އައިޕީޔޫގައި ބައިވެރިވެވަޑައިގަތުމަށް، މަޖިލީހުގެ ވަފުދެއް އިންޑޮނޭޝިއާއަށް
އިންޓަރ-ޕާލިމެންޓްރީ ޔޫނިއަން(އައިޕީޔޫ)ގެ 144 ވަނަ ބައްދަލުވުމުގައި ބައިވެރިވެވަޑައިގަތުމަށް، ރައްޔިތުންގެ މަޖިލީހުގެ ވަފްދެއް އިންޑޮނޭޝިއާއަށް ފުރާވަޑައިގެންފިއެވެ.
މި ވަފްދުގައި ހިމެނިވަޑައިގަންނަވަނީ މަހިބަދޫ ދާއިރާގެ މެމްބަރު އަޙްމަދު ޠާރިޤާއި، މަޑުއްވަރީ ދާއިރާގެ މެމްބަރު އާދަމް ޝަރީފު އުމަރާއި، މަކުނުދޫ ދާއިރާގެ މެމްބަރު މުޙައްމަދު ރާއީގެ އިތުރުން، ހިންނަވަރު ދާއިރާގެ މެމްބަރު ޖީހާން މަހުމޫދެެވެ.
މިބޭފުޅުން މިއަދު ފުރާވަޑައިގެންނެވިކަން މަޖިލީހުން ހާމަކުރެއްވި ނަމަވެސް، އިތުރު މައުލޫމާތެއް ހިއްސާ ކުރައްވާފައެއް ނުވެއެވެ.
އައިޕީޔޫ އަކީ 157 ގައުމުގެ މައްޗަށް އެކުލެވިގެންވާ ޖަމުއިއްޔާއެކެވެ. މި ޖަމުއިއްޔާގެ ޑިމޮކްރެސީ އެންޑް ހިއުމަންރައިޓްސް ކޮމިޓީއަށް، މިދިޔަ އަަހަރު، މެމްބަރު ޖީހާން ވަނީ ހޮވިވަޑައިގެންފައެވެ.
ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީގެ މުގައްރިރުކަން ވެސް ކުރައްވާ ޖީހާން، އައިޕީޔޫގެ ޑިމޮކްރަސީ ނެޓްވޯކަށް އިންތިހާބުކޮށްފައި ވަނީ ދެ އަހަރު ދުވަހުގެ މުއްދަތަކަށެވެ.
