ފައްޔާޒްގެ ކެމްޕެއިން މެދުރާއްޖެތެރޭގައި
ވެރިކަން ކުރާ އެމްޑީޕީގެ ޗެއާޕަރސަންކަމުގެ އިންތިހާބަށް ކެމްޕެއިނު ކުރުމަށް، އެ މަގާމަށް ވާދަކުރައްވާ އެއް ކެންޑިޑޭޓްކަމަށްވާ ފައްޔާޒް އިސްމާއިލް މިހާރު ގެންދަވަނީ މެދުރާއްޖެތެރޭގެ ރަށްރަށުގައި ކެމްޕޭން ކުރަމުންނެވެ.
އެމްޑީޕީގެ ޗެއާޕަރސަން ހޮވުމުގެ އިންތިހާބު މެއި މަހުގެ 14 ވަނަ ދުވަހަށް މިހާރު ފަސްކުރުމާ ގުޅިގެން މި އިންތިހާބުގައި ވާދަކުރައްވާ ދެ ކެނޑިޑޭޓުން ވެސް ދަނީ އަނެއްކާ ވެސް އަތޮޅުތެރޭގެ ރަށްރަށުގައި ކެމްޕެއިނު ހަރަކާތްތައް ހިންގަމުންނެވެ. އެގޮތުން އިކޮނޮމިކް މިނިސްޓަރ ފައްޔާޒްގެ އިތުރުން މި އިންތިހާބުގައި ވާދަކުރައްވާ އިމްތިޔާޒު ފަހުމީ (އިންތި) މިހާރު ގެންދަވަނީ ތިލަދުންމަތީގައި ހަރަކާތްތެރިވެވަޑައިގަންނަވަމުންނެވެ.
ފައްޔާޒްގެ ކެމްޕެއިނު ހަރަކާތްތަކާ ގުޅޭގޮތުން މައުލޫމާތު ދެއްވަމުން "ހިންގާލަން" ޓީމުން ބުނީ އިއްޔެ މ. އަތޮޅުގެ ތިން ރަށެއްގައި ކެމްޕޭންކޮށްފައިވާ އިރު މިއަދު ބ.އަތޮޅާއި މ.އަތޮޅުގެ އެކި ރަށްތަކަށް މިނިސްޓަރ ދަތުރުކުރައްވާނެ ކަމަށެވެ.
މިނިސްޓަރ ފައްޔާޒައި ޓީމު މިވަގުތު ތިބީ މ. ކޮޅުފުށީގައެވެ.
އެއަށް ފަހު މިއަދު ބ. އަތޮޅާއި މ. އަތޮޅުގެ ރަށްތަކަށް ދިޔުމަށް ފަހު އެ ޓީމުން މާދަމާ ދާން ހަމަޖެހިފައި ވަނީ ދ. އަތޮޅަށެވެ.
