ޖިންސީ ގޯނާގެ މައުލޫމާތު އާންމުކުރުމަށް އައްޑޫ މޭޔަރު ގޮވައިލައިފި
އުމުރުން ހަ އަހަރުގެ ކުޑަ އަންހެން ކުއްޖަކަށް ޖިންސީ ގޯނާ ކުރިކަމުގެ މައްސަލައިގައި އާންމުން ކުރަމުން އަންނަ ތުހުމަތުތަކަށް ވެސް ސަމާލުކަން ދިނުމަށް އައްޑޫ ސިޓީގެ މޭޔަރު އަލީ ނިޒާރު ކަމާ ބެހޭ ފަރާތްތަކަށް ގޮވައިލައްވައިފިއެވެ.
ދެކުނުގެ އަތޮޅެއްގައި ކުޑަކުއްޖަކަށް ޖިންސީ ގޯނާކުރިކަމުގެ ތުހުމަތުގައި އުމުރުން 59 އަހަރުގެ އަންހެނަކު ހައްޔަރުކޮށް، ޝަރީއަތް ނިމެންދެން ބަންދުކުރަން ކޯޓުން ނިންމައިފައިވާ އިރު، އެ މައްސަލައިގައި ރަށު މީހުން ތުހުމަތު ކުރަނީ އެ ކުއްޖާއާ އާއިލީގޮތުން ގުޅުން އޮންނަ ފިރިހެނަކަށެވެ.
މި މައްސަލައާ ގުޅިގެން އައްޑޫ ސިޓީގެ މޭޔަރު މިއަދު ކުރެއްވި ޓްވީޓެއްގައި ވިދާޅުވީ ރައްޔިތުންގެ ކަންބޮޑުވުން އޮތް މިފަދަ މައްސަލައެއްގައި ފުލުހުން، ރައްޔިތުންނަށް ދެވެން އޮތް މިންވަރަކުން މައުލޫމާތު ދޭން ޖެހޭ ކަމަށެވެ.
"އަދި ޖެންޑާ މިނިސްޓްރީން ވެސް މިކަމުގައި އެއްބާރުލުން ދޭން ޖެހޭ. މި މައްސަލައިގައި ރައްޔިތުންގެ ތުހުމަތުތަކަށް ވެސް ބަލައިލުން ރަނގަޅު" ނިޒާރު ވިދާޅުވިއެވެ.
ކުޑަ ކުއްޖަކަށް ޖިންސީ ގޯނާކުރިކަމުގެ ދޮގު ތުހުމަތުގައި އަންހެނަކު ހައްޔަރު ކޮށްފައިވުމާއި މިކަމުގައި އާއިލީ ގޮތުން ގުޅުން އޮތް ފިރިހެންމީހާގެ މައްސަލަ ބަލަމުން ނުދާކަމަށް ބުނެ އިއްޔެ ހަވީރާއި ރޭގަނޑު އެ ރަށުގައި ވަނީ އިހުތިޖާޖުކޮށްފައެވެ. އަދި ރޭ އެ ފިރިހެން މީހާ ދިރިއުޅޭ ގެއަށް ބަޔަކު ވަދެ، އެކިވަރުގެ ގެއްލުން ދީފައިވާކަމަށް ވެސް މައުލޫމާތު ލިބެއެވެ.
