އައްޑޫގެ އެމްޑީޕީ މެމްބަރުން އެދެނީ ޕާޓީ އެކަތިގަނޑެއްގެ ގޮތުގައި ހިފަހައްޓަން: ހަސަން ލަތީފް
އައްޑޫ ސިޓީގެ އެމްޑީޕީއަށް ނިސްބަތްވެވަޑައިގަންނަވާ މެމްބަރުންގެ އެންމެ ބޮޑު އެދުމަކީ އެ ޕާޓީ އެކަތިގަނޑެއްގެ ގޮތުގައި ހިފެހެއްޓުންކަމަށް އެމްޑީޕީގެ ކުރީގެ ޗެއާޕާސަން ހަސަން ލަތީފު ވިދާޅުވެއްޖެއެެވެ.
އެމްޑީޕީގެ ޗެއާޕާސަންގެ އިންތިހާބުގައި ވާދަކުރައްވާ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ (އިންތި) ކެމްޕޭނަށް އައްޑުއަށް ކުރެއްވި ދަތުރު ނިންމައިލުމަށް ފަހު ރޭ ވަނީ ފުރާވަޑައިގެންފައެވެ.
ހަސަން ލަތީފް ކުރެއްވި ޓްވީޓެއްގައި ވިދާޅުވީ އައްޑޫގެ އެމްޑީޕީ މެންބަރުންގެ އެންމެ ބޮޑު އެދުމަކީ ޕާޓީ އެކަތިގަނޑެއްގެ ގޮތުގައި ހިފެހެއްޓުމާ އެކު ރައީސް ނަޝީދަށް ދެރަގޮތެއް ވިޔަނުދިނުން ކަމަށެވެ. އަދި އައްޑުއަށް ކުރި ކެމްޕެއިން ދަތުރުން ލިބުނު އުފާވެރި ކަމަކީ އިންތިއާ އެކު މި މަސައްކަތުގައި ފޫގަޅައިފައި މެންބަރުން ތިބިކަން ކަށަވަރުވުން ކަމަށް ވެސް އޭނާ ވިދާޅުވިއެވެ.
ވަރަށް ވާދަވެރި ކެމްޕެއިނެއް ކުރަމުން އަންނަ އެމްޑީޕީގެ ޗެއާޕާސަންގެ އިންތިހާބު ބޭއްވުމަށް ހަމަޖެހިފައި ވަނީ އަންނަ އޭޕްރީލްމަހުގެ 16ވަނަ ދުވަހުއެވެ.
މި އިންތިހާބުގައި އިންތިއާ ވާދަ ކުރައްވަނީ އިކޮނޮމިކް މިނިސްޓަރު ފައްޔާޒު އިސްމާއީލެވެ.
