އަޅުގަނޑު އެދެނީ ރައީސް އިންޑިއާގެ ރައްޔިތުން ކުރިމަތިގައި ގުދުވާން: ޖާބިރު
ދިވެހި ދައުލަތުން، އެހެން ދައުލަތަކަށް ގުދުވާ ނަމަ، އޭނާ އެދިވަޑައިގަންނަވަނީ، ދިވެހިރާއްޖޭގެ ރައީސުލްޖުމްހޫރިއްޔާ، އިންޑިއާގެ ރައްޔިތުންގެ ކުރިމަތީގައި ގުދުވުމަށް ކަމަށް ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު ވިދާޅުވެއްޖެއެވެ.
ޖާބިރު މިހެން ވިދާޅުވެފައި ވަނީ "ނޭވާހޮޅިއަށް" މިނަމުގައި އިދިކޮޅު ފަރާތްތަކުން ވެރިރަށް މާލޭގައި ބާއްވަން އުޅޭ އެއްވުން ހުއްޓުވުމަށް ގޮވައިލައްވައި، އޭނާ މިއަދު ހުށަހެޅުއްވި ކުއްލި މައްސަލައަށް ބަހުސް ކުރައްވަމުންނެވެ.
ޖާބިރު ވިދާޅުވި ގޮތުގައި، ދިވެހިރާއްޖެއާއި އިންޑިއާގެ އަސްކަރިއްޔާއާ ދެމެދު އޮންނަނީ ވަރަށް ގާތް ގުޅުމެކެވެ. 1988ވަނަ އަހަރުގެ ނޮވެމްބަރުމަހުގެ 03 ވަނަ ދުވަހު އެކަން ފެނިގެން ދިޔަ ކަމަށް ވެސް އޭނާ ވިދާޅުވިއެވެ.
"މިދިޔަ ކޮރޯނާ ވައިރަސް ތެރޭގައި އަޅުގަނޑުމެންނަށް ދިމާވި ހުރިހައި ކަމެއްގައި، ނަރެންދްރަ މޯދީ، އިންޑިއާގެ ރައްޔިތުން އަޅުގަނޑުމެންގެ އަތުގައި ހިފައި ކޮޅަށް ޖެހީ." އޭނާ ވިދާޅުވިއެވެ.
ޖާބިރު މިއަދު ހުށަހެޅުއްވި ކުއްލި މައްސަލައިގައި ވަނީ ރާއްޖެއާއި އިންޑިއާއާ ދެމެދު އޮތް މޫރިތި ގުޅުމަށް ބުރޫ އަރާ ގޮތަށް މާލެއާ އަތޮޅުތެރޭގައި ފަހަކަށް އައިސް ހިންގަމުން އަންނަ ހަރަކާތްތަކުގެ ސަބަބުން، އިންޑިއާ-ރާއްޖޭގެ ގުޅުން ގޯސްވެ، ދެ ގައުމުގެ އާންމު ރައްޔިތުންނާ ހަމައަށް، މި ސިޔާސީ ފިތުނަ ފުޅާވެ، އެއްބަޔަކު އަނެއް ބަޔަކަށް ހަމަލާދޭ ހިސާބަށް ގޮސްފައިވާ ކަމަށެވެ.
އެހެންކަމުން މިކަން މިހިސާބަށް ދިޔަ ނުދީ ހިފެހެއްޓުމަކީ، ގައުމީ ސަލާމަތަށް ޓަކައި ވަރަށް މުހިންމު ފިޔަވަޅެއް ކަމަށް ވެސް އޭނާ ހުށަހެޅުއްވި މައްސަލައިގައިވެއެވެ.
"ސަލާމަތާ ބެހޭ ބާރުތަކުން އަވަސް މަޝްވަރާކުރުމާ އެކު، އިދިކޮޅު ލީޑަރު، ޔާމީން އަބްދުލްގައްޔޫމް އިސްވެ ހުންނަވައިގެން، އަތޮޅުތަކުން މީހުން ގެނެސްގެން ފުރަމާލޭގައި ބާއްވަން ރާވަމުންދާ "އިންޑިއާ އައުޓް" ހަރަކާތް ހުއްޓުވުމަކީ މި ވަގުތަށް ވަރަށް މުހިންމު ކަމެއް ކަމަށް ފެންނާތީ ހުށަހަޅާ ކުއްލި މައްސަލައެކެވެ." އޭނާ ހުށަހެޅުއްވި މައްސަލައިގައިވެއެވެ.
Ads by STO
