މިރޭ އިޙްޔާ ފޯރަމްގައި ތަޤުރީރު ކުރައްވާނީ ހޯމް މިނިސްޓަރ އިމްރާން
ރަމަޟާންމަހުގެ ރޭތައް އިޙްޔާ ކުރުމަށް މިރޭ ބާއްވާ ފޯރަމްގައި ހޯމް މިނިސްޓަރ އިމްރާން ޢަބްދުﷲ ތަގްރީރްކުރައްވާނެކަމަށް އިސްލާމިކް މިނިސްޓްރީން ވިދާޅުވެއްޖެއެވެ.
މިރޭ އޮންނަ ފޯރަމްގައި މިނިސްޓަރ ތަޤުރީރް ކުރައްވާނީ "ތިބާ ﷲއާ އެކު ވާށެވެ." މިމައުޟޫއަށެވެ. މިރޭގެ ދަރުސް އޮންނާނީ އިސްލާމީ މަރުކަޒުގައެވެ.
ރަމަޟާންމަހުގެ ރޭތައް އިޙްޔާކުރުމަށް ކުރިއަށްގެންދާ އިޙްޔާ ފޯރަމްތައް މާލޭގެ އިތުރުން އަތޮޅުތަކުގެ ބައެއް ރަށްރަށުގައި ވެސް ކުރިއަށްގެންދެއެވެ. އެގޮތުން މިދިޔަ ހުކުރު ދުވަހުގެ ފޯރަމް ބާއްވައިފައި ވަނީ ކުޅުދުއްފުށީގައެވެ.
އަތޮޅުތަކުގައި ބާއްވާ މި ސިލްސިލާގެ ދަށުން ހަތަރު ސިޓީއާއި ރ.އުނގޫފާރުގައި ވެސް އިހްޔާގެ ދަރުސްތައް އޮންނާނެއެވެ. އައްޑޫ ސިޓީގައި އިޙްޔާ ފޯރަމް ބޭއްވުމަށް ހަމަޖެހިފައި ވަނީ މި މަހުގެ 15ވަނަ ދުވަހުގައެވެ. 22 އޭޕްރީލްގައި އޮނާނީ ފުވައްމުލަކު ސިޓީގައެވެ. އަދި 29 އޭޕްރީލްގައި ރ.އުނގޫފާރުގައި މި ފޯރަމް ކުރިއަށް ގެންދާނެއެވެ.
އިސްލާމިކް މިނިސްޓްރީން ވިދާޅުވީ، އާދިއްތަ އަދި ބުރާސްފަތި ދުވަހު އިޙްޔާ ފޯރަމްތައް ކުރިއަށްދާނީ މާލެ ސިޓީގެ އިސްލާމީ މަރުކަޒުގައި ކަމަށެވެ. އަދި ހުކުރު ދުވަހުގެ ރޭގެ އިޙްޔާ ފޯރަމްތައް ކުރިއަށް ގެންދާނީ ރަށްރަށުގައި ކަމަށެވެ.
