އިންޑިއާ އައުޓް ހަރަކާތަށް ތާއީދެއް ނެތް، ލިބޭނީ ގެއްލުން: ރައީސް ނަޝީދު
ރާއްޖޭގައި އިންޑިއާ ސިފައިން ގާއިމުވެ ތިބުމާ ދެކޮޅަށް އިދިކޮޅު ޕީޕީއެމުން ފަށައިފައިވާ އިންޑިއާ އައުޓް ހަރަކާތަށް ތާއީދެއް ނެތް ކަމަށާއި އެކަމުގެ ސަބަބުން ލިބޭނީ ގެއްލުން ކަމަށް ރައްޔިތުން މަޖިލީހުގެ ރައީސް މުހައްމަދު ނަޝީދު އަނެއްކާ ވެސް ވިދާޅުވެއްޖެއެވެ.
އެ މަނިކުފާނު މިއަދު ކުރެއްވި ޓުވީޓެއްގައި ވިދާޅުވީ އިންޑިއާ އައުޓް ހަރަކާތަކީ ދިވެހިންނަށް ގެއްލުން ދޭނެ ހަރަކާތެއް ކަމަށެވެ. ނަޝީދު ވަނީ އެ ހަރަކާތުގައި ބައިވެރި ނުވުމަށް އިލްތިމާސްކުރައްވައިފައެވެ.
“ރައީސް ޔާމީން އިންޑިއާއާ ދެކޮޅަށް ހިންގަވާ ހަރަކާތަކީ ރައްޔިތުންގެ ތާއީދު ނެތް، ދިވެހިންނަށް އޭގެން ގެއްލުން ދޭނެ ކަމެއް. ޕީޕީއެމްގެ މެންބަރުން ކިބައިން ވަރަށް އިހްލާސްތެރިކަމާ އެކު އަޅުގަނޑު އެދެނީ ގައުމުތަކާ އިދިކޮޅު ހަރަކާތުގައި ބައިވެރި ނުވުމަށް" ރައީސް ނަޝީދު ވިދާޅުވިއެވެ.
ރައީސް ނަޝީދު މިފަދައިން ވިދާޅުވެފައިވާ އިރު މިއަދު ހަވީރު ރައީސް ޔާމީން ބައިވެރިވަޑައިގަންނަވާ "އިންޑިއާ އައުޓް" ހަރަކާތެއް އދ. މަހިބަދޫގައި ބޭއްވުމަށް ވަނީ ހަމަޖެހިފައެވެ.
