ޗެއާޕާސަން އިންތިހާބު ބާއްވާ ތާރީހު ކަނޑައެޅުން މާދަމާ ރޭ
އެމްޑީޕީގެ ޗެއާޕާސަން އިންތިހާބު ބާއްވާ ތާރީހު ކަނޑައެޅުމަށް މާދަމާ ރޭ އެ ޕާޓީގެ ގައުމީ މަޖިލީހުގެ ޖަލްސާއެއް ބޭއްވުމަށް ތާވަލުކޮށްފިއެވެ.
އެމްޑީޕީން ބުނީ ގައުމީ މަޖިލީހުގެ ޖަލްސާ އޮންނާނީ އިމާދުއްދީން ސްކޫލުގެ ހޯލުގައި މާދަމާ ރޭ 8:30ގައި ކަމަށެވެ. މި ޖަލްސާގައި އެޖެންޑާގައި ހިމެނެނީ ރޯދަ މަސް ނޫން ދުވަސްވަރަކަށް އިންތިހާބު ބޭއްވުމާ މެދު ގޮތެއް ނިންމުމެވެ.
އެމްޑީޕީގެ ޗެއަރޕާސަންގެ މަޤާމަށް ވާދަކުރައްވާނެކަމަށް އިކޮނޮމިކް މިނިސްޓަރ ފައްޔާޒް އިސްމާޢީލާއި، މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ ވަނީ އިއުލާންކޮށްފައެވެ. މިއާއެކު އެމްޑީޕީގައި އިސްކޮށް އުޅުއްވާ ފަރާތްތަކުން ވަނީ ތާޢީދުކުރައްވާ ކެނޑިޑޭޓުންނަށް ކެމްޕެއިން ފަށްޓަވާފައެވެ.
އެމްޑީޕީގެ ޗެއަރޕާސަންގެ އިންތިޚާބު ބާއްވަނީ އެ މަޤާމުގައި ހުންނެވި ހެންވޭރު ހުޅަންގު ދާއިރާގެ މެންބަރު ޙަސަން ލަޠީފްގެ ދައުރު ހަމަވުމާ ގުޅިގެންނެވެ.
ޗެއަރޕާސަންގެ އިންތިޚާބާއި، އަންހެނުންގެ ރޫހާއި ޒުވާނުންގެ ހިތްވަރުގެ އިންތިޚާބު ބޭއްވުމަށް އެމްޑީޕީގެ ޤައުމީ މަޖިލީހުގެ އިއްތިފާޤުން ފާސްކޮށްފައި ވަނީ އަންނަ އޭޕްރީލް މަހުގެ 16ގައި ބޭއްވުމަށެވެ.
އިންތިހާބު ދިމާވަނީ ރޯދަ މަހަަށް ކަމަށްވުމާ އެކު އެ ތާރީހު ފަސްކޮށްދިނުމަށް ފައްޔާޒު ވަނީ އެދިފައެވެ. އެހެންނަމަވެސް އިންތިހާބު ފަސްކުރަން ދެކޮޅު ކަމަށް އިންތިގެ ކެމްޕޭން ޓީމުން ވަނީ ބުނެފައެވެ.
