"ބްރިޖް މަޝްރޫއުއަށް ހުރަސް އެޅޭނީ ބްރިޖެއް އަޅާނަމަތާ!"
މި ސަރުކާރުން ހިންގާ އުމްރާނީ ތަރައްގީގެ އެންމެ ބޮޑު މަޝްރޫއު ކަމުގައިވާ "ތިލަމާލެ ބްރިޖް" މަޝްރޫއުއަށް މާލެ ސިޓީ ކައުންސިލުން ހުރަސް އަޅާ ކަމަށް ބުނެ "ރާއްޖެ އެމްވީ"އިން ރިޕޯޓެއް ޝާއިއު ކުރުމުން، ހުޅުމާލެ ދާއިރާގެ ކައުންސިލަރު، އަދި ޕީއެންސީގެ ނައިބު ރައީސް އިބްރާހީމް ޝުޖާއު ހޫނު ރައްދެއް ދެއްވައިފިއެވެ.
"ސިޓީ ކައުންސިލުގެ އަމާޒު ބްރިޖުގެ މަަސައްކަތަށް ހުރަސް އެޅުމަށް" މި ސުރުހީގެ ދަށުން، "ރާއްޖެ އެމްވީ"ގައި ޝާއިއުކުރި ރިޕޯޓަކާ ގުޅިގެން ޝުޖާއު ވަނީ މި ގައުމުގައި ބްރިޖެއް އަޅާތޯ ސުވާލު އުފައްދަވައިފައެވެ. ބްރިޖުގެ މަސައްކަތަށް ހުރަސް އަޅާނީ، އެފަދަ މަޝްރޫއުއެއް މި ގައުމުގައި ކުރިއަށްދާ ނަމަ ކަމަށް ވިދާޅުވެ އޭނާ ވަނީ އެ މަޝްރޫއުގެ ދުވެއްޔަށް ވެސް ފާޑު ވިދާޅުވެފައެވެ.
ޝުޖާއު ވިދާޅުވި ގޮތުގައި، އެފަދަ ރިޕޯޓެއް ޝާއިއުކޮށްފައި ވަނީ ސަމާލުކަން ހޯދުމުގެ ގޮތުންނެވެ. އަދި ރައްޔިތުންގެ ލާބައާއި މަންފާއަށް ޓަކައި ކުރާ އެއްވެސް ކަމަކަށް ސިޓީ ކައުންސިލުން ހުރަސް ނާޅާނެ ކަމަށް ވެސް އޭނާ ވަނީ ވިދާޅުވެފައެެވެ.
"އަސްލަންޓެ މޮޔަ ނުވޭ." ޕްލޭނިން މިނިސްޓަރު މުހައްމަދު އަސްލަމަށް ނިސްބަތް ކުރައްވައި، ޝުޖާއު ވިދާޅުވިއެވެ.
ތިލަމާލެ ބްރިޖް މަޝްރޫއުގެ އަމަލީ މަސައްކަތް މިހައިތަނަށް ވެސް ފެށިއެއް ނުވެއެވެ. އަދިވެސް ކުރަމުންދަނީ އެ ބުރިޖްގެ ދިރާސާގެ މަސައްކަތެވެ. އެހެންވެ، މި ދައުރު ނިމޭއިރު ވެސް، މި މަޝްރޫއު ނުނިންމޭނެ ކަމަށް ފާޑުކިޔާ ފަރާތްތަކުން ދަނީ ބުނަމުންނެވެ.
