"މުޅި ދުނިޔޭގައި ވެސް ފުލުހުންގެ މުއައްސަސާތަކުގައި ގޯސްހަދާ މީހުން އުޅޭ"
މުޅި ދުނިޔޭގައި ވެސް ފުުލުހުންގެ މުއައްސަސާތަކުގައި ގަސްތުގައި ގޯސް ހަދާ މީހުން އުޅޭ ކަަމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު، އަދި މަޖިލީހުގެ ނައިބު ރައީސް އީވާ އަބްދުﷲ ވިދާޅުވެއްޖެއެވެ.
އީވާ މިހެން ވިދާޅުވީ ފުލުހުންގެ ތެރޭގައި ގޯސްހަދާ މީހުން ތިބިކަމަށް ބަންޑާރަނަ ނައިބު މަޖިލީހުގެ ކޮމެޓީއެއްގައި ވިދާޅުވެފައި ވަނިކޮށް އެކަން މަޖިލީހުގެ ޖަލްސާއެއްގައި ހޯމް މިނިސްޓަރ އިމްރާން ދޮގުކުރައްވައިފައި ވާތީ ދެވަޒީރުންގެ ތެރެއިން އިތުރުފުޅު ހެއްދެވި ވަޒީރަކަށް ފިޔަވަޅު އެޅުމަށް ގޮވައިލައި މަޖިލީހަށް، މަޑުއްވަރީ ދާއިރާގެ މެމްބަރު އާދަމް ޝަރީފު ހުށަހެޅުއްވި ކުއްލި މައްސަލައަށް ބަހުސް ކުރައްވަމުންނެވެ.
އީވާ ވިދާޅުވީ އާދަމް ޝަރީފު ހުށަހެޅުއްވީ މުހިންމު މައްސަލައެއް ކަމަށާއި، އެ މައްސަލަ ނުބެލޭނެ ގޮތެއް ވިސްނިވަޑައިނުގަންނަވާ ކަމަށެވެ.
މިއީ މަޖިލީހުގެ އިމްތިޔާޒާ ގުޅިފައިވާ މައްސަލައެއްކަން ފާހަގަކުރައްވައި އީވާ ވިދާޅުވީ ގާނޫނު އަސާސީގެ 98ވަނަ މާއްދާގައި، މަޖިލީހުގައި ވަޒީރުން ވާހަކަ ދައްކަވަން ޖެހިވަޑައިގަންނަވާނީ ތެދު ބަހުންކަން ސާފުކޮށް ބަޔާންކޮށްފައިވާ ކަމަށެވެ.
އަދި މުޅި ދުނިޔޭގައި ވެސް، ކޯޓުތަކާ ފުލުހުންގެ މުއައްސަސާތަކުގައި ގަސްތުގައި ގޯސްހަދާ ބަޔަކު އުޅޭ ކަމަށް އޭނާ ވިދާޅުވިއެވެ.
"މަސްތުވާތަކެއްޗާ ގުޅޭ ކަންކަމާއި ހިއުމަން ޓްރެފިކިންއާ ގުޅޭ ކަންކަމަށް، މިކަހަލަ ބޮޑެތި ޖަރީމާތަކުގައި ގަސްތުގައި ގޯސް ހަދާ ފުލުހުން މުޅި ދުނިޔޭގައި ވެސް އުޅޭކަން އެނގޭ. އެއީ ދެން ދޮގު ނުކުރެވޭނެ ވަރުގެ ވާހަކައެއް. އަޅުގަނޑަށް ނުވިސްނެނީ، ހޯމް މިނިސްޓަރަށް ކިހިނެއްތޯއޭ ކުއްލިއަކަށް، ރާއްޖޭގެ ފުލުސް އޮފީހުގައި އެކަހަަލަ ގޯސް ހަދާ މީހުންނެއް ނޫޅޭނެއޭ ބުނެވޭނީ؟" އީވާ ވިދާޅުވިއެވެ.
އީވާ އިތުރަށް ވިދާޅުވީ އެފަދަ ވާހަކައެއް މިނިސްޓަރަށް ވިދާޅުވެވޭނީ ރަނގަޅަށް އެކަން ބައްލަވައިފައި ކަމަށެވެ. އަދި ކަންކަން ރަނގަޅު ކުރަން ބޭނުން ނަމަ، ގޯހެއް ހެދިފައިވާ އިރު، ގޯސް ގަބޫލު ކުރަން ޖެހޭނެ ކަަމަށް ވެސް ވިދާޅުވިއެވެ.
