ރައީސް ނަޝީދުގެ އިލްތިމާސެއް: އެމްޑިޕީގެ މެނިފެސްޓޯއަށް ރުޖޫޢަވެ، މަސްވެރިންނަވީ ވައުދު ފުއްދަވާ!
ރާއްޖޭގެ މަސްވެރިކަން މިހާރު ހުރިގޮތާ މެދު ކަންބޮޑުވުން ފާޅު ކުރައްވައި، އެކަމުގެ ހައްލެއްގެ ގޮތުން އެމްޑީޕީގެ މެނިފެސްޓޯއަށް ރުޖޫޢަވުމަށާއި މަސްވެރިންނަށްވީ ވައުދު ފުއްދުމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު މިއަދު ސަރުކާރަށް އިލްތިމާސް ކުރައްވައިފިއެވެ.
މިފްކޯގެ ކެޕޭސިޓީއަށް ވުރެ އިތުރަށް މަސް ބާނަމުންދާތީ އިއްޔެއިން ފެށިގެން ދޯންޏަކުން ފަސް ޓަނުގެ މަސް ގަތުމަށް އެ ކުންފުނިން ވަނީ ނިންމައިފައެވެ. އެކަމާ ގުޅިގެން މަސްވެރިންގެ ނުރުހުން މިފްކޯއަށާއި ސަރުކާރަށް ވަނީ އަމާޒުވެފައެވެ.
އެކަމާ ގުޅިގެން، "ކެޔޮޅާ މީ އަހަރެމެން ބުނި ގޮތެއް ނޫން" ނަމުގައި މިއަދު ނެރުއްވި ނޫސްބަޔާނެއްގައި އެމްޑީޕީގެ ލީޑަރު އަދި ކުރީގެ ރައީސް ނަޝީދު ވިދާޅުވީ މަސްވެރިން ބޭނި މަސް ނުކިރި އެތައް ތަކުލީފެއްގައި އުޅެން ޖެހުމުން އެ މަނިކުފާނު ގާތު އެމީހުން ޝަކުވާ ކުރި ކަމަށާއި މަސްވެރިންނަށް އެމްޑީޕީންވީ ވައުދުތައް އެމީހުން ޤަބޫލުކޮށް ވޯޓުދިން ކަމަށް ވެސް އެމީހުން ބުނި ކަމަށެވެ.
މަސްވެރިން އިޝާރާތް ކުރަނީ 2018ވަނަ އަހަރު އެމްޑީޕީ މެނިފެސްޓޯގައި ހުށަހަޅާފައިވާ ތަސައްވަރަށްކަން ވެސް ރައީސް ނަޝީދު ފާހަގަ ކުރައްވައިފައިވެއެވެ.
"އެމްޑީޕީ ކޮންމެ އިންތިހާބަކަށް ނުކުންނަ ކޮންމެ މެނިފެސްޓޯއެއްގައި ވެސް މަސްވެރިން ބާނާ މަސް ގަނެވި އަދި އެއަށް ހަމަ އަގު ލިބޭނޭ ގޮތްތައް ރައްޔިތުންނަށް ހުށަހަޅައެވެ. މަހުގެ ހަމަ އަގު ހޯދުމަށް ބޭނުންވާ ސިޔާސަތުތައް އެކުލަވާލާ ތަންފީޒު ކޮށްދޭނެކަމަށް ވައުދުވެއެވެ" ރައީސް ނަޝީދު ލިޔުއްވައިފައިވާ ބަޔާނުގައި ވިދާޅުވެފައިވެއެވެ.
މަސް ގަނޑުކޮށާއި ފިނިކޮށް ރައްކާކުރުމާއި އަދި މަސް ބަންދު ކުރުމުގެ މިއަދުގެ ސިނާއަތުގައި، ކުދިމަސް ބަންދުކުރާ ނިޒާމުތައް އިންތިހާއަށް ފައިދާ ބޮޑުކޮށް އެތައް ޤައުމެއްގައި ހިންގައިކަން ރައީސް ނަޝީދު ފާހަގަ ކުރެއްވިއެވެ.
އެއީ ދުވާލެއްގެ މައްޗަށް ދިހައެއް ނުވަތަ ވިހި ޓަނު ބަންދުކުރެވޭ މިންވަރުގެ މަސްބަންދުކުރާ ނިޒާމުތައް ކަމަށާއި އެއީ ވިހި ތިރީސް މީހުން މަސައްކަތް ކުރާ ގޭދޮށު ކުދި ފެކްޓަރީތައްކަން ވެސް ރައީސް ނަޝީދު ފާހަގަ ކުރެއްވިއެވެ.
"ރާއްޖޭގެ މަސްވެރިކަމުގެ ސިނާޢަތު އަބަދުވެސް އޮންނަނީ ދައުލަތުގެ ކޮންޓްރޯލުގައެވެ. ރޯމަސް ގަތުމުގެ ހުއްދަ އާންމު ފަރާތްތަކަށް ދޫކޮށްލަން ފެއްޓުނީ 2003ވަނަ އަހަރުގައެވެ. 2008ވަނަ އަހަރު އެމްޑިޕީ ސަރުކާރުން މިކަން އިތުރަށް ފުޅާކުރިއެވެ. މަސްގަންނަ އަމިއްލަ ކުންފުނިތައް ގިނަވެ، މަހުގެ އަގު އުފުލެން ފެށިއެވެ." ރައީސް ނަޝީދު ވިދާޅުވިއެވެ.
އޭގެފަހުން 2012ވަނަ އަހަރު އެމްޑީޕީ ސަރުކާރު "ވައްޓައިލުމަށް ފަހުގައި" އެންމެ ފުރަތަމަ ގެނެވުނު އެއް ބަދަލަކީ މަސްވެރިކަމުގެ ސިނާއަތައް ގެނައި ބަދަލުކަން ރައީސް ނަޝީދު ވަނީ ފާހަގަ ކުރައްވައިފައެވެ. އޭގެ ނަތީޖާއެއްގެ ގޮތުން މަހުގެ އަގު އިންތިހާއަށް ދަށްވެގެން ދިޔައީކަމަށް އެމަނިކުފާނު ވިދާޅުވިއެވެ.
Ads by STO
