ޓެކްސީ ޑްރައިވަރުންގެ ކަންބޮޑުވުންތަކަށް ހައްލެއް ގެނެސްދިނުމަށް މޭޔަރު ގޮވައިލައްވައިފި
ޓެކްސީ ޑްރައިވަރުންގެ ކަންބޮޑުވުންތައް އަޑުއަހައި އެ ކަންބޮޑުވުންތަކަށް އިންސާފުވެރި ހައްލެއް ގެނެސްދެއްވުމަށް މާލެ ސިޓީގެ މޭޔަރު ޑރ. މުޙއްމަދު މުޢިއްޒު ސަރުކާރުގެ ކަމާބެހޭ ފަރާތްތަކަށް އިލްތިމާސް ކުރައްވައިފިއެވެ.
ޓެކްސީ ޑްރައިވަރުންގެ ކަންބޮޑުވުންތަކަށް އިޝާރާތް ކުރައްވަމުން މޭޔަރު މުޢިއްޒު ކުރެއްވި ޓްވީޓެއްގައި ވިދާޅުވީ މާލޭގެ އާބާދީގެ ގިނަ ބަޔަކު ބޭނުންކުރާ ޓެކްސީ ހިދުމަތަކީ އެކަށީގެންވާ ހެޔޮ ބަދަލުތަކެއް ގެނެސްދޭންޖެހޭ ޚިދުމަތެއް ކަމަށެެވެ.
މޭޔަރު މުޢިއްޒު މިފަދައިން ވިދާޅުވެފައި މިވަނީ ޓެކްސީ ޑްރައިވަރުން ދަތުރުތަކުގެ އަގުތައް ބޮޑު ކުރަން ނިންމައިފައި ވަނިކޮށް ސަރުކާރުން އެކަން ހުއްޓުވައިފައިވާ ދަނޑިވަޅެއްގައެވެ.
މާލެ އަދި ހުޅުމާލެ އެތެރޭގައި ޓެކްސީ ދަތުރެއް މީގެ ކުރިން 25ރ.އަށް ކުރި އިރު ޕެޓްރޯލް ލީޓަރެއް ލިބެނީ 8ރ. އަށެވެ. އެކަމަކު، އިއްޔެއިން ފެށިގެން ޕެޓްރޯލް ލީޓަރެއްގެ އަގު 14.60ރ.އަށް އުފުލުމުން، މާލެ ސަރަޙައްދުގައި ޚިދުމަތް ދެމުން އަންނަ 14 ޓެކްސީ ސެންޓަރަކުން ވަނީ ދަތުރުތަކުގެ އަގު ބޮޑުކުރަން ނިންމައިފައެވެ.
ޓެކްސީ ދަތުރުތަކުގެ އަގު ކަނޑައަޅަނީ ޓްރާންސްޕޯޓް މިނިސްޓްރީން ފާސްކޮށްގެންނެވެ. އެހެންކަމުން އަގަށް ގެންނަން ބޭނުންވާ ބަދަލުތައް ޓެކްސީ ސެންޓަރުތަކުން ވަނީ ޓްރާންސްޕޯޓު މިނިސްޓްރީއާ ވެސް ހިއްސާކޮށްފައެވެ.
