ލާމަރުކަޒީ ނިޒާމުގެ ވާހަކަ ދައްކަން އެމްޑީޕީން ލަދު ގަންނަން ޖެހޭ: ޝުޖާއު
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)އިން ލާމަރުކަޒީ ނިޒާމުގެ ވާހަކަ ދައްކަން ލަދު ގަންނަން ޖެހޭ ކަމަށް ވިދާޅުވެ، އެޕާޓީގެ ރައީސް މުހައްމަދު ނަޝީދަށް، ޕީއެންސީގެ ނައިބު ރައީސް، އަދި ހުޅުމާލެ ދާއިރާގެ ކައުންސިލަރު އިބްރާހީމް ޝުޖާއު ހޫނު ރައްދެއް ދެއްވައިފިއެވެ.
ލޯކަލް ކައުންސިލް އިންތިހާބުތަކުގައި ޕީޕީއެމުން ވާދަ ކުރާތީ އަޖައިބުވެވަޑައިގަންނަވާކަމަށް އެމްޑީޕީގެ ރައީސް މުހައްމަދު ނަޝީދު ވަނީ ވިދާޅުވެފައެވެ.
އެ މަނިކުފާނު މިފަދައިން ވިދާޅުވެފައި ވަނީ ޅ. ކުރެންދޫ ކައުންސިލްގެ ރައީސްގެ ބައިއިލެކްޝަންގައި އެމްޑީޕީގެ ފަރާތުން ވާދަ ކުރައްވާ ކެނޑިޑޭޓް، އަލީ ނަަސީމަށް ތާއީދު ހޯދުމުގެ ގޮތުން ރޭ ބޭއްވި ޖަލްސާގައެވެ.
ރައީސް ނަޝީދު ވިދާޅުވީ ޕީޕީއެމަކީ ރާއްޖެ މަރުކަޒު ކުރަން އުޅޭ ބައެއް ކަމަށާއި، އެޕާޓީއަކީ ލާމަރުކަޒީ އުސޫލާ ވެސް ހިލާފު ބައެއް ކަމަށެވެ.
ނަޝީދު ޓެގް ކުރައްވައި ޝުޖާއު ކުރެއްވި ޓްވީޓުތަކެއްގައި ވިދާޅުވީ މިއަދު އެމްޑީޕީން އިންތިހާބުތަކަށް ނުކުމެ، ލާމަރުކަޒު ވާހަކަ ދެއްކުމަކީ ލަދުވެތި، ހުތުރު އަމަލެއް ކަމަށެވެ.
އަދި ގެސްޓްހައުސް ހިންގަން ގުޅަން ޖެހެނީ ޓުއަރިޒަމް މިނިސްޓަރު އަބްދުﷲ މައުސޫމަށް ކަމަށާއި، ކައުންސިލުތަކުން ފަސް މިލިއަނުން ދަށުގެ މަޝްރޫއުތައް ބިޑްކޮށް، އިވެލުއޭޓް ކުރެވޭނެ ކަމަށް ބުނެ ހެދީ ދޮގު ކަމަށް ވެސް އޭނާ ވިދާޅުވިއެވެ.
"އަދާ ހަމައަށް މިކަން އޮތީ މައި ސަރުކާރު ވަޒީރު ބޭފުޅުންގެ ކަބަޑުތެރޭ ފޮރުވައިފައި." ޝުޖާއު ވިދާޅުވިއެވެ.
ކައުންސިލުތަކަށް އުފެއްދޭނެ ކަމަށް ބުނި ކުންފުނި އުފައްދަން ހުށަހެޅުމުން، އެކަން ވެސް ނުވާކަން ފާހަގަ ކުރައްވައި، އޭނާ އިތުރަށް ވިދާޅުވީ ޓްވީޓަކުން މި ހުރިހައި ވާހަކައެއް ނުދެއްކޭނެ ކަމަށެވެ.
Ads by STO
