ބޭރު ގައުމެއްގެ އަސްކަރީ މަރުކަޒެއް ހުރުމުގެ ދިފާއުގައި ނަޝީދު ވާހަކަފުޅު ދައްކަވައިފި
އަސްކަރިއްޔާގެ ބޮޑެތި މަރުކަޒުތައް ގާއިމްކޮށްފައި ހުންނަ ގައުމުތަކުގައި އިންވެސްޓްމަންޓްތައް ގިނަ ކަމަށް ވިދާޅުވެ، ގައުމުތަކުގައި އަސްކަރީ މަރުކަޒުތައް ހުރުމުގެ ދިފާއުގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވާހަކަފުޅު ދައްކަވައިފިއެވެ.
މަޖިލީހުގެ މިއަދުގެ ޖަލްސާގައި، އިހަވަންދިއްޕޮޅުގައި އާގުބޯޓަށް ވަދެވޭނެ މަގު ތަނަވަސްކޮށްދިނުމަށް އެދި ހުށަހެޅި ގަރާރަށް ބަހުސް ކުރައްވަމުން، ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހްމަދު ޝިޔާމް ވިދާޅުވީ ރައީސް ޔާމީންގެ ވެރިކަމުގައި އިހަވަންދިއްޕޮޅަށް ވަރުގަދަ ތަސައްވުރެއް ގެންގުޅުއްވައި، އެ ތަނުގައި ޓްރާންސްޝިޕްމަންޓް ބަނދަރެއް ވެސް ތަރައްގީ ކުރަން އުޅުއްވި ކަމަށެވެ. އޭނާ އެ އިޝާރާތް ކުރެއްވީ "އައިހެވަން" މަޝްރޫއުއަށެވެ.
ނަމަވެސް އެ މަޝްރޫއުއަށް ހުރަސް އެޅީ، އޭރު ސިޔާސީ ވިސްނުމުގައި ތިބި ބަޔަކު ކަމަށް ވެސް އޭނާ ވިދާޅުވިއެވެ. އަދި އިންޑިއާ ނޫން ބަޔަކު "އިންޑިއަން އޯޝަން"ގައި މިފަދަ މަޝްރޫއުއެއް ހިންގާ ނަމަ، އިންޑިއާ ކަނޑުގެ ސަލާމަތަށް ނުރައްކާވާނެ ކަމަށް ބުނެ، އެކަން ވިޔަ ނުދިނުމަށް، އިންޑިއާއިން ވެސް މަސައްކަތް ކުރި ކަމަށް ޝިޔާމް ތުހުމަތު ކުރެއްވިއެވެ.
އަދި ރާއްޖޭގެ ދާހިލީ ކަންކަމަށާއި، މުޅި ނިޒާމަށް އިންޑިއާގެ ނުފޫޒު އޮތުމުން، އިންވެސްޓަރުން ރާއްޖޭގައި އިސްވެސްޓު ކުރަން ޖެހިލުންވާ ކަމަށް ވެސް ވިދާޅުވިއެވެ.
"އިންޑިއާ އަސްކަރިއްޔާ ސިފައިން މިތާ ތިބުމަކީ، މުޅި މި ސަރަހައްދަށް އިންވެސްޓުކޮށްގެން ތިބި، އިންވެސްޓަރުން ބިރު ގަންނަ ކަމެއް." ޝިޔާމް ވިދާޅުވިއެވެ.
މި ވާހަކައާ ގުޅިގެން، ނަޝީދު ވިދާޅުވެފައި ވަނީ މިލިޓަރީ ބޭސް ނުވަތަ އަސްކަރީ މަރުކަޒުތައް ހުރި ގައުމުތަކުގައި އިންވެސްޓްމަންޓްތައް ގިނަ ކަމަށެވެ. މިސާލެއްގެ ގޮތުގައި އެމަނިކުފާނު ފާހަގަކުރެއްވީ، ކުވައިތު، ގަތަރު، އަބޫދާބީ، ސައުތު ކޮރެއާ، ފިލިޕީންސް، ފަދަ ގައުމުތަކެވެ.
ރާއްޖޭގައި އިންޑިއާ ސިފައިން ގާއިމުވެ ތިބި މައްސަލައިގައި އިދިކޮޅު ލީޑަރު، ރައީސް ޔާމީން އިސްކޮށް ހުންނަވައި "އިންޑިއާ އައުޓް"ގެ ނަމުގައި ކެމްޕެއިނެއް ވަނީ ފަށައިފައެވެ.
އިންޑިއާއިން ރާއްޖެއަށް ހަދިޔާ ކުރި ހެލިކޮޕްޓަރާއި ޑޯނިއާ ދުއްވުމުގެ ނަމުގައި، އެގައުމުގެ ސިފައިން ރާއްޖޭގައި ހަރަކާތްތެރިވަމުން އަންނައިރު، މިކަމުގެ ދިފާއުގައި ސަރުކާރުން ބުނަނީ އެގައުމުގެ ސިފައިން ތިބެނީ އެއްވެސް ހަތިޔާރެއް ނެތި ކަމަށެވެ.
މިވާހަކަތަކުގެ ރައްދުގައި އިދިކޮޅު ލީޑަރު، ރައީސް ޔާމީން ވިދާޅު ވަނީ، އެއްވެސް ގައުމެއްގައި ބޭރުގެ އަސްކަރީ ބަޔަކު ތިބޭ ނަމަ، ހަތިޔާރު ނުލައި ނުތިބޭނެ ކަމަށެވެ.
