ކޮރަޕްޝަންގެ 22 މައްސަލައެއް އޭސީސީން ޕީޖީއަށް މިދިޔަ އަހަރު ފޮނުވި
ކޮރަޕްޝަންގެ 22 މައްސަލައެއް އެންޓި ކޮރަޕްޝަން ކޮމިޝަން (އޭސީސީން) ޕީޖީ އޮފީހަށް މިދިޔަ އަހަރު ފޮނުވައިފައިވާކަމަށް އެ ކޮމިޝަނުން ބުނެފިއެވެ.
އެ ކޮމިޝަނުން މިއަދު އާންމުކުރި 2021ވަނަ އަހަރުގެ އަހަރީ ރިޕޯޓުގައި ބަޔާންކޮށްފައިވާ ގޮތުގައި މިދިޔަ އަހަރު އެ ކޮމިޝަނަށް ހުށަަހެޅުނު 782 މައްސަލައެއް ރަޖިސްޓްރީ ކޮށްފައިވެއެވެ.
އަދި ކޮވިޑް-19ގެ ބަލިމަޑުކަމުގެ ސަބަބުން އަތޮޅުތަކަށް ދަތުރުކޮށްގެން ތަޙުޤީޤު ހިންގަން ޖެހޭ މައްސަލަތައް ހުއްޓިފައި އޮތް ނަމަވެސް، މިދިޔަ އަހަރުގެ ފަހުކޮޅުގައި 5 އަތޮޅެއްގެ 48 ރަށަކަށް ދަތުރުކޮށް، ތަޙުޤީޤު ހިންގައިފައިވާ ކަމަށާއި މިދިޔަ އަހަރު 588 މައްސަލައެއް ނިންމައިފައިވާ އިރު، ކޮރަޕްޝަނުގެ ޢަމަލެއް އެކުލެވިގެންވާ 22 މައްސަލައެއް ޝަރީޢަތަށް ހުށަހެޅުމަށް އެދި ޕްރޮސިކިއުޓަރ ޖެނެރަލްގެ އޮފީހަށް ފޮނުވާފައިވާ ކަމަށް އެ ރިޕޯޓުގައި ބުނެފައިވެއެވެ. އެއީ ވޭތުވެދިޔަ 5 އަހަރު ދުވަހަށް ބަލާއިރު އެންމެ ގިނަ އަދަދެއްގެ މައްސަލަ ޝަރީޢަތަށް ހުށަހެޅުމަށް އެދި ޕްރޮސިކިއުޓަރ ޖެނެރަލްގެ އޮފީހަށް ފޮނުވި އަހަރު ކަމަށާއި ވޭތުވެދިޔަ އަހަރު ތެރޭގައި ކޮމިޝަނުން ނިންމައިފައިވާ މައްސަލަތަކުގައި ދައުލަތަށް އަނބުރާ ހޯދަންޖެހޭ 2,182,565.78 ރުފިޔާ ދައުލަތަށް އަނބުރާ ހޯދުމަށް ކަމާ ބެހޭ އިދާރާތަކަށް އަންގައިފައިވާނެ ކަމަށް ވެސް އެ ބަޔާނުގައި ވެއެވެ.
މީގެ އިތުރުން ފުރަތަމަ ފަހަރަށް ޤައުމީ ފެންވަރެއްގައި ކޮރަޕްޝަނާ ދެކޮޅަށް މަސައްކަތްކުރާނެ ޕޮލިސީއެއް މިދިޔަ އަހަރު އެކުލަވައިލައި ޢަމަލުކުރަން ފަށައިފައިވާ ކަމަށާއި ކޮރަޕްޝަނާ ދެކޮޅަށް މުޖުތަމަޢު ހޭލުންތެރިކުރުވުމަށް ހިންގައިފައިވާ ޙަރަކާތްތަކުގެ ތެރޭގައި އެންމެ ބޮޑު ފޯކަސްއެއް ދެވިފައި ވަނީ ދައުލަތުގެ މުވައްޒަފުން ކޮރަޕްޝަނާ ދެކޮޅަށް ހޭލުންތެރިކުރުވުމަށް ކަމަށް އެ ކޮމިޝަނުން ބުންޏެވެ.
Ads by STO
