮޑުވެފައެވެ. މި އިންތިޚާބުގައި ވާދަ ކުރައްވަނީ ފައްޔާޒުގެ އިތުރުން ރައީސް ނަޝީދުގެ ތާއީދު ލިބިލައްވައިފައިވާ އިމްތިޔާޒް ފަހުމީއެވެ.
